[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 2.48 # Dvadasharanayacakra 2.48 Nyāyāgamānusāriṇī 2.48 - **Language:** Sanskrit ### [2.48](https://indike.org/pramana/in.jaina.post.dvadasaranayacakra!simhasuri.2.48) asatkāryābhyupagamapradarśanārthamāha --ekāvasthāmātravicchinnetyādi yāvat kuryāditi kāraṇe kāryasyāsattvaikāntābhyupagamāt . ekāvasthāmātravicchinnapūrvāparatattvāgnyādibhinnavastutvābhiniveśavidhānācceti, caśabdājjuhuyādukteśca, ekasyaivāvasthā ekā ca sāvasthā ca ekāvasthā, tatparimāṇamekāvasthāmātraṃ timitasaraḥsalilavadavicchinnam, tasyaiva punastattvaṃ vicchinnaṃ pūrvasyāparasya cendhanāderagnyāde- rbhasmāderghaṭapaṭādeśca paraviṣayasāmānyavādimatavat, sarvaikyāpannasya sato'gnyāderbhinnavastutvenābhiniveśastadabhyupagamo'gniriti paramāṇudvyaṇukādibhūmyabādisaṃyogasambhūtavanaspatībhūtāgnibhasmatruṭiparamāṇvādivicchinnāvasthāmātratve sati agniriti bhavati krameṇa pariṇāmabhedābhyupagamāt, tasya vidhānāt, agnihotraṃ juhuyāt iti ca havanakriyānuṣṭhānaṃ tatphalābhimataḥ svargastayośca sambandha iti parasparaṃ vighaṭitatvānnopapadyeta pūrvāparābhyupagamayoḥ . kiṃ kāraṇaṃ vighaṭitatvamiti cet, ucyate --kāraṇe kāryasyāsattvaikāntābhyupagamāditi vighaṭanapradarśanam . evaṃ hi kāraṇe ghṛtādau kāryasyāgnihavanakarmaṇastatkāryasya ca svargāderasattve sati karaṇamupapadyate, tacca sati nopapadyate siddhaudanapacanavat, viśiṣṭaikāgnyādyavasthābhyupagame ca puruṣādikāraṇātmakasarvaikyābhyupagamavirodhini satyupapadyate nānyathetyata āha --sarvagatasatkāryakāraṇavṛttitve bhedavidhinirviṣayatvāt, suptasuṣuptajāgaritaturīyāvasthākrameṇaikameva yugapadvā sarvagataṃ puruṣākhyaṃ kāraṇam, tacca satkāryam, bhedavidhinirviṣayatvāt sarvavastusannidhisadbhūtaiva sā bhedasādhanasambandhābhinirvartyeti vidhīyate, tadanu yathābhāgakārakavinyāsātmikayetikartavyatayānuṣṭhīyate . ato'sau prāg nāsīt, kāryatvena parigṛhītatvāt, viśeṣaikāntivastuvat . sa cāpratipūrṇastarkaḥ, asiddhahetukatvāt pratitarkeṇa bādhyatvācca . na tu tattvamevaṃ vastuno'satkāryatvam, vyaṅgyatvāt, piṇḍakālaghaṭavat, tattva sarvagataṃ ca tat satkāryakāraṇaṃ ca taditi vigrahāt, vakṣyamāṇavidhividhinayadarśanena tadvṛttitve agnihotraṃ kuryāt iti bhedavidhinirviṣayatvamagnyādyabhāvāt . yathoktam-- - [Previous: 2.47](https://indike.org/pramana/in.jaina.post.dvadasaranayacakra!simhasuri.2.47) - [Next: 2.49](https://indike.org/pramana/in.jaina.post.dvadasaranayacakra!simhasuri.2.49) - [Up: 2](https://indike.org/pramana/in.jaina.post.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.163) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.2.48](https://indike.org/pramana/in.jaina.post.dvadasaranayacakra!simhasuri.2.48) · Pramāṇa