[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 2.50 # Dvadasharanayacakra 2.50 Nyāyāgamānusāriṇī 2.50 - **Language:** Sanskrit ### [2.50](https://indike.org/pramana/in.jaina.post.dvadasaranayacakra!simhasuri.2.50) tathā— puruṣa evedaṃ sarvaṃ yad bhūtaṃ yacca bhāvyam . utāmṛtatvasyeśāno yadannenātirohati .. śuklayajuḥsaṃ॰ a॰ 31 . 2 ityādi, etaddarśanaṃ pratipādayiṣyate . ataḥ sarvavastusannidhītyādi, sarvavastūnāṃ sannidhau sadbhūtaiva sā havanakriyā tathāpi bhedāḥ sādhanānyasyāḥ, ghṛtena payasā juhuyāt ityādibhedakriyā evāgnihavanakriyāyāḥ sādhanāni tānyantareṇa tadabhāvāt sādhanasambandhābhinirvartyeti vidhīyate, kena ? upadeṣṭrā svargakāmaṃ puruṣaṃ prati vacanena tvayā kartavyeti vidhīyate . tadanu anuṣṭhātrāpi tadupadiṣṭabhedasādhananiṣpādyetyabhyupagamya yo yo bhāgo yathābhāgaṃ kārakāṇāṃ vinyāsa ātmā yasyā itikartavyatāyāḥ sā yathābhāgakārakavinyāsātmikā, tayā itikartavyatayā gavālambhanājyaprakṣepādiprakārarūpayānuṣṭhīyate, sāmarthyādato'sau prāg nāsīdityāśritā . kasmāt ? kāryatvena parigṛhītatvāt, kuryājjuhuyāt ityādivacanāt kāryatvena nirvartyatvena parigṛhītaiva sā . dṛṣṭānto viśeṣaikāntivastuvaditi, yathā viśeṣaikāntavādinā kāryameva, na kāraṇam iti pratikṣaṇotpattivināśātmakatvāt pratipannaṃ vastu tat prāg nāsti, tacca tvayābhyupagataṃ kriyābhyupagamāditi tvāṃ prati sādhyasādhanadharmānvito dṛṣṭāntaḥ, mayāpi ca tadabhyupagamyoktatvāditi sādhyasādhanam . evamanena tarkeṇāsatkāryavādo'bhyupagatastvayā bhavati . sa cāpratipūrṇastarkaḥ, asiddhahetukatvāt pratitarkeṇa bādhyatvācca . - [Previous: 2.49](https://indike.org/pramana/in.jaina.post.dvadasaranayacakra!simhasuri.2.49) - [Next: 2.51](https://indike.org/pramana/in.jaina.post.dvadasaranayacakra!simhasuri.2.51) - [Up: 2](https://indike.org/pramana/in.jaina.post.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.163) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.2.50](https://indike.org/pramana/in.jaina.post.dvadasaranayacakra!simhasuri.2.50) · Pramāṇa