[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 2.56 # Dvadasharanayacakra 2.56 Nyāyāgamānusāriṇī 2.56 - **Language:** Sanskrit ### [2.56](https://indike.org/pramana/in.jaina.post.dvadasaranayacakra!simhasuri.2.56) kiñcānyat, abhimatavidhyanuvādavaiparītyadoṣaprasaṅgaśca . tatra tāvat ghṛtena juhuyāt payasā juhuyāt ityādivākyeṣu ghṛtādervidheyatvābhimatasya kāraṇamātrasya havanakāryasyānyasya tanmātretikartavyatāmātrahavanārthatvāt agnihotraṃ juhuyāt ityatra śrutahavanānuvādābhāvo'pi, havanasya ghṛtādivyatiriktasyābhāvāt . tataśca ghṛtādividhānavajjñātārthābhimatasya havanavākyasya vidhāyakataiva syāt, nānuvādatā . anuvādatā ca ghṛtāderajñātārthavidhāyakābhimatasyāpi, kāraṇamātravṛttitvād havanavaditi, kāraṇamātre vṛttirasya tat kāraṇamātravṛtti ghṛtādi havanaṃ ca, uktavidhinā kāryābhāvasya pratipāditatvāt . tasmāt kāraṇamātravṛttitvād havanavad ghṛtāderanuvādatā ghṛtādivaddhavanasya vidhāyakateti . evaṃ ceti, vidhyanuvādayoranyonyasvabhāvasaṅkarāvyavasthitātmasvabhāvatvānna vidhirnānuvādo'sti, ata evamuktaprakāreṇāvākyatvam, ananuvādatvādavidhāyakatvāt, vicchinnārthapadavat . yathā vicchinnārthamekaṃ padamadhikṛtapadārthāntarāsambandhaṃ gām ityetanna vākyamata eva vidhyanuvādatvākāṅkṣyārthābhāvāt tathā agnihotraṃ juhuyāt svargakāmaḥ, ghṛtena payasā juhuyāt ityādīni . yasyāpi padārtho nāstyeva taṃ prati kākarutavaditi dṛṣṭāntaḥ . yathā kākarutamarthāntarākāṅkṣārahitamavākyamavidhyanuvādatvāt tathedamapi . - [Previous: 2.55](https://indike.org/pramana/in.jaina.post.dvadasaranayacakra!simhasuri.2.55) - [Next: 2.57](https://indike.org/pramana/in.jaina.post.dvadasaranayacakra!simhasuri.2.57) - [Up: 2](https://indike.org/pramana/in.jaina.post.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.2.10) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.2.56](https://indike.org/pramana/in.jaina.post.dvadasaranayacakra!simhasuri.2.56) · Pramāṇa