[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 2.64 # Dvadasharanayacakra 2.64 Nyāyāgamānusāriṇī 2.64 - **Language:** Sanskrit ### [2.64](https://indike.org/pramana/in.jaina.post.dvadasaranayacakra!simhasuri.2.64) śailīprasiddhau chidivadityādi, chidāviva cchidivat, yathā chidau dṛṣṭalaukikayūpamātraphalatvaṃ nādṛṣṭālaukikahavanātmakāgnihotratvaṃ tathā, agnihotraṃ juhuyāt ityasyāpi tacchailyaivāgnihotramahavanātmakam, prāptipratipādyaprasiddhāvagnihotre juhotiprayogo dānādiprasiddhyuparodhena dāhana eva tāvadvidheya iti tathā'prasiddheravidhāyaka eva, kutastadanuvādaḥ ? tathābhūtārthābhyupagame ca prāptervyudāso juhotiprayogādapramattaprayuktatvāt, iṣe tvādivadakṣaravidyāvat . ahavanātmakāgnihotratvāccānagnihotratvaṃ prasaktaṃ chidinirvartyayūpavat . atra ca etadapi na vaiṣamyāt ityādigrantho yojyo yāvat śailīprāmāṇye cāsya śailyā yūpakriyā'yāthārthyāt iti . tataścānagnihotratvaprasaṅgād yadagnaye hotraṃ tadagnihotramiti tāvanmātrārthatvāt pradhānasya svargasādhanatābhimatasyānagnihotratvād ghṛtena juhuyāt ityanenānuvādena pradhānasvargakāmānabhisambaddhajuhotyarthānuvādena kiṃ prayojanam ? itikartavyatākartavyatayā pradhānena svargakāmena vinā kiṃ tayā ? yathoktam— kātarasateṇa sūraṃ sūrasahasseṇa paṃḍitaṃ bharasu . alasaṃ jeṇa va teṇa va ṇavara katagghaṃ pariharāhi .. iti pradhānārthamapradhānatyāgadarśanāt . - [Previous: 2.63](https://indike.org/pramana/in.jaina.post.dvadasaranayacakra!simhasuri.2.63) - [Next: 2.65](https://indike.org/pramana/in.jaina.post.dvadasaranayacakra!simhasuri.2.65) - [Up: 2](https://indike.org/pramana/in.jaina.post.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.172) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.2.64](https://indike.org/pramana/in.jaina.post.dvadasaranayacakra!simhasuri.2.64) · Pramāṇa