[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 2.82 # Dvadasharanayacakra 2.82 Nyāyāgamānusāriṇī 2.82 - **Language:** Sanskrit ### [2.82](https://indike.org/pramana/in.jaina.post.dvadasaranayacakra!simhasuri.2.82) yadi bhavanmatena kāryakhapuṣpayorasattvameva tulyaṃ tulye vā'sattve viśeṣo vaktavyaḥ--asmād viśeṣahetoḥ kāryamasattve satyapi prādurbhavati na tu khapuṣpamiti . nocyate ced viśeṣahetuḥ, aviśeṣo'nayoḥ . aviśeṣe ca vailakṣaṇyānupapattiḥ khapuṣpakharaviṣāṇayorivāsatoḥ, dṛṣṭaṃ ca vailakṣaṇyamāyatyāṃ prādurbhāvāprādurbhāvābhyām, tattu aviśeṣe tayornopapadyate . tasmāddhetoraviśeṣe vailakṣaṇyānupapatterghaṭaghaṭasvātmavat, yathā ghaṭa eva ghaṭasvātmeti tayorna vailakṣaṇyamaviśiṣṭatvādevamaviśeṣaḥ syāt, na tu bhavati dṛṣṭatvāduktatvāccāvirbhāvānāvirbhāvayoḥ . tasmāt tayoryathāsaṅkhyaṃ sattvamasattvaṃ cāvaśyameṣitavyam . itara āha--naivāstyaviśeṣo'sato'pi, vat . viśeṣonnayane'pi tu viśeṣasya sadāśrayatvāt sattvaṃ ghaṭavaditi sāmānyameva . athaitat sāmyamubhayāsattvānmā bhūdityanyatarāsattvaṃ kāryasattvābhyupagamaparihāreṇa kāryamevāsaditi, atra kāryasamīpa evakāra ityanyatra pratiyoginyasattve niyamaḥ--asattvaṃ kārye eva nānyatrāpīti . tataśca na khapuṣpamasat . tathā ca sato- yasmāccaturvidho'sanniṣyate prākpradhvaṃsetaretarātyantābhāvākhyo ghaṭasya mṛtpiṇḍādikapālādipaṭādikharaviṣāṇādivaditi . atrocyate --viśeṣonnayane'pi tu viśeṣasya sadāśrayatvāt sattvaṃ ghaṭavaditi . apiśabdo'nabhyupagamaṃ darśayati, naivābhāvasya kharaviṣāṇavandhyāsutādeḥ parasparato viśeṣo'styavastutvāt tvanmatenaiva, asmanmatena tu vastutvamabhāvasyāpi kasyacit prameyatvasāmānyaviśeṣavattvādihetubhyastvadabhyupagatebhyaḥ pramāṇavat . atastvanmatenaivābhāvasya bhāvād viśeṣaḥ paramārthato nāsti . abhyupetyāpi brūmaḥ--viśeṣonnayane'pi tu yena kenacit prakāreṇa sadāśrayo'sāvabhāvastvatparikalpitaścaturvidho'pi viśeṣatvād rūpādivad ghaṭavat . tataśca viśeṣasya sadāśrayatvāt sattvaṃ ghaṭavat, yathā ghaṭaḥ santaṃ pṛthivyādyarthamāśritya vartamānaḥ sanneva svameva vātmānamāśritya vṛtteḥ sannevaṃ viśeṣo'pi sadāśrayatvāt sanniti . itiśabdo hetudṛṣṭāntadārṣṭāntikopasaṃhāre, itthaṃ bhāvābhāvayoḥ sāmānyameva, na viśeṣa iti . evaṃ tāvat kāryakhapuṣpayorubhayorasattvameva veti sāmyamāpāditam . - [Previous: 2.81](https://indike.org/pramana/in.jaina.post.dvadasaranayacakra!simhasuri.2.81) - [Next: 2.83](https://indike.org/pramana/in.jaina.post.dvadasaranayacakra!simhasuri.2.83) - [Up: 2](https://indike.org/pramana/in.jaina.post.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.186) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.2.82](https://indike.org/pramana/in.jaina.post.dvadasaranayacakra!simhasuri.2.82) · Pramāṇa