[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 2.93 # Dvadasharanayacakra 2.93 Nyāyāgamānusāriṇī 2.93 - **Language:** Sanskrit ### [2.93](https://indike.org/pramana/in.jaina.post.dvadasaranayacakra!simhasuri.2.93) atrocyate --na, asiddhatvāt . naitadupapadyate'smatpakṣasādhanavat tvatpakṣasādhanam, kiṃ kāraṇam ? asarvatvādihetūnāmasiddhatvāt, yasmādasmākaṃ sarvameva anuvṛttireva kāraṇameva upādānameva buddhisiddhameva sarvasmādanyatvāt . tasmāt sarvasyāpyasarvatvāt sarvatvaikatvabhaṅgacatuṣṭayābhāvaḥ . tathānuvṛttyādyabhāvaśca tata eva nāsti . svoktavirodhādi ca . yadi kāryaṃ kathamasat ? athāsat kathaṃ kāryam ? mṛdeva hi ghaṭaḥ kriyate ghaṭatayā vyajyate dīpeneva kriyayā . tathā ca viśeṣaṇaviśeṣyāprasiddhirapi . itīṣṭaṃ tasmādasarvatvāderasiddhatvāt tadvikalpābhāvāt tadasamarthavikalpatvāsiddhiḥ . tataḥ kāraṇāt kāryamanyadityetanna sidhyatīti . tatrāsarvatvāsiddhau pratipāditāyāṃ vyāvṛttyādīnāmapyasiddhirāpāditaiva bhaviṣyatītyasarvatvābhāvamevāpādayitumāha --yadi hi ghaṭo'sarvakāryatvābhimato mṛtpiṇḍāt sattvābhimatādanya itīṣyate tadvadeva ghaṭavadeva kāryavadeva piṇḍāderapyasarvatvaṃ viprakṛṣṭasyāpi, kimuta sannikṛṣṭasya śivakādeḥ ? sarvasmādanyatvād ghaṭavat . tasmādekaikasyāsarvatvavat sarvasyāpyasarvatvāt sarvatvābhāva iti sarvatvaikatvabhaṅgacatuṣṭayābhāvaḥ . tadasamarthavikalpatvamapyata eva nāsti . tathānuvṛttyādyabhāvaśca tata eva nāsti, yathaikasya ghaṭasya mṛdanuvṛttyabhāvastathā sarvaghaṭeṣu tathā śivakādiṣvapyabhāva ityanuvṛttyabhāvādanuvṛttivyāvṛttikṛtavikalpābhāvaśca . evaṃ kāraṇopādānabuddhisiddhasāmānyaiḥ sapratipakṣairvikalpacatuṣṭayāsiddhistadasamarthavikalpāsiddhiścāpādanīyā . tataḥ kāraṇādanyat kāryamityetanna sidhyati . - [Previous: 2.92](https://indike.org/pramana/in.jaina.post.dvadasaranayacakra!simhasuri.2.92) - [Next: 2.94](https://indike.org/pramana/in.jaina.post.dvadasaranayacakra!simhasuri.2.94) - [Up: 2](https://indike.org/pramana/in.jaina.post.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.193) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.2.93](https://indike.org/pramana/in.jaina.post.dvadasaranayacakra!simhasuri.2.93) · Pramāṇa