[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 3.112 # Dvadasharanayacakra 3.112 Nyāyāgamānusāriṇī 3.112 - **Language:** Sanskrit ### [3.112](https://indike.org/pramana/in.jaina.post.dvadasaranayacakra!simhasuri.3.112) atrocyate--naitadupapadyate, bahuvrīherapyanyapadārthaviṣayatvānaikāntyāt, evamapītyādi yāvaddharmadharmisvarūpavirodhāviti . sthūlaṃ śiro'sya sthūlaśirā rāhuḥ, kapo'tantratvād bahuvrīhereva tantratvāt, tasya cānyapadārthatvavyabhicāraṃ darśayati tadguṇasaṃvijñānapakṣāśrayaṇena, bhavati bahuvrīhau tadguṇasaṃvijñānamapi pā॰ ma॰ bhā॰ 2 . 1 . 662 . 1 . 69, 2 . 2 . 24 iti vacanāt, na hi sthūlaśirolakṣitastadvyatirikto rāhurasti citragavaviśiṣṭadevadattavat, tadeva hi sthūlaṃ śiro rāhuḥ, tadvadasata ākhyā rāhoḥ śirovyatiriktasya . ākhyā vyapadeśaḥ sthūlena śirasā vyapadeśena citrābhiriva vyapadeśino devadattasya vyatiriktasya, tadvadavyatiriktasyāpi rāhostayākhyayā vyapadeśivadbhāvaṃ kṛtvā vyavahāro dṛṣṭo'sato'pi tathedamapi syāt . tasya vyapadeśivadbhāvavyavahārasyānabhyupagame uktopapattyā dṛṣṭamimasadākhyayā vyapadeśivadbhāvavyavahāramanabhyupagacchataste dharmadharmisvarūpavirodhau doṣau bhavataḥ . dharmisvarūpavirodhastāvadātmano'nanyadeva duḥkhaṃ puruṣādityarthaḥ . prasādādyanātmakatvāt, bahuvrīhisāmarthyāt prasādādyātmano'nyatvādityarthaḥ . ātmasvatattvavat, puruṣasvātmavadityarthaḥ . puruṣatvāpattiśca duḥkhasya dharmisvarūpavaiparītyam, ato dharmisvarūpavirodhaḥ . kiṃ kāraṇam ? anyathā sukhānyatvaprasādādyanātmakatvānupapatteḥ, puruṣatvāpattimantareṇa sukhasya duḥkhādanyatvaṃ varaṇādyanātmakatvaṃ puruṣayorapyekataiva . evaṃ duḥkhamohayorapi . atha mā bhūdeṣa doṣa ityanātmaviśeṣaṇatvāt tadvattvadvat, tathā sati yathā kim ? dṛṣṭāntaḥ idaṃ tat iti nidarśayituṃ na śakyate . na hi sukhādanyadasti kiñciduktavadapuruṣam . yacca sukhādananyat tadanātmatve na prasādādyanātmakaṃ na laghvādyanātmakaṃ ceti nidarśayituṃ na śakyate . duḥkhasya vā sukhādanyatvaṃ prasādādyanātmakatvaṃ mohasya tābhyāmanyatvaṃ prasādādiśoṣādyanātmakatvaṃ ca nopapadyate bhāvitanyāyatvāt sukhaduḥkhamohānāmaikyavṛttitvasya . tasmāt puruṣasvarūpāpatteḥ prasādādiśoṣādivaraṇādikāryāṇāṃ sukhaduḥkhamohānāṃ dharmisvarūpaviparītateti . kiñcānyat, yo'pi dharmasvarūpavirodhaḥ so'pītthamucyate, tadyathā --dharmasvarūpavirodho'pi caivameva, yathā puruṣatvāpattau sukhādīnāṃ sukhādyātmaparityāgena dharmisvarūpavirodhaḥ tathā pauṃsnāpattau trayāṇāmaikyāpattau cānyadharmasvarūpavirodhaśca . tataśca prakṛtipuruṣayorapyekataiva, tasmāddhetoḥ puruṣatvāpatterananyatvāpatteśca prakṛtiḥ puruṣādanyā pumān vā prakṛteranya iti nopapadyate . tato'smadabhīṣṭam ekameva kāraṇam ityetad darśanaṃ sādhīyaḥ . evaṃ duḥkhamohayorapi, yathā sukhaṃ duḥkhādanyat ityetat kiṃ tvānmātrāt ? trailakṣaṇyāt ? ityataḥ prabhṛti yāvat prakṛtipuruṣayorapyekataiva ityuktaṃ tathā duḥkhaṃ sukhamohābhyāmanyat, mohaḥ sukhaduḥkhābhyāmanyaḥ ityeteṣvapi caturṣu sukhaṃ mohādanyat iti ca sādhane sa eva grantho yojya iti . - [Previous: 3.111](https://indike.org/pramana/in.jaina.post.dvadasaranayacakra!simhasuri.3.111) - [Next: 3.113](https://indike.org/pramana/in.jaina.post.dvadasaranayacakra!simhasuri.3.113) - [Up: 3](https://indike.org/pramana/in.jaina.post.dvadasaranayacakra!simhasuri.3) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.355) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.3.112](https://indike.org/pramana/in.jaina.post.dvadasaranayacakra!simhasuri.3.112) · Pramāṇa