[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 3.131 # Dvadasharanayacakra 3.131 Nyāyāgamānusāriṇī 3.131 - **Language:** Sanskrit ### [3.131](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.3.131) anyaḥ punarityādi . na sarvasarvātmakatvaparigraho nyāyyaḥ, anyathā bhavanadvaitaparigrahād vidhyubhayanayaikāntopapatteḥ . tatra bhavati bhāvadvaitam, bhavato bhāvasya bhāvyabhavitṛtvābhyāṃ bhedābhyāṃ bhāvopapattiḥ ityetat pratipādayiṣyate . na tvevaṃ yathānantaradūṣitaṃ sannidhyāpattibhavanadvaitam . tatra tāvad yaḥ sannidhirna hi sa sannidhimātravṛttirasti, kutaḥ ? anāpannatvāt, āpattiranāvirbhūtasyāvirbhāvaḥ, tata āha --anāvirbhūtatvāt, anāvirbhavanamapravartanam, apravartanaṃ cāniyamaḥ . athavā āpattirvipariṇāmo bhāvāntareṇopalabdhiḥ, āvirbhāvo vyaktiḥ, pravṛttiḥ santataḥ pariṇāmaprabandhaḥ, niyatasvarūpatvamavigatadravyārthabhāvasthitiḥ, ebhyo viparyayo'nāpannatvādiḥ, tebhyo hetubhyo'nāpannatvādisvarūpebhyo nāsti vandhyāputravat sannidhiḥ . ādigrahaṇādapravṛtteravyakteraniyaterityādibhyaḥ . ataḥ sannidherasatparyāyatvāt sannidhibhavanābhāvaḥ . nanūktam --astibhavatyādiṣu asti-vartatī sannidhivācinau, bhavati-vidyatī sāmānyabhavanavācinau, padyatirāpattibhavanavācī iti, satyamuktam, ayuktaṃ tūktam, astyādīnāṃ sannipātaṣaṣṭhānāṃ sattārthavācitvāt sarve'pyamī sattārthamevāviśeṣeṇa bruvate . sā ca sattā padyati-vartatyekārthaivetyata āha --padyati-vartatyarthapravṛttatvādeva sattāyāḥ . syānmatam--sadviśeṣadravya-guṇa-karmavad vartatipadyatyorupādānaṃ sattāviśeṣatveneti . etaccāyuktam, yasmād na hi dravyādisadbhedetyādi yāvadupādānamiti gatārtham . kiṃ tarhyupādānam ? ucyate--astyāditulyārthatvena . kuto jñāyate iti cet, sattārthā ityaviśeṣeṇa vacanāt, asti-bhavati-vidyati-padyati-vartatayaḥ sannipātaṣaṣṭhāḥ sattārthāḥ ityaviśeṣeṇoktatvāt siddhasenasūriṇā . - [Previous: 3.130](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.3.130) - [Next: 3.132](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.3.132) - [Up: 3](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.3) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.361) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.3.131](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.3.131) · Pramāṇa