[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 3.45 # Dvadasharanayacakra 3.45 Nyāyāgamānusāriṇī 3.45 - **Language:** Sanskrit ### [3.45](https://indike.org/pramana/in.jaina.post.dvadasaranayacakra!simhasuri.3.45) evaṃ tvityādi . nānayoḥ satvarajasoritaretarānugrāhitā utthāpyasāhāyakaśaktitvāt, sahāyabhāvaḥ sāhāyakam, tasmiṃstena tadeva vā śaktiḥ, sā utthāpyā yayostadānīmeva te vastunī utthāpyasāhāyakaśaktinī, tadbhāvādutthāpyasāhāyakaśaktitvād vātāhatanaudvayavat, yathā jale'nyonyābaddhe dve nāvau netaretaratrāṇāya tathā sattvarajasī . śibikāvāhakavaditaretarānugrāhitā kiṃ na bhavediti cet, na, utthāpyaviśeṣaṇāt, ayameva hi dṛṣṭānto glānaśibikāvāhakavat, yathā glāno'nutthāpito na śaknoti voḍhumutthāpyasāhāyakaśaktitvāt tathānutthāpite sattvarajasī na śaknutaḥ parasparaṃ pravartayituṃ svayamalabdhātmake iti prakarṣavṛtterabhāvaḥ, prakarṣavṛttyabhāvādasampūrṇaśaktitetyata āha --asampūrṇaśaktitā vā'prakarṣa iti itthaṃ kāraṇataiva na syāt tasya sattvasya asampūrṇaśaktitvādupahatabījavat, yathopahataṃ bījamasampūrṇāṅkurotpādanaśaktitvānna kāraṇamevaṃ sattvamapi syāt . abhyupetyāpi kāraṇatvaṃ sāmyāvasthāyāṃ sattvasya asadakaraṇāditaścānyato na tatsvarūpavyaktiḥ, tasya sattvasya prakāśanasvarūpaprakarṣo'nyato rajastamasoḥ puruṣato'nyato'nyato vā kutaścinna bhavati asadakaraṇādibhyo hetubhyaḥ, tadyathā --asadakaraṇād yathā mṛdi sadeva kāryaṃ ghaṭādi kriyate na khapuṣpādi, sa ca mṛdaḥ svātmaniyato ghaṭātmasvarūpavyaktiprakarṣo nānyataḥ puruṣādestantvādervāpattikāraṇād bhavati, kiṃ tarhi ? svata eva bhavati, tathā sattvasvarūpavyaktiprakarṣo nānyato bhavati, kiṃ tarhi ? svata eva . evam upādānagrahaṇāt sarvasambhavābhāvāt . śaktasya śakyakaraṇāt kāraṇabhāvācca sat kāryam sāṅkhyakā॰ 9 ityetebhyo hetubhyaḥ sattvaguṇo'nyanirapekṣasvarūpavyaktiprakarṣa iti grāhyam . evaṃ sattvasya prakāśanaṃ tamasā saha yojyaṃ rajasaśca pravartanamiti . - [Previous: 3.44](https://indike.org/pramana/in.jaina.post.dvadasaranayacakra!simhasuri.3.44) - [Next: 3.46](https://indike.org/pramana/in.jaina.post.dvadasaranayacakra!simhasuri.3.46) - [Up: 3](https://indike.org/pramana/in.jaina.post.dvadasaranayacakra!simhasuri.3) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.3.12) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.3.45](https://indike.org/pramana/in.jaina.post.dvadasaranayacakra!simhasuri.3.45) · Pramāṇa