[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 3.64 # Dvadasharanayacakra 3.64 Nyāyāgamānusāriṇī 3.64 - **Language:** Sanskrit ### [3.64](https://indike.org/pramana/in.jaina.post.dvadasaranayacakra!simhasuri.3.64) itara āha --asādhanamidaṃ sarvatulyatvāt prasiddhiviruddhasiddhyatiprasaṅgāt, prasiddhiviruddhānāmapyarthānāṃ siddhirevaṃ sati prasajyate, arthāntaradharmanivṛttyā tadātmatvāpādanāt, tadyathā --śakyate hi vaktuṃ ghaṭaḥ kaṭādananyaḥ, tantvanātmakatvāt, yastantvanātmakaḥ sa kaṭādananyaḥ, yathā kaṭasvātmā, yaḥ kaṭādanyaḥ sa tantvanātmako na bhavati yathā paṭa iti vaidharmyeṇa paṭavadityuktam . ācārya āha --atha sarvatulyatā kathaṃ doṣaḥ, svamatena paramatena ? iti praśnaḥ ubhayathāpyadoṣaḥ iti manyamānasya . yadi te svasminneva mate doṣastatastava prasiddhivirodhadoṣāsaktirmamābhimataiva tvatprativādino mama tu sarvānanyatvāpādanamabhimatameva bhāvapakṣavat, yathā bhāvavidhividhinayamate'nantarātīte sarvānanyatvamiṣṭam, etasyodāharaṇamātratvādutkrameṇa svabhāvakālaniyatipuruṣapakṣavacca vakṣyamāṇavidhiniyamavacca yathāsvamabhimatā eva . evaṃ tāvat paravādyabhiprāyavaśāt tvanmate doṣāsaktiriṣṭā . na kevalaṃ parābhimatereva, kiṃ tarhi ? api ca svamate'pi sarvānanyatvam, sukhādyanvayamātratvāt sarvasya nanu ghaṭaḥ kaṭādananyaḥ, sukhaduḥkhamohānvitametad bāhyādhyātmikabhedarūpaṃ jagadicchataste traiguṇyajātyanucchedena sarvaṃ sarvātmakameva traiguṇyānvayānatirekāt ko hi sattvādyatiriktaḥ ? yadi sattvarajastamotiriktaṃ kiñcit syāt sarvasarvātmakavāde doṣaḥ syāt, na tvasti, tasmāt tavaivādoṣaḥ . - [Previous: 3.63](https://indike.org/pramana/in.jaina.post.dvadasaranayacakra!simhasuri.3.63) - [Next: 3.65](https://indike.org/pramana/in.jaina.post.dvadasaranayacakra!simhasuri.3.65) - [Up: 3](https://indike.org/pramana/in.jaina.post.dvadasaranayacakra!simhasuri.3) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.3.15) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.3.64](https://indike.org/pramana/in.jaina.post.dvadasaranayacakra!simhasuri.3.64) · Pramāṇa