[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 3.73 # Dvadasharanayacakra 3.73 Nyāyāgamānusāriṇī 3.73 - **Language:** Sanskrit ### [3.73](https://indike.org/pramana/in.jaina.post.dvadasaranayacakra!simhasuri.3.73) evaṃ ca nauvat tama evāpadyate . evaṃ ca sattvasyaivoktavidhinā niyāmakatvād nausthānīyaṃ niyamyaṃ tama eva syāt, na niyāmakam . lambanapāṣāṇasthānīyaṃ sattvameva niyāmakam, na niyamyaṃ syāt . kiṃ kāraṇam ? tathā prakāśasya niyamyatvāt, yasmāt tenoktaprakāreṇa prakāśena niyamyatvaṃ mohasya tasmāt tamasaḥ sattvena niyamyatvādityarthaḥ . tasmāt prakāśāprakāśite tamaso niyatyabhāvāt tamasaḥ prakāśena tathā niyamyatvāt tadātmana eva tathāniyatatvāditi sādhūktam . evaṃ tāvat sattvatamasorbhedamabhyupetya viparyayāpattyā niyamyaniyāmakatvādityasya hetorasiddhiruktā . naiva vā sattvavyatiriktaṃ tamo'bhyupema ityata āha --tathāprakāśānatiriktatattvarūpatvād vā niyamasya śabdaprakāreṇā'rūpādiprakāreṇa ca yaḥ prakāśastadanatiriktatattvarūpatvānniyamasyābhivyakteḥ kuto'naulambanapāṣāṇabhedasādharmyam ? na nauranauḥ, kaḥ ? lambanapāṣāṇaḥ, tasya nāvo bhedaḥ, tatsādharmyamanaulambanapāṣāṇabhedasādharmyam, tattu kutaḥ sattvatamasorbhedasādharmyam ? bhedābhāvādityarthaḥ . tato dṛṣṭāntadārṣṭāntikayoḥ sādharmyābhāvādayuktamiti vaiṣamyaṃ darśayati --bhede sati lambanapāṣāṇo nauvilakṣaṇo nāvaṃ pravartamānāṃ niruṇaddhīti yujyate . na tu tathāprakāśātiriktatattvarūpo moho niyāmako'sti etayoḥ śabdādyāvirbhāvamātraphalatvāt, ato na yujyate . - [Previous: 3.72](https://indike.org/pramana/in.jaina.post.dvadasaranayacakra!simhasuri.3.72) - [Next: 3.74](https://indike.org/pramana/in.jaina.post.dvadasaranayacakra!simhasuri.3.74) - [Up: 3](https://indike.org/pramana/in.jaina.post.dvadasaranayacakra!simhasuri.3) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.329) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.3.73](https://indike.org/pramana/in.jaina.post.dvadasaranayacakra!simhasuri.3.73) · Pramāṇa