Dvadasharanayacakra 3.93
Nyāyāgamānusāriṇī 3.93
- Language
- Sanskrit
3.93.1
idānīṃ phalābhedānnaiva bheda iti pratipādayiṣyannāha --sattvasattvenaiva sattvasattvaṃ prakāśyate, trayāṇāmapi sattvarūpatvasyāpāditatvāt sattvasattvaṃ rajaḥsattvaṃ tamaḥsattvamiti bhidyate, tasyābhedaḥ phalābhedādāpādyate'dhunā . yat tat sattvaṃ sattvameva bhavati nānyad bhavati rajastamo vā tat sattvasattvaṃ tena sattvasattvenaiva prakāśyate vyajyate tadeva sattvasattvasyaiva bhavanaṃ vyajyate sphuṭīkriyate, pūrvavat kartṛkarmabhāvo'vasthāvaśāt . taddarśayati --vyaktipariṇāmena, mṛtsattve yad vidyamānaṃ sattvasattvaṃ ghaṭaprakāśasattvaṃ tenaiva tad vyajyate bhavati, sato hi bhāvaḥ sattvam . rajaḥsattvena sattvasattvam, vyaktirvyaktipravṛttipariṇatyā vyaktyaivetyuktaṃ bhavati . tamaḥsattvena sattvasattvam, vyaktirvyaktiniyamapariṇāmena vyaktyaivetyuktaṃ bhavati . evameva ca rajaḥsattvaṃ tamaḥsattvaṃ ca . evameva ca sattvaprakāśena sattvaprakāśaḥ prakāśyate rajaḥprakāśastamaḥprakāśaśca rajaḥprakāśena svapariṇāmena, sadeva hi sattvena pariṇamati nāsat, yathoktam --atthittaṃ atthitte pariṇamati bhagavatīsū॰ 1 . 3 . 32 iti . yaduktaṃ bhavati vyaktībhavati iti taduktaṃ bhavati sattvasattvena sattvasattvaṃ prakāśyate iti . sattvasattvam iti ca viśeṣaṇaṃ rajaḥsattvatamaḥsattvābhyām, tayorapi tvanmataprasiddhyā satyapi bhede'smaduktavadabheda evetyabhinnaphalatvādaikyamāpādyam . kiṃ kāraṇam ? yasmāt sato hi bhāvaḥ sattvam, yasmāt sadeva sad bhavati tasmāt tadeva sattvasattvaṃ tattvaṃ tadbhāvaḥ pariṇāma ityanarthāntaram, tadbhāvaḥ pariṇāmaḥ tattvārtha॰ 5 . 41 iti vacanāt .
3.93.2
taddhi pravartamānaṃ na kiñcidapekṣata iti pravṛttiniyamānapekṣeṇa sattvasattveneti . evaṃ rajaḥsattvena sattvasattvaṃ prakāśyata iti vartate . pūrvavad vyaktiriti prakāśaikārthyam, kimuktaṃ bhavati ? vyaktipravṛttipariṇatyā prakāśanapravartanapariṇāmena tayaiva pravṛttyātmikayā vyaktyaivetyuktaṃ bhavatītyaikyaṃ darśayati . evaṃ tamaḥsattvenetyādi vyaktiniyamapariṇāmena ityakṣaraviparyāsamātreṇa bhedādarthaikyāpādanaṃ gatārthaṃ yāvad vyaktyaivetyuktaṃ bhavatīti, sattvenaiva vyaktyātmanā pravṛttena niyatenāvaśyaṃ bhavitavyam, anyathā tatsvarūpābhāvādityuktatvāt . evameva ca rajaḥsattvena sattvasattvaṃ prakāśyate, vyaktirvyaktipravṛttipariṇatyā pravṛttyaivetyuktaṃ bhavati, sato hi bhāvaḥ sattvam . tathā rajaḥsattvena rajaḥsattvaṃ prakāśyate, vyaktipravṛttipariṇatirvyaktipravṛttipariṇatyā pravṛttyaivetyuktaṃ bhavatīti tathaiva gamanīyam . tathā rajaḥsattvena tamaḥsattvaṃ prakāśyate, vyaktiniyatipariṇatirvyaktipravṛttipariṇatyā pravṛttyaivetyuktaṃ bhavatīti . tathā tamaḥsattvena sattvasattvaṃ prakāśyate vyaktiniyatipariṇatyā niyamenevetiniyamenaiveti, niyato hi bhāvo vyajyate pravartate . tathā tamaḥsattvena rajaḥsattvaṃ prakāśyate, vyaktipravṛttiniyatirniyatipravṛttipariṇatyā niyatyaivetyuktaṃ bhavati . tathā tamaḥsattvena tamaḥsattvaṃ prakāśyate vyaktiniyatipariṇatyā niyatyaivetyuktaṃ bhavatīti tadeva bhāvitam .
3.93.3
evameva cetyādi, yathā sattvarajastamasāṃ navadhā vikalpā uktāstathā sattvaprakāśena sattvaprakāśaḥ prakāśyata iti sattvaprakāśena rajaḥprakāśastamaḥprakāśaśceti trayaḥ rajaḥprakāśena sattvaprakāśo rajaḥprakāśastamaḥprakāśaśceti trayaḥ tamaḥprakāśena sattvaprakāśo rajaḥprakāśastamaḥprakāśa iti trayo vikalpāḥ, prakāśyate pravartyate niyamyate ityanenaiva sattvaprakāśo rajaḥprakāśastamaḥprakāśaśca tamaḥprakāśena sattvaprakāśo rajaḥprakāśastamaḥprakāśaśca prakāśyate pravartyate niyamyate iti trayo'pyarthā aikyamāpādanīyāḥ . sarvāpyeṣā mṛdghaṭavyaktisthūlateva sattvaprakāśādiprapañcā vyaktirekaiva ekārthaviṣayeti . tathā yaducyate--rajaḥ śabdakāryam... ... ...prakāśasthāne pravṛttiṃ kṛtvā... ...vāyum . tathā tamaḥ śabdakāryam... ... ...lambanapāṣāṇam . atastrīṇyapyekam, apṛthagbhūtasamavasthānasvarūpabhedātmakatvāt, varaṇāditamastvavat . granthena trayo'pyarthā aikyamāpādanīyāḥ, pratyekaṃ navasvapi yojyā ityarthaḥ . eṣa dārṣṭāntiko'pyartho vyākhyātaḥ, sa idānīṃ dṛṣṭāntena sādharmyeṇopasaṃhriyate --sarvāpyeṣā mṛdghaṭavyaktiśaktisthūlateva yathā prāgupavarṇitā kāraṇe kāryasya sattvād mṛdyanabhivyaktāyā ghaṭavyaktiśakteḥ sthūlatā ūrdhvagrīvādivyaktendriyagrāhyatā sā ekaiva tathā sattvaprakāśādiprapañcā vyaktirekaiva, ekārthaviṣayā sattvamiti vā raja iti vā tama iti vā pradhānamiti vā yathecchasi tathāstu sarvathāpyekasya kāraṇākhyasya vastunaḥ sūkṣmasya sthūlataiva vyaktiriti tadviṣayā vyāvarṇyate .
3.93.4
iti vicāraparisamāptyarthaḥ, yat pratijñātaṃ sattvaṃ prakāśātmakayośced rajastamasoḥ śabdabhāvāya vyavatiṣṭhate tata ekātmakaikakāraṇatvamiti tat sādhvabhyadhāmeti .
Linked texts (1)
- Dvādaśāranayacakra — Mallavādin, Sanskrit