[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 4.55 # Dvadasharanayacakra 4.55 Nyāyāgamānusāriṇī 4.55 - **Language:** Sanskrit ### [4.55](https://indike.org/pramana/in.jaina.post.dvadasaranayacakra!simhasuri.4.55) syānmatam--rūpādīnāṃ deśabhedena yugapadavasthāyināṃ rūpaṃ raso gandha ityādayaḥ parasparato deśabhinnā iti gṛhyante . tasya deśasya paramāṇuśo bhede na rūpaṃ raso gandho vopalabhyate, deśasambandhena tūpalabhyamānā bhavanti . deśato'tyantaṃ bhedagrahe teṣāmabhavanam . tathā kṣaṇabhede prathamakṣaṇe'nyad rūpaṃ dvitīyakṣaṇe'nyaditi gṛhyate ced na rūpaṃ nāma kiñcit syāt tanniṣṭhasya kālasya rūpagrahaṇāśrayasambandhābhāvādityabhavanātmakā bhavanātmakatvād nirvastutvāpatteḥ dravyameva tathātathābhavanalakṣaṇaṃ satyaṃ cakṣurādipratyayopayogāpadeśena bhavati bhāgineyādyapadeśaviśiṣṭaikatvasatyapuruṣavat . yaccopayogasvatattvaṃ matyādi tadapi pudgalātmatattvam, rūpādyātmakatvāt, aṇvādivat . upayogalakṣaṇa ātmā rūpādyātmakeṣu pudgaleṣu upayuktaḥ rūpādyātmaka eva, sarvātmanā grāhye upayogamayān mṛtpiṇḍaḥ śivakāditāyāmiva so'cetana eva syāt paṭe'nupayujyamānaghaṭādivat . ātmā pudgalasvatattva eva ātmasvatattvajñānāvaraṇādyudayapravṛttyavyatiriktabhāvāvyatiriktarūpatvācca . rūpādayaḥ syuḥ . ādigrahaṇād bhāvabhedena ekaguṇadviguṇatriguṇakṛṣṇādibhedena agṛhyamāṇatvād viśiṣṭasya sāmānyasyaiva grahaṇāt . tataḥ kim ? abhavanātmakatvād nirvastutvāpattirvandhyāputravat . tataśca nirvastutvāpatteretat pratipattavyam --dravyameva tathātathābhavanalakṣaṇaṃ satyaṃ na rūpādayo nāma keciditi . tathā tatheti rūparasādiprakāreṇa bhavati śyāmaraktatāditadbhedaprakāreṇa ceti satyam, dravyaṃ ca bhavye pā॰ 5 . 3 . 104, dravati bhavatīti . kathaṃ punastad dravyamabhinnaṃ sad rūpādibhedena bhavatīti cet, cakṣurādipratyayopayogāpadeśena bhavati . cakṣurādipratyayā ityadhipatyālambanahetusamanantarapratyayāḥ, te nimittamasyopayogasya jñānadarśanākhyasya sa cakṣurādipratyayopayogaḥ, tadapadeśena rūpādi bhavati jñānāpadeśena cakṣūrūpādipratyayenetyarthaḥ . yathoktam— rūpālokamanaskāracakṣurbhyaḥ sampravartate . vijñānaṃ maṇisūryāṃśugośakṛdbhya ivānalaḥ .. iti . dṛṣṭāntaḥ --bhāgineyādyapadeśaviśiṣṭaikatvasatyapuruṣavat, yathaika eva puruṣo'nekasambandhistrīpuruṣāpekṣāpadeśaviśiṣṭo bhāgineyo mātulo bhrātā patiḥ pitā devaraḥ śvaśuraḥ putro bhrātrīya ityādirbhavati devadatta eka ityeva ca satyastathā dravyamekameva rūpādi bhavati cakṣurādyapadeśāditi sādhūktamekameva sarvātmakamiti . - [Previous: 4.54](https://indike.org/pramana/in.jaina.post.dvadasaranayacakra!simhasuri.4.54) - [Next: 4.56](https://indike.org/pramana/in.jaina.post.dvadasaranayacakra!simhasuri.4.56) - [Up: 4](https://indike.org/pramana/in.jaina.post.dvadasaranayacakra!simhasuri.4) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.410) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.4.55](https://indike.org/pramana/in.jaina.post.dvadasaranayacakra!simhasuri.4.55) · Pramāṇa