[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 4.56 # Dvadasharanayacakra 4.56 Nyāyāgamānusāriṇī 4.56 - **Language:** Sanskrit ### [4.56](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.4.56) evamupayogātmakatvaṃ pudgalasya rūpādiprabhedasyoktam . idānīmupayogasyāpi paudgalātmyamucyate — yaccopayogasvatattvaṃ matyādi tadapi pudgalātmatattvamiti pakṣaḥ . kasmāt ? rūpādyātmakatvāt, aṇvādivat . sa hyupayogalakṣaṇa ātmā paramāṇudvyaṇukatryaṇukādiṣu rūpādyātmakeṣu pudgaleṣu upayujyate kṛtsno vyāpriyate sārvātmyena vyāpta upayuktaḥ samāpta ityarthaḥ, rūpādyātmaka eva, apradeśasaṅkhyeyāsaṅkhyeyānantapradeśapudgalavat tadupayogāt tatpariṇāmāt tadeva taditi pūrvoktanyāyācca . yadyevaṃ rūpādyātmakatvamātmano nābhyupagamyate'saṅkhyātapradeśasyāpi rūpādimadekadravyopayoge tādātmyaṃ grāhye yātīti tato'saṅkhyātapradeśo'pi nanvevaṃ pudgala eva ātmā prāptaḥ, tasyopayogātmanaḥ pudgalatvāt, kuto'sya rūpādyātmakatā ? na, upayogātmakatvādeva rūpādīnāmapyuktavat . anena sarvamapi karmakāraṇaikāntavādimataṃ puruṣakārakāraṇaikāntavādimataṃ ca asambaddhaṃ boddhavyam, itaretarātmakatvāt . sarvātmanā sārvātmyena sarvaiḥ pradeśairgrāhye dravye upayogamayān upayogamagacchan anupayujyamāno'cetana eva paṭānupayujyamānaghaṭādivat syāditi sambhantsyate . kathaṃ punarupayogaṃ yān yāyāt ? mṛtpiṇḍaḥ śivakāditāyāmiva, yathā mṛtpiṇḍaḥ kṛtsnaḥ śivakādibhāve sārvātmyena vyāpāraṃ gacchati tathā yadi na gacchedātmā grāhye tatastādātmyamapratipadyamānaḥ so'cetana eva syāt paṭe'nupayujyamānaghaṭādivaditi yathākramaṃ vaidharmyeṇa sādharmyeṇa ca dṛṣṭāntau . cetano hyupayogalakṣaṇastadabhāvādacetanaḥ syāditi eṣa doṣo rūpādyātmakatvābhāve syādātmana upayogalakṣaṇasya . tasmāt siddhaṃ rūpādyātmakatvamātmana upayogātmakatvāt . ataḥ pudgalasvatattvameva matyādi iti sādhūktam . itaśca ātmā pudgalasvatattva eva, ātmasvatattvetyādi yāvad bhāvāvyatiriktarūpatvācca . ātmanaḥ svatattvamaudayiko bhāvaḥ, udaye bhava audayikaḥ, kasya ? karmaṇo jñānāvaraṇīyāderaṣṭavidhasyāpi, sa ca tadudayapravṛttito'pṛthagbhūto'vyatirikto bhāvaḥ svaṃ tattvamātmanaḥ, tadavyatiriktarūpaścātmā, tasmādātmasvatattvajñānāvaraṇādyudayapravṛttyavyatiriktarūpatvāccātmā pudgalātmatattva eva tādātmyapratipatteḥ rūpādyātmakaparamāṇvādivadityarthaḥ . - [Previous: 4.55](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.4.55) - [Next: 4.57](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.4.57) - [Up: 4](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.4) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.411) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.4.56](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.4.56) · Pramāṇa