[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 4.63 # Dvadasharanayacakra 4.63 Nyāyāgamānusāriṇī 4.63 - **Language:** Sanskrit ### [4.63](https://indike.org/pramana/in.jaina.post.dvadasaranayacakra!simhasuri.4.63) pariṇamanamapi cetyādi yāvat puṣpatug-dṛḍhaphalavat . tasyāpi pūrvakarmaṇaḥ tīvramandādihetūpasevanasañcitasya phaladānamihatyapuruṣakārasya kṛṣyadhyayanasevāvāṇijyādyanuṣṭhānasya viṣayo na ca viṣayaḥ kvaciditi, aprāptaprāptavipariṇāmāvasthatvāt, yathāsaṅkhyaṃ svayamaprāptavipariṇāmāvasthaṃ puruṣakāravipariṇāṇamyaṃ puruṣakāreṇa vipācyate viṣayatvamānīyate udīraṇākaraṇenodīryate, prāptavipariṇāmāvasthaṃ tu vaiyarthyānna viṣayīkriyate puruṣakāreṇa na vipācyate nodīryate svayameva vipakvatvāt . kimiva ? puṣpatugdṛḍhaphalavat, puṣpatokaṃ dṛḍhaphalaṃ ca yathāsaṅkhyaṃ dṛṣṭāntau . yathā dṛḍhaphalaṃ svayameva vipacyamānaṃ na pācyate puruṣakāreṇa, puṣpatokaṃ tu vṛkṣāyurvedavidhinā vipācyate . athavā puṣpatokasyaivotpannasya dṛḍhaṃ phalamasya bhāvīti dṛḍhaphalaṃ tādṛkchaktyaivotpannamiti tasyaiva bhavati tacchaktivirahitasya na bhavatīti tadevāprāptapākakālaṃ kadalakāmrādiphalaṃ kodravapalālādiveṣṭitaṃ nikhātaṃ vā pārśvadhūmādibhirvipācyate, netaradavaśyaṃ vināśīti . athavā aprāptavipariṇāmāvasthaṃ puṣpatokamatimṛdutvādupakrameṇāpi na pācyate pācanāyogyatvāt kuthyati vilīyate vā, dṛḍhaphalaṃ tu pācanayogyaṃ prāptakālatvāt pācyate . - [Previous: 4.62](https://indike.org/pramana/in.jaina.post.dvadasaranayacakra!simhasuri.4.62) - [Next: 4.64](https://indike.org/pramana/in.jaina.post.dvadasaranayacakra!simhasuri.4.64) - [Up: 4](https://indike.org/pramana/in.jaina.post.dvadasaranayacakra!simhasuri.4) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.415) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.4.63](https://indike.org/pramana/in.jaina.post.dvadasaranayacakra!simhasuri.4.63) · Pramāṇa