[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 5.51 # Dvadasharanayacakra 5.51 Nyāyāgamānusāriṇī 5.51 - **Language:** Sanskrit ### [5.51](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.51) syānmatam--virodhino bhāvasya uttarasya sthityādeḥ prādurbhāvād gatervināśaḥ gatervā prādurbhāve sthiteḥ, sa cābhāvo vināśaḥ pākajotpattivaditi . atrocyate--yo'pyabhāvābhimato vināśo virodhibhāvaprādurbhāve hi bhāvāntaranivṛttiritīṣṭaḥ, sa ca bhāvāntarānabhivyaktistasya bhāvāntarasya sthiteranyasya gatyādeḥ gatervānyasya sthityāderbhāva eva nābhāvaḥ, virodhibhāvaprādurbhāvatvādeva . yathā jāgaraṇena svapno nivartyate, kimuktaṃ bhavati ? nivartyate'nabhivyaktiṃ nīyata ityucyate . yathā jāgaraṇena svapno'nabhivyaktiṃ nīyate tathā svapnena jāgaraṇam, jāgrato'pi ca suptavad manda-mandatara-mandatamacaitanyadarśanāt suptasyāpi jāgrata ivābhivyaktavyaktataravyaktatamasvapnadarśanāt tadeva hi caitanyaṃ tīvramandāvaraṇodayakṣayopaśamāpekṣaṃ nidrā-nidrānidrā-pracalā-pracalāpracalādibhedaṃ paṭu-paṭutara-paṭutamendriyādibhedaṃ ca dṛśyate . tasmādekasyaiva vastuno- 'bhivyaktyanabhivyaktikṛte svapnajāgaraṇe, anyataranyaṅgayanenānyatarabhavanāt sarpasphaṭāṭopakuṇḍalakībhavanavat . ata āha --na hi kriyāntaramanyaṅgīyetyādi gatārthaṃ yāvadiha kiñciditi . eṣā dṛṣṭāntavarṇanā . ihāpi ca gatibhavanamityādi gatārthaṃ dārṣṭāntikavarṇanamapi . tasmāt kriyāntaraprādurbhāve pūrvabhāvanivṛttiḥ nābhāva iti . - [Previous: 5.50](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.50) - [Next: 5.52](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.52) - [Up: 5](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.5.12) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.51](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.51) · Pramāṇa