[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 5.53 # Dvadasharanayacakra 5.53 Nyāyāgamānusāriṇī 5.53 - **Language:** Sanskrit ### [5.53](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.53) etadanicchordoṣa ucyate --yadi sthitirnāmetyādi . sthiterbhāvatvānabhyupagame dvayī gatiḥ sthitiśabdasya syāt tṛtīyavikalpābhāvāt--yadvā sthityabhidhānamavastukam ? yadvā dravyamātraviṣayaṃ syāt ? kiñcātaḥ ? idamato bhavati doṣajātam--avastukatve vivakṣāśabdayorapravṛttiprasaṅgaḥ, yadyavastuviṣayaṃ sthitiśabdavacanaṃ vaktumicchā vivakṣā sā svaniścitamarthaṃ paraṃ pratyāyayāmīti jāyate, arthābhāvācca na syāt . tathā ca abhidhīyate'nenetyabhidhānaṃ sthitiśabdaḥ, tasyābhāvaḥ syādarthābhāvāt, kākavāsitādivadanarthakaṃ vā tat syāditi . evaṃ tāvadavastukatve doṣaḥ . atha dravyamātraṃ sthitiḥ dravyasyāvirodhād gatāvapi syāt, yathā devadattasadbhāvād gatyavirodhācca devadatto gacchati ityatra devadattābhidhānaṃ pravartate tathā devadattastiṣṭhati gacchati ca ityetadabhidhānaṃ pravarteta, ubhayatra dravyasyaiva sattvāt viśeṣābhāvācca . evaṃ doṣadarśanād na gatyabhāvamātraṃ sthitiḥ . yatastu khalvityādi, virodhyavirodhibhāvā vācyavastusthitiḥ, gatisthityoḥ parasparavirodhād devadattadravyeṇa sahāvirodhād bhāvāveva gatisthitī dravyavat, grantho gatārtho yāvad bhavanānanyatva eva gativirodhinī sthitiriti . bhavanānanyatva iti dravyabhavanādananyaiva gatiḥ sthitirveti pravṛttibhavanānanyatva eveti yathāprakrāntamupasaṃharati . - [Previous: 5.52](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.52) - [Next: 5.54](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.54) - [Up: 5](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.5.14) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.53](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.53) · Pramāṇa