[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 5.59 # Dvadasharanayacakra 5.59 Nyāyāgamānusāriṇī 5.59 - **Language:** Sanskrit ### [5.59](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.59) kiñcānyat, evaṃ cetyādi . na kevalamastyādaya eva sarvadhātvarthavyāpitvāt sāmānyapravṛttimātratvabhāvanāyāṃ nidarśanam, kiṃ tarhi ? bhujigatisthitipaktyādīnāmapi tathā tathā sarvabhāvavyāpitā, bhuktestāvad bhujerabhyavaharaṇārthasya upayogaparyāyatvāt upayogasyāpattyarthatvāt āpatteḥ pariṇāmārthatvāt pariṇāmasya vṛttisattābhavanārthatvāt . tathā gatirapi sarvabhāvavyāpinī gamana-calana-spandana-pariṇāmādyekārthatvāt, dravati droṣyati dudrāveti druḥ, drorvikāro dravyam, dravyaṃ ca bhavye pā॰ 5 . 3 . 104, dravyaṃ sadaiva gatyātmakaṃ vipariṇāmātmakamityarthaḥ . ārṣe'pi yathā --paramāṇupoggale ṇaṃ bhaṃte ! kiṃ eyati veyati calati phaṃdati khobhati khubhati taṃ taṃ bhāvaṃ pariṇamati ? haṃtā gotamā ! tadeva jāva pariṇamati bhagavatīsū॰ 5 . 7 . 212 iti . sthitirapi tiṣṭhatyāste'sti svarūpaṃ na tyajati pariṇamati tathā tathā bhavatītyarthaḥ . pacati-kṛṣati-likhatyādayaḥ paktyādayaḥ, teṣāmapi paktyādīnāmastyādyaviśeṣaḥ pākasya kriyāphalatvāt kriyāyāśca hetuphalarūpābhinnapariṇatitvāt pacyate pacatyātmānaṃ bījamaṅkurībhavati jāyate'sti vipariṇamati ityādyekārthatvāt . yathā kṛṣi-vilikhatī tathātmanaḥ śirāṃ darśayati tathā tathā sarvabhāvavṛtteḥ kaṇḍūyata ityādyekārtham . syānmatam--astu bhujyādīnāṃ sarvabhāvavyāpitā gatisthitisattāvipariṇāmādyanatikramāt, paṭhi-hasi-vidi-śviti-gaḍyādīnāṃ kathamiti cet, ucyate --bhāṣatijānātiśvetatyādīnāmapi pūrvottaravyaktyavyaktibhavanaikatvāt evaṃ ca tathā tathā yadapyādinaigamanayadarśanamanavabudhya pūrvanayanipāti sthitisvarūpanirūpaṇaṃ kriyate sā tu dravyāvasthāviśeṣo gativat pratipattavyā iti atrāpi yatnaprasādhitakriyārthāntaratvatyāgaḥ avyaktadravyāvasthātvāt . yat tad dravyaṃ tato'nanyā kriyā, tadavasthātvāt, devadattabālakumārādivat . tathā cābhyupagamavirodhaḥ . sarvabhāvavyāpitā iti vartate . bhāṣa vyaktāyāṃ vāci pā॰ dhā॰ 612 jñā avabodhane pā॰ dhā॰ 1508 śvitā varṇe pā॰ dhā॰ 742 gaḍi vadanaikadeśe pā॰ dhā॰ 65, 361 ityevamādīnāṃ pūrvoktapūrvāparībhūtavyaktyavyaktilakṣaṇabhavanaikatvāt . ekameva hi pūrvāparībhūtaṃ bhavanaṃ gatisthityādivat kriyātvādityuktam . tathā bhāṣatyādīnāmapi pūrvāparībhūtaikabhavanavyaktyavyaktilakṣaṇakriyātvānativṛtteḥ sarvabhāvavyāpitaiva . pūrvamabhāṣamāṇo gacchaṃstiṣṭhannudāsīno vā paścād bhāṣate, tathā paśyati jānāti icchati dveṣṭi prayatate smaratītyādiṣu tulyaścarcaḥ . tasmānna kācidapūrvāparībhūtā kriyāsti, kriyātvācca sarvadhātvarthāḥ sarvadhātvarthavyāpinaḥ iti sādhūktam . - [Previous: 5.58](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.58) - [Next: 5.60](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.60) - [Up: 5](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.464) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.59](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.5.59) · Pramāṇa