[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 7.106 # Dvadasharanayacakra 7.106 Nyāyāgamānusāriṇī 7.106 - **Language:** Sanskrit ### [7.106](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.106) atra brūmaḥ --nanu niṣpattirityādi . nanu niṣpatteḥ prāk ityukte'pi niṣpatterutpattyabhūtvābhāvādisamānārthatvādavyaktasad vyaktasad bhavatītyuktaṃ bhavati . tadyathā--anupanilīnasattvaṃ ca tad dravyāditrayaṃ jātamātraṃ sattopanilayanāt prāganiṣpannaṃ sattāsāmānyena sat sattāsamavāyāt sad bhavati vyaktasad bhavatītyeṣo'rtho niṣpattiśabdasyeti . ata āha --niṣpattiśabdo hītyādi . tadvyākhyānam --prabhūtasya prārabdhabhavanasya triprakārā niṣpattiḥ, tadyathā --niyatā niścitā adhikā vā . kā sā ? bhavana te . yathā sattāsambandhādeva dravyādau kārye niyatā niścitā sattvāntarebhyo viviktatvāt sattāyāḥ adhikā punarbhavanāt, evamupādānaniyamasvasattāniyatā taṇḍulavicayavat kriyāyā vyāpāreṇa niścitā yugapadayugapatparyāyakramatathābhūteradhikā niṣpattirihāpi . tasmāt sadasatkriyāguṇatvāt sadasata eva kriyāguṇavyapadeśāḥ . anyathā hetuśaktyupādānānāmabhidhānamātraprasaṅgaḥ, asattvāviśeṣāt . yasya tu vidyamāna evārthaḥ... ... ...eteṣāmarthānāmabhāvādabhidhānamātraprasaṅgaḥ niṣpādyaniṣpādakatvāviśeṣāditi . ataścāyuktaṃ satkāryatvameveti . meva . kasmāt ? padyateḥ sattārthatvāt . sā ca te triprakārāpi tavaiva . tadyathā--sattāsambandhādeva dravyādau kārye niyatā kāraṇasamavāyasya sāmānyasya ca nityatvāt, niścitā dravyatvaguṇatvakarmatvaghaṭatvarūpatvotkṣepaṇādisattvāntarebhyo viviktatvāt sattāyāḥ, adhikā punarbhavanāt kāryasya tvanmatenaiva kāraṇasamavāye janmābhyupagamāt . evaṃ tāvad dṛṣṭāntasya kāryadravyāditrayasya niṣpattistrirūpā vyākhyātā . dārṣṭāntikakāryasyādhunā --upādānaniyamasvasattāniyatā, mṛdādyupādānaniyamena ghaṭādeḥ svasattā vidyate, tayā sattayā niyatā mṛdyeva ghaṭaniṣpatteḥ, tattvato'sau ghaṭatvena niścitā paṭatvādivyāvṛttyā, tadyathā — tandulavicayavat, vicitā niścitāstaṇḍulāḥ kacavarādyapanayanena svarūpaparigraheṇa ca, kriyāyā vyāpāreṇa parispandena aniṣpatteḥ sakāśād niścitā apanītā ghaṭaniṣpattiḥ svarūpaparigraheṇetyarthaḥ . adhikā yugapadayugapatparyāyakramatathābhūteḥ, ye prāg yugapadbhāvino rūpādipṛthubudhnādiparyāyāḥ piṇḍaśivakādayo nava-madhyama-purāṇatādayaścāyugapadbhāvinaḥ teṣāṃ krameṇa śivakādikaraṇavidhinā tathābhūteḥ tena prakāreṇa bhavanādadhikā niṣpattirihāpīti . tasmād dṛṣṭāntabhūtasya dravyāditrayasya kāryasya niṣpattivadavyaktasad vyaktasad bhavatīti samānamupādāne sataḥ kāryasyeti gatamānuṣaṅgikam . sthitaṃ prāguktaṃ sadasattvaṃ kāryasya . - [Previous: 7.105](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.105) - [Next: 7.107](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.107) - [Up: 7](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.577) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.106](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.106) · Pramāṇa