Dvadasharanayacakra 7.134

7.134

athocyetetyādi . vaiśeṣiko daṇḍamapi daṇḍatvād daṇḍavyatiriktād manyate daṇḍābhidhānapratyayabhājam . ācāryo bravīti --anudāharaṇaṃ tarhi daṇḍī, daṇḍād daṇḍyabhāvāt . daṇḍasya svato'siddhatvād daṇḍī na sidhyati, parataḥ sattvasiddhyarthaṃ codāhriyate daṇḍī, daṇḍāsiddheḥ kutastatsiddhiḥ ? iti . cet, itaretarāśrayamidam, daṇḍatvatattvād daṇḍasiddhiḥ, daṇḍaviśeṣaṇasādhitadaṇḍisiddheḥ punardaṇḍatvatattvasiddhiḥ . daṇḍīti ca kathamiti nirdhāryam . yadi daṇḍādeva, svataḥ siddhāt siddha ityuktam . atha daṇḍatvāt, daṇḍatvī bhavatu, mā bhūddaṇḍī, ātmāntarasaṅkāntiścaivam . vayaṃ tu brūmaḥ--svata eva bhavati, tadabhāve'sāmānyātmakatvameva sarvasya syāt . yathā daṇḍe evaṃ satyapi... ... .... yadapyuktam 'atadātmatvād dravyādīnāṃ sadabhidhānapratyayau sattāyogāt, na daṇḍatvopapāditadaṇḍād daṇḍīti cet, daṇḍatvasāmānyaviśeṣād daṇḍaḥ sidhyati, daṇḍād daṇḍīti, tata udāharaṇasiddhirviśeṣaṇādeva viśeṣyasiddheḥ, evaṃ cenmanyase, idamāpatitam--daṇḍatvatattvād daṇḍaḥ sidhyati, daṇḍatvatattvaṃ punardaṇḍaviśeṣaṇasādhitadaṇḍitvasiddheḥ sidhyati, tadidamitaretarāśrayaṃ jāyate, itaretarāśrayāṇi ca na prakalpante, tadyathā naurnāvi baddhā netaratrāṇāyeti tatpratipādanārtho granthaḥ --itaretaretyādirgatārtho yāvat tattvasiddhiriti .