[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 7.151 # Dvadasharanayacakra 7.151 Nyāyāgamānusāriṇī 7.151 - **Language:** Sanskrit ### [7.151](https://indike.org/pramana/in.jaina.post.dvadasaranayacakra!simhasuri.7.151) yattūcyate--avagamyatāṃ tāvadityādi idaṃ tasya doṣaparihāraprāṇasarvasvamanvayavyatirekābhyāmaniyamātiprasaṅgābhāvabhāvanaṃ gatārthaṃ yāvat samavāyaikatve'pyādhārādheyaniyamaḥ syāditi . atrācārya āha — idamapītyādi, svavādenaivottaramārgo vihito'sya vacanasya tvayā ihedam vai॰ sū॰ praśastamati॰ ityādinā samavāyalakṣaṇaṃ vyācakṣāṇena ādhārādheyasambandhajñānalakṣaṇatvāt kāryakāraṇayoścādhārādheyabhāvāt sambandhinoḥ kuṇḍadadhidṛṣṭāntena ca subhāvito'yamarthaḥ, tenaiva vayaṃ brūmaḥ --na tu tathetyādi, na tu tathā saṅkarābhāvo ghaṭate uttaraprakāreṇa, kuṇḍadadhisaṃyogadṛṣṭānte yadi dadhimadhūdakādibhirbahubhirādheyaiḥ kuṇḍādhāraḥ saṃyukto bhavati tataḥ kimiti saṅkaro nāsti ? tathā yadi sarvātmakaḥ samavāyo dravya-guṇa-karma-dravyatva-guṇatva-karmatva-sattādyādhāra eka eva bhavati tadā kimiti saṅkaro na syāt ? nāpi ca dvivṛttitvanivṛttiḥ samavāyasya yataḥ saṃyogād vaidharmyamucyate tvayā dvayordvayoḥ ityādinā . tatra sādhanam--sarvatra tāvad dravyadravyatvādisamavāye dvivṛttitvaṃ tvayaivopavarṇyate, sādhayāmaścaitad dvivṛttitvaṃ sambandhidvayaviśiṣṭābhidhānapratyayatvāt kuṇḍadadhyādisaṃyogavat, yathā kuṇḍadadhnoḥ saṃyoge dadhnā kuṇḍena vā viśiṣṭe tannimittamabhidhānaṃ pratyayaśca dṛśyate dadhikuṇḍaṃ kuṇḍadadhi veti taddvivṛttitvaṃ ca tathā samavāye'pi dravyaguṇayorityādi dvivṛttivarṇanam . tasmāt tvatpūrvapakṣitadoṣāsaṅgastadavasthaḥ samavāyasyetyata āha --tathā cetyādi yāvadanityataiveti gatārtham . - [Previous: 7.150](https://indike.org/pramana/in.jaina.post.dvadasaranayacakra!simhasuri.7.150) - [Next: 7.152](https://indike.org/pramana/in.jaina.post.dvadasaranayacakra!simhasuri.7.152) - [Up: 7](https://indike.org/pramana/in.jaina.post.dvadasaranayacakra!simhasuri.7) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.7.33) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.7.151](https://indike.org/pramana/in.jaina.post.dvadasaranayacakra!simhasuri.7.151) · Pramāṇa