[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 7.67 # Dvadasharanayacakra 7.67 Nyāyāgamānusāriṇī 7.67 - **Language:** Sanskrit ### [7.67](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.67) itara āha --nanvevaṃ tadavyavahṛteḥ prāgabhāvabhedavadabhūtatvameva, yathā tasyotpannamātraghaṭadravyādeḥ prāk kuśūla-kosa-sthāsaka-śivaka-piṇḍa-mṛdavasthābhirabhāvabhedairjalādyāharaṇādivyavahāro nāstīti tatra ghaṭāsattvaṃ tathā tadavyavahṛterabhūtatvameva prāk sattāsambandhāt sadasadātmakasya kāryasya, ko doṣaḥ ? iti . atredaṃ sampradhāryam --atha yadetadabhūtatvamityādi vikalpadvayopanyāsena praśno gatārthaḥ . tatrottaram --yadi bhūtasya dravyāderutpannamātrasyāvyavahārādabhūtatvamiṣyate tadeva bhūtaṃ vastvātmanā tadeva cābhūtamavyavahārātmanetyataḥ sattvāsattvāvirodhiteti sadasadaikātmyopapattireva . athābhyupagamaviruddhamaikātmyaṃ mā bhūditi abhūtatvamiṣyate tato dravyāderabhāvaheturvācyaḥ kāryasya, kena hetunā tadabhūtaṃ kāryaṃ svakāraṇeṣu samavetamutpannamātramasmaduktāvirodhahetuṃ avyavahārayogyatvāt sadapyasat ityetaṃ muktvā ? syānmatam--ahetuta evābhūtaṃ tadabhāve kāraṇābhāvāt khapuṣpādivaditi . etaccāyuktam, yasmāt ahetuto'bhavane niṣkāraṇato'sattve kṣaṇikaśūnyatādivyutpattivadabhāva eva syāt iti vākyaśeṣaḥ . yathā pūrvavastuni niruddhe paścāduttaramutpadyamānaṃ nirhetukamiti prāptaṃ kṣaṇikavāditvam, tasyāpyutpannasyāhetuta eva vināśāśaṃsanāt . taccādravyatvād nirbījatvāt khapuṣpavadatyantābhāvaḥ syāt tathedamapi syāt, aniṣṭaṃ caitat . yathā vā'siddhyayuktyanutpattisāmagrīdarśanādarśanādivyutpattyā sarvaṃ śūnyaṃ nirhetukotpattisthitivināśābhāvasādharmyāt khapuṣpavat syāt . ādigrahaṇāt pratītyotpādasamudāyasantānādisaṃvṛtivyutpattivat . na cet pūrvavaditi, mā bhūdeṣo'tyantābhāvadoṣa iti sahetukakāryābhūtatvābhyupagame'smaduktasadasadaikātmyopapattireva prāpnoti . evaṃ tāvat prāk sattāsambandhāt sadasat kāryamiti pratipāditam . - [Previous: 7.66](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.66) - [Next: 7.68](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.68) - [Up: 7](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.555) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.67](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.7.67) · Pramāṇa