[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 8.105 # Dvadasharanayacakra 8.105 Nyāyāgamānusāriṇī 8.105 - **Language:** Sanskrit ### [8.105](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.8.105) athavetyādi ṣaṣṭhīsamāse'pi darśayitumāha . sthāpanāyā nikṣepa iti samāsaḥ karmaṇi ṣaṣṭhīṃ kṛtvā . kiṃ karma ? sthāpanaiva . kā sā sthāpanā ? ākāraḥ . ko'sāvākāraḥ ? vastvātmā . sa eva nikṣipyate, kva ? svātmani . kaḥ ? ghaṭādiḥ . kena ? kumbhakārādibhiriti vyākhyātaḥ ṣaṣṭhīsamāsārtho'pi vastutaḥ prastute vyāpakatvapradarśanārthamāha --mumukṣubhirātmā svātmani nikṣipyate iti vartate, kīdṛśa iti cet, karmāmiśraḥ sthāpyate svākāre'viviktaḥ san viviktarūpatvena . tathendro'pī nindrayorvivekamajānatāṃ puṃsāṃ sākṣāt pradarśyate; yasmād na tadākāravinābhūta indro ghaṭa iva vikukṣivinābhūtaḥ . athavā sthāpanāyāṃ nikṣepaḥ sthāpanānikṣepaḥ . na nāmni nikṣipyate, sthāpanāyāmeva nikṣipyate . yato nāmāpi sahārthena tattantrameva . sthānakaraṇajanmānaḥ śabdākārāstadgamyāścārthākārāḥ sarve sthāpanāvipariṇāmavijṛmbhitamātram . tadabhāve śabdārthayorabhāvādākārāgrahaṇe ca tayoragrahaṇāt . dravyamapi sthāpanānikṣepa eva ākāramayatvād dravyasya . yathā śrīparṇīdāru dravyamantarlīnākāraṃ tasya tasyākāraviśeṣasya . tyādi aviviktaviviktasthānalakṣaṇasthāpanānikṣepātmakatvaṃ jagataḥ pratyakṣīkriyate vyāpitvād lakṣaṇasyāsya, indrānindrayorvivekamajānatāṃ puṃsāṃ sa indraḥ sākṣāt pradarśyate . kasmāt ? yasmād na tadākāretyādi, nayanaśabdlavarṇatādyākāramantareṇa indrābhāvāt tadākāratattva evendra ityuktatvāt . kimiva ? ghaṭa iva vikukṣitvādivinābhūtaḥ, yathā ghaṭo vikukṣitvādyākārādṛte nāsti tadātmaka evāsti tathā indro'pi svākāravinābhūto nāsti tadātmaivāstīti . - [Previous: 8.104](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.8.104) - [Next: 8.106](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.8.106) - [Up: 8](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.8) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.699) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.8.105](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.8.105) · Pramāṇa