[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 8.76 # Dvadasharanayacakra 8.76 Nyāyāgamānusāriṇī 8.76 - **Language:** Sanskrit ### [8.76](https://indike.org/pramana/in.jaina.post.dvadasaranayacakra!simhasuri.8.76) atra prayogaḥ --śabdanirapekṣaiva vivakṣādhyāropyā śaktirartha iti pratijñā . pratyāyyatvāt, pratyāyakena vaktrā śrotari pratyayādhānaṃ pratyāyyatvaṃ śaktyākhyasyārthasya siddhameva . yaḥ pratyāyyaḥ sa śabdanirapekṣa pratyāyyatvāt, abhijalpārthāvayavavat, prayojakatvāccāsyāḥ śaktereva vivakṣābījatvāt . sarvaśaktipakṣe'pi cāsmanmatamevocyate tvayā, arthārthatvācchabdaprayogasya vyavasthitāmavyatikīrṇāṃ tāṃ tāṃ śaktimupādāya svaviṣayaniyatāḥ śabdāḥ prayujyante liṅgādibhinnasāmānādhikaraṇyakriyāyāṃ vyatikarāpatteḥ . paramārthatastu vādaparameśvaravāda evāyam, ekaikadravyānantaparyāyatvāt . yattu viṣayodgrāhe viruddhairdharmairyuktamityabhidhīyate etannātisamyakpratyapekṣita- eva siddhaḥ . abhijalpārthāvayavavat, yathā tvatprayuktasyābhijalpaśabdasyābhidheyo'rthaḥ samudāyaḥ ābhimukhyena jalpo'bhijalpaḥ tadidaṃsambandhātmaka ekībhāvastvayā śabdārthayorvyutpāditaḥ, sa ca pratyāyyo'vayavārthābhyām abhiśabdārthena jalpārthena ca, ābhimukhyena jalpo'bhijalpaḥ iti samudāyārthapratipatteravayavārthapratipattipūrvakatvāt . mā bhūd vivakṣā-prayogayostvadīyayorānarthakyamiti tāvabhyupagantavyau khapuṣpavailakṣaṇyena śabdanirapekṣau śaktyākhyau tvayā pratyāyyatvāt tathā śaktyākhyo'rthaḥ, itarathā abhijalpaśabdavaiyarthyaṃ syāditi . kiñcānyat, prayojakatvāccāsyā ityādi . yaduktaṃ tvayā tatrāśaktipakṣe vastugatā śaktiraprayojikā, na hi tasyā vastuviṣayābhyāṃ sannidhānāsannidhānābhyāṃ kiñcidapi prayojanamasti iti, tadidamitomukhaṃ yuktijātaṃ viparivartate, śaktereva vivakṣābījatvāt prayojakatvācca . evaṃ tāvadaśaktipakṣo'smanmatasiddhestvadvacanādeva nāsti . - [Previous: 8.75](https://indike.org/pramana/in.jaina.post.dvadasaranayacakra!simhasuri.8.75) - [Next: 8.77](https://indike.org/pramana/in.jaina.post.dvadasaranayacakra!simhasuri.8.77) - [Up: 8](https://indike.org/pramana/in.jaina.post.dvadasaranayacakra!simhasuri.8) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.676) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.8.76](https://indike.org/pramana/in.jaina.post.dvadasaranayacakra!simhasuri.8.76) · Pramāṇa