Dharmapariksha 11
Dharmaparīkṣā 11
- Language
- Sanskrit
Contents
- 11.95 — 1 part
11.1
atha prāhumimaṃ viprā vayaṃ mūrkhāḥ kimīdṛśāḥ
na vidmo yena yuktyāpi ghaṭamānaṃ vacaḥ sphuṭam
11.2
tato 'bhaṇot khagādhīśandano budhanandanaḥ
yadyevaṃ śrūyatāṃ viprāḥ sphuṭayāmi manogatam
11.3
tāpasastapasāmāsīdatha maṇḍapakauśikaḥ
nivāsaḥ kṛtadoṣāṇāṃ mahasāmiva bhāskaraḥ
11.4
viśuddhavigrahaireṣa nakṣatrairiva candramāḥ
niviṣṭo bhojanaṃ bhoktuṃ tāpasairekadā saha
11.5
saṃsparśabhītacetaskāścaṇḍālamiva garhitam
enaṃ niṣaṇṇamālokya sarve te tarasotthitāḥ
11.6
tenaiva tāpasāḥ pṛṣṭāḥ sahabhuñjānamutthitāḥ
sārameyamivālokya kiṃ māṃ yūyaṃ nigadyatām
11.7
abhāṃṣi tāpasaireṣa tāpasānāṃ bahirbhavaḥ
kumārabrahmacārī tvamadṛṣṭatanayānanaḥ
11.8
aputrasya gatirnāsti svargo na ca tapo yataḥ
tataḥ putramukhaṃ dṛṣṭvā śreyase kriyate tapaḥ
11.9
tena gatvā tataḥ kanyāṃ yācitāḥ svajanā nijāḥ
vayo 'tītatayā nādustasmai tāṃ te kathaṃcana
11.10
bhūyo 'pi tāpasāḥ pṛṣṭā vegenāgatya tena te
sthavirasya na me kanyāṃ ko 'pi datte karomi kim
11.11
tairuktaṃ vidhavāṃ rāmāṃ saṃgṛhya tvaṃ gṛhī bhava
nobhayorvidyate doṣa ityuktaṃ tāpasāgame
11.12
patyau pravrajite klībe praṇaṣṭe patite mṛte
pañcasvāpatsu nārīṇāṃ patiranyo vidhīyate
11.13
tenāto vidhavāgrāhi tāpasādeśavartinā
svayaṃ hi viṣaye lolo gurvādeśena kiṃ janaḥ
11.14
tasya tāṃ sevamānasya kanyājani manoramā
nītiṃ sarvajanābhyarthyā saṃpattiriva rūpiṇī
11.15
haranārāyaṇabrahmeśakrādīnāṃ divaukasām
yā durvāramavadhiṣṭa vardhayantī manobhavam
11.16
taptacāmīkaracchāyā chāyā nāmājaniṣṭa yā
kalāguṇairbudhābhīṣṭaiḥ sakalairnilayīkṛtā
11.17
vijitya sakalā rāmāḥ sthitā yā kāntisaṃpadā
yasyāḥ samajani cchāyā svakīyādarśasaṃbhavā
11.18
amuṣyai bandhurā kanyā sājaniṣṭāṣṭavārṣikī
paropakāriṇī lakṣmīḥ kṛpaṇasyeva mandire
11.19
avādīdekadā kāntāmasau maṇḍapakauśikaḥ
tīrthayātrāṃ priye kurvaḥ samastāghaviśodhinīm
11.20
devasya kāñcanacchāyāṃ chāyāṃ pratyagrayauvanām
kasya kānte karanyāsīkurvahe śubhalakṣaṇām
11.21
yasyaivaiṣāpyate kanyā gṛhītvāṃ so 'pi tiṣṭhati
na ko 'pi vidyate loke rāmāratnaparāṅmukhaḥ
11.22
dvijihvasevito rudro rāmādattārdhavigrahaḥ
manmathānalataptāṅgaḥ sarvadā viṣamekṣaṇaḥ
11.23
dehasthāṃ pārvatīṃ hitvā jāhnavīṃ yo niṣevate
sa muñcati kathaṃ kanyāmāsādyottamalakṣaṇām
11.24
yasya jvalati kāmāgnirhṛdaye durnivāraṇaḥ
divāniśaṃ mahātāpo jaladheriva vāḍavaḥ
11.25
kathaṃ tasyārpayāmyenāṃ dhūrjaṭeḥ kāminaḥ sutām
rakṣaṇāyārpyate dugdhaṃ mārjārasya budhairnahi
11.26
1sahasrairyāti gopīnāṃ tṛptiṃ ṣoḍaśabhirhariḥ
na sadā sevyamānābhirnadībhiriva nīradhiḥ
11.27
gopīrniṣevate hitvā yaḥ padmāṃ hṛdaye sthitām
sa prāpya sundarāṃ rāmāṃ kathaṃ muñcati mādhavaḥ
11.28
īdṛśasya kathaṃ viṣṇorarpayāmi śarīrajām
corasya hi kare ratnaṃ kena trāṇāya dīyate
11.29
nṛtyadarśanamātreṇa sāraṃ vṛttaṃ mumoca yaḥ
sa brahmā kurute kiṃ na sundarāṃ prāpya kāminīm
11.30
ekadā viṣṭarakṣobhe jāte sati puraṃdaraḥ
papraccha dhiṣaṇaṃ sādho kenākṣobhi mamāsanam
11.31
jagāda dhiṣaṇo deva brahmaṇaḥ kurvatastapaḥ
ardhāṣṭābdasahasrāṇi vartante rājyakāṅkṣayā
11.32
prabho tapaḥprabhāveṇa tasyāyaṃ mahatā tava
ajaniṣṭāsanakṣobhastapasā kiṃ na sādhyate
11.33
hare hara tapastasya tvaṃ prerya striyamuttamām
nopāyo vanitāṃ hitvā tapasāṃ haraṇe kṣamaḥ
11.34
grāhaṃ grāhamasau strīṇāṃ divyānāṃ tilamātrakam
rūpaṃ nirvartayāmāsa bhavyāṃ rāmāṃ tilottamām
11.35
gatvā tvaṃ tapasā riktaṃ kuruṣva kamalāsanam
ityuktvā preṣayāmāsa vṛtrahā tāṃ tilottamām
11.36
mano mohayituṃ dakṣaṃ jīrṇaṃ madyamivorjitam
brahmaṇaḥ purataścakre sā nṛtyaṃ rasasaṃkulam
11.37
śarīrāvayavā guhyā darśitā dakṣayā tayā
meghā vardhayituṃ sadyaḥ kusumāyudhapādapam
11.38
pādayorjaṅghayorūrvovistīrṇe jaghanasthale
nābhibimbe stanadvandve grīvāyāṃ mukhapaṅkaje
11.39
dṛṣṭirviśramya viśramya dhāvamānā samantataḥ
brahmaṇo vigrahe tasyāściraṃ cikrīḍa cañcalā
11.40
bibheda hṛdayaṃ tasya mandasaṃcārakāriṇī
vilāsavibhramādhārā sā vindhyasyeva narmadā
11.41
raktaṃ vijñāya taṃ dṛṣṭayā1 dakṣiṇāpaścimottarāḥ
bhramayantī manastasya babhrāma kramato diśaḥ
11.42
lajjamānaḥ sa devānāṃ valitvā na niraikṣata
lajjābhimānamāyābhiḥ sundaraṃ kriyate kutaḥ
11.43
tapo varṣasahasrotthaṃ dattvā pratyekamastadhīḥ
ekaikasyāṃ sa kāṣṭhāyāṃ didṛkṣustāṃ1 vyadhānmukham
11.44
bhṛśaṃ saktadṛśaṃ dṛṣṭvā 1sāruroha nabhastalam
yoṣito raktacittānāṃ vañcanāṃ kāṃ na kurvate
11.45
pañcavarṣaśatotthasya tapaso mahasā sa tām
didṛkṣurakarod vyomni rāsabhoyamaso śiraḥ
11.46
na babhūva tapastasya na nartanavilokanam
abhūdubhayavibhraṃśo brahmaṇo rāgasaṃginaḥ
11.47
sā taṃ sarvataporiktaṃ kṛtvāgātsurasundarī
mohayitvākhilaṃ rāmā vañcayanti hi rāgiṇam
11.48
imāmanakṣamāṇo 'sau vilakṣatvamupāgataḥ
darśanāgatadevebhyaḥ kupyati sma nirastadhīḥ
11.49
kharavaktreṇa devānāṃ prāvartata sa khādane
vilakṣaḥ sakalo 'nyebhyaḥ svabhāvenaiva kupyati
11.50
avocannamarā gatvā śaṃbhoretasya ceṣṭitam
ātmaduḥkhapratīkāre yatate sakalo janaḥ
11.51
cakarta mastakaṃ tasya śambhurāgatya pañcamam
parāpakāriṇo mūrdhā chidyate ko 'tra saṃśayaḥ
11.52
tvadīya hastato nedaṃ patiṣyati śiro mama
iti taṃ śaptavāneṣa brahmahatyāparaṃ ruṣā
11.53
kuruṣvānugrahaṃ sādho brahmahatyā kṛtā mayā
ityevaṃ gadito brahmā tamūce pārvatīpatim
11.54
asṛjā puṇḍarīkākṣo yadedaṃ pūrayiṣyati
hastataste tadā śambho patiṣyati śiro mama
11.55
pratipadya vacastasya kapālavratamagrahīt
prapañco bhuvanavyāpī devānāmapi dustyajaḥ
11.56
brahmahatyānirāsārthaṃ so 'gamaddharisaṃnidhim
pavitrīkartumātmānaṃ na hi kaṃ śrayate janaḥ
11.57
brahmā mṛgagaṇākīrṇamavikṣad gahanaṃ vanam
tīvrakāmāgnisaṃtaptaḥ kva na yāti vicetanaḥ
11.58
vilokyatu matīmṛkṣīṃ brahmā tatra niṣevate
brahmacaryopataptānāṃ rāsabhyapyapsarāyate
11.59
āsādya tarasā garbhaṃ sā pūrṇe samaye tataḥ
asūta jāmbavaṃ putraṃ prasiddhaṃ bhuvanatraye
11.60
yaḥ kāmārtamanā brahmā tiraścīmapi sevate
sa sundarīṃ kathaṃ kanyāmenāṃ mokṣyati mūḍhadhīḥ
11.61
ahalyāṃ cittabhūbhallīṃ dṛṣṭvā gautamavallabhām
ahalyakākulo jāto biḍaujāḥ pāradārikaḥ
11.62
gautamena krudhā śaptaḥ sa sahasrabhago 'bhavat
duḥkhaṃ na prāpyate kena manmathādeśavartinā
11.63
mune 'nugṛhyatāmeṣastridaśairiti bhāṣite
sahasrākṣaḥ kṛtastena bhūyo 'nugrahakāriṇā
11.64
itthaṃ kāmena mohena mṛtyunā yo na pīḍitaḥ
nāsau nirdūṣaṇo lokairdevaḥ ko'pi vilokyate
11.65
eka eva yamo devaḥ satyaśaucaparāyaṇaḥ
vipakṣamardako dhīraḥ samavartīha vidyate
11.66
sthāpayitvāsya sāṃnidhye kanyāṃ yātrāṃ karomyaham
dhyātveti sthāpitā tena duhitā yamasaṃnidhau
11.67
sastrīkastīrthayātrārthaṃ gato maṇḍapakauśikaḥ
bhūtvā nirākulaḥ prājño dharmakṛtye pravartate
11.68
manobhuvatarukṣoṇī dṛṣṭvā sā samavartinā
akāri preyasī svasya nāsti rāmāsu niḥspṛhaḥ
11.69
parāpahārabhītena sā kṛtodaravartinī
vallabhāṃ kāminīṃ kāmī kva na sthāpayate kudhoḥ
11.70
kṛṣṭvā kṛṣṭvā tayā sārdhaṃ bhuktvā bhogamasau punaḥ
gilitvā kurute 'ntaḥsthāṃ nāśaśaṅkitamānasaḥ
11.71
itthaṃ tayā samaṃ tasya bhuñjānasya ratāmṛtam
kālaḥ prāvartatā'tmānaṃ paśyatastridaśādhikam
11.72
khaṭikā pustikā rāmā parahastagatā satī
naṣṭā jñeyāthavā puṃsā ghṛṣṭā spṛṣṭopalabhyate
11.73
pavanenaikadāvāci pāvako bhadra sarvadā
ekaḥ sudhābhujāṃ madhye yamo jīvati saukhyataḥ
11.74
tenaikā sā vadhūrlabdhā suratāmṛtavāhinī
yāmāliṅgya dṛḍhaṃ śete sukhasāgaramadhyagaḥ
11.75
na tayā dīyamāne 'sau sukhe tṛpyati pāvane
nitambinyā jale nityaṃ gaṅgayeva payonidhiḥ
11.76
kathaṃ me jāyate saṃgastayāmā mṛgacakṣuṣā
pāvakeneti pṛṣṭo 'sau nijagāda samīraṇaḥ
11.77
rakṣyamāṇāmunā1 tanvī na draṣṭumapi labhyate
kuta eva punastasyāḥ saṃgamo 'sti vibhāvaso2
11.78
svakīyayā śriyā sarvā jayantī surasundarīḥ
ratiṃ niṣevya sā tena1 jaṭharasthā vidhīyate
11.79
ekākinī sthitā spaṣṭaṃ yāmamekaṃ vilocanaiḥ
aghamarṣaṇakāle1 sā kevalaṃ dṛśyate satī
11.80
avāci vahninā vāyo yāmenaikena niścitam
strīṃ gṛhṇāmi trilokasthāṃ kā vārtaikatra yoṣiti
11.81
ekākinīṃ yauvanabhūṣitāṅgīṃ vadhūṃ smarākrāntaśarīrayaṣṭim
kurvanti vaśyāṃ tarasā yuvāno1 na vidyate kiṃcana citramatra
11.82
niśāta1kāmeṣuvibhinnakāyo 2vahnirnigadyeti jagāma tatra
yatrāghamarṣaṃ vidadhāti deśe yamo bahistāṃ parimucya tanvīm
11.83
āgatya kāntāṃ sa nidhāya bāhyāṃ gaṅgāṃ praviṣṭo 'ghaviśuddhikāmaḥ
vidhāya rūpaṃ kamanīyamagniḥ saṃgaṃ tayāmā parigṛhya cakre
11.84
ayantritā strī manasā viṣaṇṇā gṛhṇāti dṛṣṭvā puruṣaṃ yamiṣṭam
ajeva sāndraṃ tarupatrajālaṃ kupyanti nāryo hi niyantraṇāyām
11.85
vidhāya saṃgaṃ jvalanena sārdhaṃ babhāṇa sā tvaṃ vraja śīghrameva
bharturmadīyasya viruddhavṛtteryamesya nāthāgatikāla eṣaḥ
11.86
tvayā sametāṃ yadi vīkṣate māṃ tadā madīyāṃ sa lunāti nāsām
niśumbhati tvāṃ ca vivṛddhakopo na ko 'pi dṛṣṭvā kṣamate hi jāram
11.87
āliṅgya pīnastanapīḍitāṅgīṃ jagāda vahnirdayite yadi tvām
vimucya gacchāmi viyogahastī tadeṣa māṃ duṣṭamanā hinasti
11.88
varaṃ tavāgre dayite hato 'haṃ yamena ruṣṭena niśitabāṇaiḥ
durantakāmajvalanena dagdhastvayā vinā na jvalatā sadāpi
11.89
vadantamitthaṃ rabhasā gṛhītvā sāgniṃ gilitvā vidadhe 'ntarastham
na rocamāṇasya narasya nāryāḥ khalvasti cittaṃ hṛdayapraveśe
11.90
tadantarasthaṃ tamabudhyamānaḥ1 kṛtvā kṛtānto niyamaṃ2 sametya
cakāra madhye jaṭharasya kāntāṃ strīṇāṃ prapañco viduṣāmagamyaḥ
11.91
sarvatra loke 'śanapākahomapradīpayāgapramukhakriyāṇām
vinā hutāśena vilokya nāśaṃ prapedire vyākulatāṃ nṛdevāḥ
11.92
biḍaujasāvāci1 tataḥ samīro vimārgaya tvaṃ jvalanaṃ caraṇyo2
sarvatragāmī tridaśeṣu madhye tvaṃ vetsi sakhyena3 nivāsamasya
11.93
ūce careṇyuḥ1 paritastriloke gaveṣito deva mayā na dṛṣṭaḥ
ekatra deśe na gaveṣito 'sau deveśa tatrāpi gaveṣayāmi
11.94
uktveti vāyuḥ parikalpya bhojyaṃ sudhāśivagaṃ sakalaṃ nimantrya
ekaikamanyeṣu vitīrya pīṭhaṃ yamasya pīṭhatritayaṃ sma datte
11.95
sve sve sthāne sapadi sakale nākiloke niviṣṭe
dattvānyeṣāmamitagatinā bhāgamekaikameva
dattaṃ bhāgatritayamaśane vāyunā pretabhartuḥ
siddhi kāryaṃ vrajati bhuvane na prapañcena hīnam
11.95.p1
iti dharmaparīkṣāyāmamitagatikṛtāyām ekādaśaḥ paricchedaḥ ||11