Dharmapariksha 21

Dharmaparīkṣā 21

Language: Sanskrit

21.20 — 1 part

21.1

siddhāntapāthonidhipāragāmī śrīvīraseno 'jani sūrivaryaḥ
śrīmāthurāṇāṃ yamināṃ variṣṭhaḥ kaṣāyavidhvaṃsavidhau paṭiṣṭhaḥ

21.2

dhvastāśeṣadhvāntavṛttirmanasvī tasmātsūrirdevaseno 'janiṣṭa
lokoddyotī pūrvaśailādivārkaḥ śiṣṭābhīṣṭaḥ stheyaso 'pāstadoṣaḥ

21.3

bhāsitākhilapadārthasamūho nirmalo 'mitagatirgaṇanāthaḥ
vāsaro dinamaṇeriva tasmājjāyate sma kamalākarabodhī

21.4

nemiṣeṇagaṇanāyakastataḥ pāvanaṃ vṛṣamadhiṣṭhito vibhuḥ
pārvatīpatirivāstamanmatho yogagopanaparo gaṇārcitaḥ

21.5

kopanivārī śamadamadhārī mādhavasenaḥ praṇatarasenaḥ
so 'bhavadasmādgalitamadoṣmā yo yatisāraḥ praśamitamāraḥ

21.6

dharmaparīkṣāmakṛta vareṇyāṃ dharmaparīkṣāmakhilaśaraṇyām
śiṣyavariṣṭho 'mitagatināmā tasya paṭiṣṭho 'naghagatidhāmā

21.7

baddhaṃ mayā jaḍadhiyātra virodhi yattad
gṛhṇantvidaṃ svaparaśāstravido viśodhya
gṛhṇanti kiṃ tuṣamapāsya na sasyajātaṃ
sāraṃ na sāramidamuddhadhiyo vibudhya

21.8

kṛtiḥ purāṇā sukhadā na nūtanā na bhāṣaṇīyaṃ vacanaṃ budhairidam
bhavanti bhavyāni phalāni bhūriśo na bhūruhāṃ kiṃ prasavaprasūtiḥ

21.9

purāṇasaṃbhūtamivaṃ na gṛhyate purāṇamatyasya na sundareti gīḥ
suvarṇapāṣāṇavinirgataṃ jane na kāṃcanaṃ gacchati kiṃ mahārghatām

21.10

na buddhigarveṇa na pakṣapātato mayānyaśāstrārthavivecanaṃ kṛtam
mamaiṣa dharmaṃ śivaśarmadāyakaṃ parīkṣituṃ kevalamutthitaḥ śramaḥ

21.11

ahāri kiṃ keśavaśaṃkarādibhirvyatāri kiṃ vastu jinena me 'rthinaḥ
stuve jinaṃ yena niṣidhya tānahaṃ budhā na kurvanti nirarthakāṃ kriyām

21.12

vimucya mārgaṃ kugatipravartakaṃ śrayantu santaḥ sugatipravartakam
cirāya mā bhūdakhilāṅgatāpakaḥ paropatāpo narakādigāminām

21.13

na gṛhyate ye viniveditaṃ hitaṃ vrajanti te duḥkhamanekadhāgrataḥ
kumārgaṃlagno vyavatiṣṭhate na yo nivārito 'sau purato viṣīdati

21.14

viniṣṭhuraṃ vākyamidaṃ mamoditaṃ sukhaṃ paraṃ dāsyati nūnamagrataḥ
niṣevyamānaṃ kaṭukaṃ kimauṣadhaṃ sukhaṃ vipāke na dadāti kāṅkṣitam

21.15

vibudhya gṛhṇītha budhā mamoditaṃ śubhāśubhaṃ jñāsyatha niścitaṃ svayam
nivedyamānaṃ śataśo 'pi jānate sphuṭaṃ rasaṃ nānubhavanti taṃ janāḥ

21.16

kṣatasakalakalaṅkā prāpyate tena kīrtirbudhamatamanavadyaṃ budhyate tena tattvam
hṛdayasadanamadhye dhūtamithyāndhakāro jinapatimatadīpo dīpyate yasya dīpraḥ

21.17

vadati paṭhati bhaktyā yaḥ śṛṇotyekacittaḥ svaparasamayatattvāvedi śāstraṃ pavitram
viditasakalatattvaḥ kevarāloknetrastridaśamahitapādo yātyasau mokṣalakṣmīm

dharmo jaino 'pavighnaṃ prabhavatu bhuvane sarvadā śarmadāyī
śāntiṃ prāpnotu loko dharaṇimavanipā nyāyataḥ pālayantu
hatvā karmārivargaṃ yamaniyamaśaraiḥ sādhavo yāntu siddhiṃ
vidhvastāśuddhabodhā nijahitaniratā jantavaḥ santu sarve

21.19

yāvatsāgarayoṣito jalanidhiṃ śliṣyanti vīcībhujairbhartāraṃ supayodharāḥ kṛtaravā mīnekṣaṇā vāṅganāḥ
tāvattiṣṭhatu śāstrametadanaghaṃ kṣoṇītale kovidairdharmādharmavicārakairanudinaṃ vyākhyāyamānaṃ mudā

21.20

saṃvatsarāṇāṃ vigate sahasre sasaptatau vikramapārthivasya
idaṃ niṣiddhānyamataṃ samāptaṃ jinendradharmāmṛtayuktaśāstram

21.20.p1

ityamitagatikṛtā dharmaparīkṣā samāptā