[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Poetry and campū by Jain authors](https://indike.org/pramana/in.jaina.post.kavya) › [Yaśastilaka](https://indike.org/pramana/in.jaina.post.kavya.yasastilaka) › [Yashastilakacandrika](https://indike.org/pramana/in.jaina.post.kavya.yasastilaka!srutasagara) › 4.399 # Yashastilaka 4.399 Yaśastilakacandrikā 4.399 - **Language:** Sanskrit ### [4.399](https://indike.org/pramana/in.jaina.post.kavya.yasastilaka!srutasagara.4.399) ghanamarlinamityādi | nabho vīkṣya dṛṣṭvā kasya puruṣasya bhayaṃ na bhavati | api tu sarvasyāpi bhayaṃ bhavatītyarthaḥ | kathaṃbhūtaṃ nabhaḥ | karikulaṃ saṃnaddhamiva gṛhītasaṃnāhamiva | punaḥ kathaṃbhūtam | ghanamarlinam ghanairmeghairmalinaṃ kṛṣṇavarṇam | punaḥ kathaṃbhūtam | kṛtaninadaṃ vihitagarjanam | punaḥ kathaṃbhūtam | patadaśaniśaram patantaḥ aśanayo vajrāṇyeva śarā bāṇā yasmāt | punaḥ kathaṃbhūtam | pracaṇḍasuracāpam pracaṇḍamutkaṭaṃ suracāpaṃ yatra tattathoktam | śleṣopamākṣepālaṃkāraḥ || kaśyetyādi | iyaṃ pratyakṣībhūtā śakracāpasyendradhanuṣo yaṣṭiḥ daṇḍaḥ virājati | kathaṃbhūtā yaṣṭiḥ | gaganakariṇaḥ kaśyeva varatreva | punaḥ kathaṃbhūtā | nabhaḥśriyaḥ kāñcīva kiṅkiṇīva | punaḥ kathaṃbhūtā | viyaddevyā ākāśadevatāyāḥ maṇimāleva | upamālaṃkāraḥ || jaladhijalairityādi | etāḥ pratyakṣībhūtāstaḍillekhā vidyudrājayaḥ ghanajaṭharāt nirgacchantyaḥ prādurbhavantyaḥ | śobhante iti śeṣaḥ | kathaṃbhūtāstaḍillekhāḥ | jaladhijalaiḥ saha pītā āsvāditā vāḍavasya jvālā arciṣaḥ pariṇatiṃ prāptā iva | utprekṣālaṃkāraḥ || vicakilamukulaśrīrityādi | he rājan, te jagatprasiddhāḥ navajaladharadhārābindavaḥ navīnameghodakacchaṭānāṃ jalakaṇāḥ patantaḥ santastava bhavato vinodaṃ harṣaṃ dadhatu kurvantu | te ke bindavaḥ | yeṣāṃ bindūnāṃ yoṣitāṃ kuntaleṣu sthitānāṃ vicakilamukulaśrīrmogarakapuṣpakuḍmalaśobhā vartate | punaśca te ke | yeṣāṃ bindūnāṃ yoṣitāṃ stanataṭeṣu luṭhitānāṃ hāralīlā hāraśobhā vartate | kathaṃbhūtāste navajaladharadhārābindavaḥ | yoṣitāṃ kelikārāḥ krīḍāvidhāyinaḥ | upamālaṃkāraḥ || - [Previous: 4.395](https://indike.org/pramana/in.jaina.post.kavya.yasastilaka!srutasagara.4.395) - [Next: 4.401.1](https://indike.org/pramana/in.jaina.post.kavya.yasastilaka!srutasagara.4.401.1) - [Up: 4](https://indike.org/pramana/in.jaina.post.kavya.yasastilaka!srutasagara.4) ## Linked texts (1) - [Yaśastilaka](https://indike.org/pramana/in.jaina.post.kavya.yasastilaka.4.398) — Somadevasūri, Sanskrit --- Source: [https://indike.org/pramana/in.jaina.post.kavya.yasastilaka!srutasagara.4.399](https://indike.org/pramana/in.jaina.post.kavya.yasastilaka!srutasagara.4.399) · Pramāṇa