[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Poetry and campū by Jain authors](https://indike.org/pramana/in.jaina.post.kavya) › [Yaśastilaka](https://indike.org/pramana/in.jaina.post.kavya.yasastilaka) › [Yashastilakacandrika](https://indike.org/pramana/in.jaina.post.kavya.yasastilaka!srutasagara) › 4.424 # Yashastilaka 4.424 Yaśastilakacandrikā 4.424 - **Language:** Sanskrit ### [4.424.1](https://indike.org/pramana/in.jaina.post.kavya.yasastilaka!srutasagara.4.424.1) evamamunā prakāreṇa āmantrayate | evaṃ kathamiti cet-paśyetyādi | jagatpatiṃ śrīyaśodharaṃ āgatya paśya upaḍhaukaya sevasva | yadi cet ahaṃ 'vade' kathayāmi | atra 'vad'dhāturatmanepadī vartate | 'jñānayatnacchandaneṣu vadaḥ' iti rucādipāṭhāt bhāsane'pi vaktavyam | yathā sabhāyāṃ vadate dīpyamāno vadatītyarthaḥ | ahaṃ dīpyamānasabhāyāṃ yadi vade tarhi tvaṃ āgatya sevasva | tathā ca pañjikākāro jinadevaḥ | vaderucoktāvātmanepadam | he acala, tadā tasmin āgamanadarśanakāle te tava anugraha upakāraḥ syāt bhavet | yadi cet tvaṃ mṛgaceṣṭitaṃ palāyanaṃ kuryāḥ puruṣeṇa tadā tasmin kāle samudrāvadhi āsamudraṃ kṣoṇī medinī manyate vartate | kva tvaṃ palāyase ityarthaḥ | yadi cet saṃgrāme samare saṃmukho bhavasi tvaṃ tadā te tava punaḥ punarapi kṣemaḥ kalyāṇaṃ kutaḥ | na kuto'pi ityarthaḥ | tattasmāt kāraṇāt he pañcālapate acalamahārāja, atra asmin śāsane lekhe tava bhavataḥ kiṃ saṃdiśyatām | kiṃ saṃdeśo dīyata ityarthaḥ | ākṣepālaṃkāraḥ || kadācit kasmiṃściddavasare śaradi śaratkāle avatīrṇāyāṃ satyām | kathaṃbhūtāyāṃ śaradi | paritoṣitavijigīṣupāripadi paritoṣitā harṣaṃ prāpitā vijigīṣūṇāṃ narendrāṇāṃ pariṣat sabhā yasyāṃ sā tathā tasyām | taṃ vijayavardhanasenāpatiṃ tasya prasiddhasya pañcālapateracalamahārājasya pratāpanodanāya pratāpavidhvaṃsanārthaṃ ahaṃ prāhiṇavaṃ prasthāpitavān | kathaṃbhūto'ham | ### [4.424.2](https://indike.org/pramana/in.jaina.post.kavya.yasastilaka!srutasagara.4.424.2) ityamunā prakāreṇa cāpeṭikapeṭikaprakaṭitakaṭakaprayāṇaprastāvaḥ cāpeṭikā bandinaḥ teṣāṃ peṭikaḥ samūhastena prakaṭitaḥ sphuṭīkṛto vijñāpitaḥ kaṭakasya sainyasya prayāṇaprastāvo digvijayaprasaro yasya mama sa tathoktaḥ | itīti kim | he rājan, śarat āgatā | keṣu satsu | kīrakāminīkuralakuntaleṣu satsu kīro nāma deśastasya kāminyastāsāṃ kuralakuntaleṣu keśahasteṣu | kathaṃbhūteṣu kuralakuntaleṣu | sarasakāśmīrakesarottaṃsamāṃsaleṣu sarasaṃ pratyagraṃ yat kāśmīrakesaraṃ bāhlīkuṅkumaṃ tanna uttaṃsena mukuṭena māṃsalāḥ sthūlāḥ manojñāste tathā teṣu | punaśca keṣu satsu śaradāgatā | kalamakedāreṣu sugandhaśālikṣetreṣu satsu | kathaṃbhūteṣu kalamakedāreṣu | garbhāvirbhavatkaṇiśamañjarīsaurabhodāreṣu garbheṣu āvirbhavanto ye kaṇiśāsteṣāṃ mañjarīṇāṃ saurabhaṃ saugandhyaṃ tena udāreṣu atimanohareṣu | punaśca keṣu satsu śaradāgatā | mahā- sarasu | kumudavaneṣu śvetotpalakhaṇḍeṣu satsu | kathambhūteṣu kumudavaneṣu | sapramodeṣu vikāsavatsu saṃpāditakumudavaneṣu saṃpāditamutpāditaṃ ko pṛthivyā mudo harṣasya avanaṃ rakṣaṇaṃ yeṣu kairaveṣu tāni teṣu | punaśca keṣu satsu | śucipakṣeṣu satsu | kiṃ kurvāṇeṣu śucipakṣeṣu | virājamāneṣu śobhamāneṣu vidhudīdhitisaṃdigdhaśucipakṣeṣu vidhoścandrasya dīdhitibhiḥ kiraṇai saṃdigdhā saṃdehaṃ prāpitā śucipakṣā śuklagarunmanto yeṣāṃ te tathā teṣu | punaśca kasminsati śāradāgatā | candramaṇḍale candrabimbe sati | kathambhūte candramaṇḍale | atīva pra sannarociṣi atīvātiśayena prasannā nirmalā roci prabhā yasya tattasmin | kathambhūteścidvat | ### [4.424.3](https://indike.org/pramana/in.jaina.post.kavya.yasastilaka!srutasagara.4.424.3) abhinavollikhitendumaṇidarpaṇa iva abhinavaṃ pratyagra ullikhita utkīrṇaṃ ghaṭitaṃ indumaṇeścandrakāntaratnasya darpaṇe iva | punaśca kasmin sati | ākhaṇḍale indre sati | kiṃ kurvati sati ākhaṇḍale | śarāsanaṃ cāpaṃ saṃhṛtavati sati saṃkocitavati sati | kasminniva | utprekṣate-padmalokapālaparikalpitayātrāvasara iva padmamalokapālena śrīmadyaśodharamahārājena parikalpitā prārabdhā yā yātrā tasyā avasare samaye iva | etāvatā varṣākālo gato digvijayo'vasaro vartate | punaśca kasminsati | gagane sati | kiṃ kṛtavati sati gagane | jaladakaluṣatāṃ meghakāluṣyaṃ muktavati sati | kathambhūte | utprekṣaterājahaṃsotsavasaṃpādanapare iva rājahaṃsānāṃ śvetagarutāṃ utsavasaṃpādanaṃ jananaṃ tasmin para tatparaṃ tasmin | punaśca kasmin sati | pracalākiloke mayūrajane sati | kiṃ kṛtavati sati pracalākiloke | virasasvaratāṃ anusṛtavati āśritavati sati | kathambhūte | utprekṣate-payodharavirahaduḥkhite iva meghaviyogena duḥkhaṃ prāpte iva | punaśca kasmin sati | cātakakule vapīhavṛnde sati | kathambhūte cātakakule | mandamudi harṣarahite | kasmin iva | tvadarātikule iva tava śatruroke iva | punaśca kasmin sati | nandisadohe vṛṣabhasamūhe sati | kathambhūte nandisadohe | raṇarasodṛptahṛdi raṇarasena saṃgrāmānurāgeṇa udṛptaṃ vṛttaṃ hṛccittaṃ yasya sa tathā tasmin | kasminniva | tvatkaṭakasubhaṭānīke iva tava kaṭake sainye subhaṭānīke iva varasainyasubhaṭasamūhe iva | ## Linked texts (1) - [Yaśastilaka](https://indike.org/pramana/in.jaina.post.kavya.yasastilaka.4.424) — Somadevasūri, Sanskrit --- Source: [https://indike.org/pramana/in.jaina.post.kavya.yasastilaka!srutasagara.4.424](https://indike.org/pramana/in.jaina.post.kavya.yasastilaka!srutasagara.4.424) · Pramāṇa