[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Poetry and campū by Jain authors](https://indike.org/pramana/in.jaina.post.kavya) › [Yashastilaka](https://indike.org/pramana/in.jaina.post.kavya.yasastilaka) › 4.402 # Yashastilaka 4.402 Yaśastilaka 4.402 - **Language:** Sanskrit ### [4.402](https://indike.org/pramana/in.jaina.post.kavya.yasastilaka.4.402) ityakālajaladabandivinodyamānamanā. krīḍācalamekhalānilayini digvalayavilo kavilāsanāmni dhāmni samaṃ sevāsamāgatasamastasāmantasamājena pravīrapuruṣapariṣatparivāritaḥ puṣkarāvartapramukhameghamānanīyāṃ varṣartuśriyaṃ yāvadahamanubhavansapramodamāsāṃcakre, tāvatsaṃdhivigrahī 'deva, pañcālamaṇḍalapateracalasya dukūlanāmā dūtaḥ samāgataḥ, tiṣṭhati ca pratīhārabhūmau' iti vijñāpya prāveśayat | upāveśayacca yathānibandhāmācaritopacāraṃ taducite deśe | 'dūta, pradarśyatāmasmai prabhave te prabhuprahitaṃ prābhṛtam | śāsanahara, samarpyatāṃ śāsanam |' ubhau tathā kurutaḥ | saṃdhivigrahī dūtadarśanātpratyabhijñāya tannagaranivāsinā tāpasavyañjanena jāvālanāmnā 'ayaṃ hi rājā gajabulapradhānatvādacirādeva bhavadbhiḥ saha vijigīṣuvyāpāro vartate | tadatra yaducitaṃ tadācaritavyam' iti, prahitaṃ golakārthaṃ nirvarṇya ca, purastānniveśitaṃ prādeśanaṃ śāsanaṃ ca, 'aye, vigrahāgrahagrahila eva sa mahīpālaḥ prābhṛtatantrametatpatraṃ ca prāhiṇot| tathāhyanayormaṇḍalāgramudrāṅkito veṣṭanacatuṣṭayaniṣṭaṅkitaśca bahiḥprakāśaḥ saṃniveśaḥ | tadalamanane viṣamaviṣadroṣakāluṣyavitarkakarkaśāveśenopāyanena, śatruyaśaḥprakāśapiśunena cānena vilokitena lekhena | śrūyate hi kila—maṇikaraṇḍakavinyastavapuṣā kṛtrimeṇāśīviṣaviṣadhareṇa dhiṣaṇo durdharṣam, devāṅgavastravāsaniṣekeṇa ca sparśaviṣeṇa kaṇapaḥ kṛpāṇaṃ rājānaṃ jaghāna' ityanudhyāya, 'ko hi nāma dhīmāñśastravyāpārasamādhau dviṣadyādhau mṛdunopāyena bhiṣajyet' iti ca vicintya sasauṣṭhavaṃ taṃ dūtamaivamavādīt'nāsodvāsanamārgamaṇḍanaśikhāmālūrabandhakramaḥ kaṇṭhe śīrṇaśarāvadāmakalanaṃ kātreyakārohaṇam dūtānyaśca na te nikāraparuṣaḥ ko'pyatra kāryo vidhistatsvastho vada vācakaṃ nijapaterlekhastvayaṃ tiṣṭhatu' - [Previous: 4.401](https://indike.org/pramana/in.jaina.post.kavya.yasastilaka.4.401) - [Next: 4.403](https://indike.org/pramana/in.jaina.post.kavya.yasastilaka.4.403) - [Up: 4](https://indike.org/pramana/in.jaina.post.kavya.yasastilaka.4) ## Commentaries (1) - [Yaśastilakacandrikā](https://indike.org/pramana/in.jaina.post.kavya.yasastilaka!srutasagara.4.401.2) — Śrutasāgara, Sanskrit --- Source: [https://indike.org/pramana/in.jaina.post.kavya.yasastilaka.4.402](https://indike.org/pramana/in.jaina.post.kavya.yasastilaka.4.402) · Pramāṇa