[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Poetry and campū by Jain authors](https://indike.org/pramana/in.jaina.post.kavya) › [Yashastilaka](https://indike.org/pramana/in.jaina.post.kavya.yasastilaka) › 4.424 # Yashastilaka 4.424 Yaśastilaka 4.424 - **Language:** Sanskrit ### [4.424](https://indike.org/pramana/in.jaina.post.kavya.yasastilaka.4.424) saṃdhivigrahī 'yathājñāpayati senāpatiḥ' ityavadhārya ca yathādiṣṭam, 'senāpate, likhito'yaṃ lekhaḥ | śrūyatām - svasti | samastamahāsāmantaśikhaṇḍamaṇḍanībhavaccaraṇakamalaḥ kamalākarasarojasevyamānapādapallavaḥ pallavapāṇḍyacolaceramahamryanirmāṇaprakāśamānadigvijayavāhinīpracāraḥ cāracakṣuḥsahasrasākṣātkṛtasakalabhūpālamaṇḍalaḥ maṇḍalāgradhārājalanimagnanikhilārātisaṃtānaḥ saṃtānanamerumandārapārijātavanadevatāgītodāharaṇaguṇaprapañcaḥ pañcamo lokapāla, padmāvatīpuraparameśvara kanakagirinātha śiprāsarijjalakelikuñjara samudramudrāṅkitaśāsana kailāsavāñchana avantisīmantinīkucakumbhamadanāṅkuśa pratyakṣamakaradhvaja yācakacintāmaṇi kanakakaṅkaṇavarṣa satyaparameṣṭhī paralokakalatraputraka kavikāmadhenu dharmaratnāvatasaḥ nītilatāvalambanataru' dviṣṭakaiṭabhārāti āhavacaturbhuja parahitamahāvrata ahitakulakālānala pratipannajīvita parākramālaṃkāra samarasahasrabāhu pratāpatapanodaya cāturīcaturmukhaḥ vivekaratnākaraḥ sarasvatīkelivilāsahaṃsaḥ sarasoktivallabhaḥ kandukavinodavidyādharo madakarikrīḍākhaṇḍalaḥ syandanapracāragaruḍāgrajaḥ padātivainateyo gītagandharvacakravartī vādyavidyābṛhaspatiḥ nṛttavṛttāntabharataḥ samastāyudhasarvajñaḥ śaraṇāgatamanorathasiddhiḥ anāthanāthaḥ tyāgabhārgavaḥ drohadrumavanakuṭhāraḥ kaliṅgakuraṅgakesarī aśmakavaṃśavaiśvānaraḥ śakaśalabhaśamīgarbhaḥ krathakaiśikakṛśānuḥ ahicchatrakṣatriyaśiromaṇiḥ pañcālacāpalapralayakālaḥ keralakulakuliśapātaḥ yavanakujavajrānalaḥ caidyasundarīvinodakandalaḥ māgadhavadhūvilāsadarpaṇa kāñcikāminīkucakalaśakisalaya māhiṣmatīyuvatiratikusumacāpa kauśāmbī nitambinībimbādharamaṇḍana daśārṇavarṇinīkarṇapūra pāṭaliputrapaṇyāṅganābhujaṅga valabhīrambhoruvibhramabhramara pauravapuraṃdhrīrodhratilaka satatavasuvitaraṇaprīṇitadvijasamāja śrīyaśodharamahārāja sakalapraśastisahitamacalamahīpatimādiśati | śreyo'nyat | kāryaṃ caitadeva—yaduta vijayavardhana senāpatirbhavantamevamāmantrayate— paśyāgatya jagatpatiṃ yadi vade syātte tadānugrahaḥ kuryāstvaṃ mṛgaceṣṭitaṃ yadi tadā kṣoṇiḥ samudrāvadhi saṃgrāme bhava saṃmukho yadi tadā kṣemaḥ kutaste punastatpañcālapate kimatra bhavataḥ saṃdiśyatāṃ śāsane - [Previous: 4.423](https://indike.org/pramana/in.jaina.post.kavya.yasastilaka.4.423) - [Next: 4.425](https://indike.org/pramana/in.jaina.post.kavya.yasastilaka.4.425) - [Up: 4](https://indike.org/pramana/in.jaina.post.kavya.yasastilaka.4) ## Commentaries (1) - [Yaśastilakacandrikā](https://indike.org/pramana/in.jaina.post.kavya.yasastilaka!srutasagara.4.423.2) — Śrutasāgara, Sanskrit --- Source: [https://indike.org/pramana/in.jaina.post.kavya.yasastilaka.4.424](https://indike.org/pramana/in.jaina.post.kavya.yasastilaka.4.424) · Pramāṇa