Vidhimargaprapa 19
Vidhimārgaprapā 19
- Language
- Sanskrit
19.1
tahā nāṇapaṃcamiṃ cha akkammāse vajjittā maggasira-māha-phagguṇa-vaisāi-jeṭṭha-āsāḍhesu sukkapaṃcamīe jiṇanāhapūyāpuvvaṃ tayaggavinivesiyamahatthapotthayaṃ vihiyapaṃcavaṇṇakusumovayāro akhaṃḍakkhayābhilihiyapasatthasatthio dhayapaḍipunnapabohiyarattapaṃcavaṭṭipaīvo phalavalivihāṇapuvvaṃ paḍivajjei | uvavāsabaṃbhaceravihāṇeṇa | evaṃ paḍimāsaṃ paṃcamāsakaraṇe lahuī | mahaī uṇa paṃcavarisāṇi | viseso uṇa paṃcaguṇapūyāvihāṇaṃ,
paṃcapotthayapūyaṇaṃ, paṃcasatthiyadāṇaṃ, paṃcapaīyavoiṇaṃ ca tti | kei puṇa evaṃ jahannaṃ paṃcamāsāhiyapaṃcahiṃ varisehiṃ;
majjhimaṃ tu dasamāsāhiyadasavarisehiṃ; ukkiṭṭhaṃ puṇa jāvajjīvaṃ ti bhaṇaṃti | asahaṇo puṇa bālāī paṃcasu nāṇapaṃcamīsu ikkāsaṇe, tao paṃcasu nivīe, tao paṃcasu āyaṃbile, tao paṃcasu uvavāse kuṇaṃti tti | ujjhamaṇaṃ
puṇa tīe āīe majjhe aṃte vā kujjā | tattha savibhavāṇusāreṇa jiṇapūyā-putthayapaṃcayalehaṇa-saṃghadāṇāi
kāyavvaṃ | paṃcavihabalivitthāro nāṇagge, paṃca ṭhavaṇiyāo, paṃca masībhāyaṇāī, evaṃ lehaṇīo, paṃcakavaliyāo,
kaṭṭagaraṇāī, nikkhevaṇāiṃ, chiddadorayāiṃ, phulliyāo, uttariyāo | paṭṭadugulāiputthayaveḍhaṇayāiṃ | kuṃpiyāo,
paḍaliyāo, javamāliyāo, ṭhavaṇāyariyā, ṭhavaṇāyariyāsiṃhāsaṇāī, muhapottiyāo, sirikhaṃḍiyāo, piṃgāṇiyāo, paṭṭiyāo, vāsakuṃpagā; annāiṃ vi joḍaya-dhūvakaḍucchaya-kalasa-bhiṃgārathāla-ārattiyamāi paṃca
paṃca uvagaraṇāī dāyavvāiṃ | savittharūjjhamaṇe puṇa savvaṃ paṃcavīsaguṇaṃ kāyavvaṃ | nāṇapaṃcamītavodiṇe putthayapurao
nāṇassa taiyathuirūve anne vā namokāre paḍhiya, uṭṭhittu 'tamatimirapaḍala'iccāidaṃḍagaṃ bhaṇiya, kāussagganamokkāraṃ ciṃtiya, pāriya -
deviṃdavaṃdiyapaehiṃ parūviyāṇi nāṇāṇi kevalamaṇohimahaṃsuyāṇi
paṃcāvi paṃcamagahaṃ siyapaṃcamīe pūyā tavoguṇarayāṇa jiyāṇa diṃtu
19.17
iccāithuī dāūṇa puṇo jāṇuṭṭio nāṇathuttaṃ bhaṇiya, 'bodhāgādha'miccāināṇathuī paḍhai tti | nāṇattīvaṃdaṇavihī
19.18
tahā amāvāsāe, mayaṃtareṇa dīvūsavāmāvasāe, paḍilihiyanaṃdīsarajiṇabhavaṇapūyāpuvvaṃ uvavāsāisattavarisāṇi naṃdīsaratavo
19.19
tahā egā paḍivayā, dunni duijjāo, tinni tijjāo, evaṃ jāva paṃcadasīo uvavāsā bhavaṃti
jattha so sattasukkasattapattitavo
19.20
tahā cittapunnamāsīe ārabbha puṃḍarīyagaṇaharapūyāpuvvamuvavāsāiṇamannataraṃ tavo duvālasapunnimāo
puṃḍarīyatavo
19.34
tahā āsoyasiyaṭṭhamimāi aṭṭhadiṇe egāsaṇāitavo tti paḍhamā pāuḍī | evaṃ aṭṭhasu variseṃsu aṭṭhapāuḍio | ujjāvaṇe kaṇagamayaaṭṭhāvayapūyā kaṇaganisseṇī ya kāyavvā | pakkannāi phalāi cauvīsatthūṇi
jattha so aṭṭhāvayatavo
19.35
sattarasaya jiṇāṇaṃ sattarasayaṃ uvavāsāī tavo kīrai jattha so sattarasayajiṇārāhaṇatavo | ujjāvaṇe
laḍḍuyāi vatthūhiṃ sattarasayasaṃkhehiṃ sattarasayajiṇapūyā
19.36
paṃcanamokkārauvahāṇaasamatthassa navakārataveṇāvi ārāhaṇā kārijjai | sā ya imā-paḍhamapae
akkharāṇi satta, ao satta ikkāsaṇā | evaṃ paṃcakkhare bīyapae paṃca ikkāsaṇā | taiyapae satta | cautthapae
vi satta | paṃcamapae nava | chaṭṭhapae cūlāpayadugarūve solasa, sattamapae cūlāaṃtimapayadugarūve sattarassakkhare
sattarassa ikkāsaṇā | ujjāmaṇe ruppamayapaṭṭiyāe kaṇayalehaṇīe mayanāhiraseṇa akkharāṇi lihicā aṭṭhasaṭṭhīe
moyagehiṃ pūyā
19.37
titthayaranāmakaraṇāī vīsaṃ ṭhāṇāī pāraṃtariehiṃ vīsāe uvavāsehiṃ ārāhijjaṃti tti cālīsadaṇamāṇo vīsaṭṭhāṇatavo