Vidhimargaprapa 62
Vidhimārgaprapā 62
- Language
- Sanskrit
62.1
tesiṃ pūyaṃ paḍicchiya sahasattīe dhaṇehiṃ dhaṇatthiṇo vāhaṇehiṃ vāhaṇatthiṇo sahāehiṃ asahāe pīṇaṃto, baṃdigāyaṇāī asaṇa-vasaṇa-daviṇehiṃ tosaṃto, magge ceiyāī pūyaṃto bhaggāṇi ya uddharaṃto, takkammakārisu vacchallakuṇaṃto, takkajjāiṃ ciṃtaṃto, dutthiyadhammie sakāreṃto, dāṇeṇa dīṇe pamoyaṃto, mīyāṇamabhayaṃ deṃto, baṃdhaṇaṭṭhie
moyaṃto, paṃkamaggaṃ bhaggaṃ ca sagaḍāiyaṃ sippīhiṃ uddhāreṃto, chuhiya-tisiya-vāhiya-khinne anna-jala-bhesajja-vāhaṇehiṃ sutthī kuṇaṃto, dhammiyajaṇāṇaṃ khuddovaddave nivāreṃto, jiṇapavayaṇaṃ pabhāveṃto, baṃbhaceratavajutto titthāiṃ
pāviūṇa sattīe uvavāsaṃ kāuṃ ṇhāo kayabalikammo parihiyasuddhanevattho pupphavāsakuṃkumādamīseṇaṃ titthodageṇaṃ kalase bharittā, saṃghaṃ gaṃdhaviyavaggaṃ ca kuṃkumacaṃdaṇāihiṃ caccittā, acchabbhuyadaṃdavimāṇāivibhūīe
mūlanāyagassa ṇhavaṇaṃ kāuṃ, jagaīṃ jiṇabiṃbāī ceyāvaccagare ya ṇhavittā, tao paṃcāmayaṇhavaṇaṃ kāuṃ caṃdaṇakatthūrīkappūraīhiṃ vilevaṇaṃ suvaṇṇāmaraṇamallavatthāīhiṃ accaṇaṃ kappūragarupabhiraīhiṃ dhūvaṇaṃ pikkhaṇayaṃ mahaddhayārovaṇaṃ caliracamarabhiṃgārajaladhārākuṃkumavuṭṭhivisiṭṭhaṃ kappūrārattiyaṃ ca kāuṃ, deve vaṃdijjā | tao devasevae
sakkāriya aṭṭhāhiyaṃ avāriyasattaṃ vahāvijjā | tao muhogghāḍaṇe mālāugghaḍaṇe akkhayanihikkheve bhūmimaṃḍāhanikāe ya devassa kosaṃ saṃvaḍḍhiya dīṇāī aṇukaṃpiya tiloyanāhaṃ pūiya sagagaragiraṃ āpucchiya puṇo
daṃsaṇaṃ maggiya paṇamiya sahasattīe sakkāriya titthe aṇunnāpyaṃto paḍiniyattijjā | kameṇa sanagaraṃ patto
mahayā ūsaveṇaṃ rahasālāe devālayaṃ pavesiya paḍimaṃ gehamāṇijjā | tao sāhammiya-mitta-nāi-nāgarāī bhoyaṇāīhiṃ sammāṇiya saṃghaṃ pūijjā | tao guruṇā desaṇā kāyavvā | jahā -
taṃ atthaṃ taṃ ca sāmatthaṃ taṃ vinnāṇaṃ suuttamaṃ
sāhammiyāṇa kajjammi jaṃ vicaṃti susāvayā
62.2
annannadesāṇa samāgayāṇaṃ annannajāīī samubbhavāṇaṃ
sāhammiyāṇaṃ guṇasuṭṭhiyāṇaṃ titthaṃkarāṇaṃ vayaṇe ṭhiyāṇaṃ
62.3
vatthannapāṇāsaṇakhāimehiṃ pupphehiṃ pattehiṃ ya pupphalehiṃ
susāvayāṇaṃ karaṇijjameyaṃ kayaṃ tu jamhā bharahāhiveṇaṃ
62.4
rāyā deso nagaraṃ taṃ bhavaṇaṃ gihavaī ya so dhanno
viharanti jattha sāhū aṇuggahaṃ mannamāṇāṇaṃ
62.5
iṇameva mahādāṇaṃ eyaṃ ciya saṃpayāṇa mūlaṃ ti
eseva bhāvajanno jaṃ pūyā samaṇasaṃghassa
62.39
tao so saṃghavaī siddhāṃtāiputthalehaṇatthaṃ nāṇakosaṃ sāhāraṇasaṃvalayaṃ ca saṃvaḍḍhārijja tti
titthajattāvihī samatto