Pramāṇa · Search · About · API

Thanamga 2.1.4

Ṭhāṇaṃga 2.1.4

Language
Ardhamāgadhī Prakrit

2.1.4.1

dō kiriyāō paṇṇattāō taṁ jahā — jīvakiriyā cēva ajīvakiriyā cēva, jīvakiriyā duvihā paṇṇattā taṁ jahā — sammattakiriyā cēva micchattakiriyā cēva, ajīvakiriyā duvihā paṇṇattā taṁ jahā-iriyāvahiyā cēva samparāigā cēva.

2.1.4.2

dō kiriyāō paṇṇattāō taṁ jahā — kāiyā cēva āhigaraṇiyā cēva, kāiyā kiriyā duvihā paṇṇattā taṁ jahā — aṇuvarayakāyakiriyā cēva dupaüttakāyakiriyā cēva, āhigaraṇiyā kiriyā duvihā paṇṇattā taṁ jahā — sañjōyaṇādhikaraṇiyā cēva nivvattaṇādhikaraṇiyā cēva.

2.1.4.3

dō kiriyāō paṇṇattāō taṁ jahā — pāōsiyā cēva pāriyāvaṇiyā cēva, pāōsiyā kiriyā duvihā paṇṇattā taṁ jahā — jīvapāōsiyā cēva ajīvapāōsiyā cēva, pāriyāvaṇiyā kiriyā duvihā paṇṇattā taṁ jahā — sahatthapāriyāvaṇiyā cēva parahatthapāriyāvaṇiyā cēva.

2.1.4.4

dō kiriyāō paṇṇattāō taṁ jahā — pāṇātivāyakiriyā cēva apaccakkhāṇakiriyā cēva, pāṇātivāyakiriyā duvihā paṇṇattā taṁ jahā — sahatthapāṇātivāyakiriyā cēva parahatthapāṇātivāyakiriyā cēva, apaccakkhāṇakiriyā duvihā paṇṇattā taṁ jahā — jīvaapaccakkhāṇakiriyā cēva ajīvaapaccaka-akhāṇakiriyā cēva.

2.1.4.5

dō kiriyāō paṇṇattāō taṁ jahā — ārambhiyā cēva pāriggahiyā cēva, ārambhiyā kiriyā duvihā paṇṇattā taṁ jahā — jīvaārambhiyā cēva ajīva ārambhiyā cēva, pāriggahiyā kiriyā duvihā paṇṇattā taṁ jahā — jīvapāriggahiyā cēva ajīvapāriggahiyā cēva.

2.1.4.6

dō kiriyāō paṇṇattāō taṁ jahā — māyāvattiyā cēva micchādaṁsaṇavattiyā cēva, māyāvattiyā kiriyā duvihā paṇṇattā taṁ jahā — āyabhāvavaṅkaṇatā cēva parabhāva-vaṅkaṇatā cēva, micchādaṁsaṇavattiyā kiriyā duvihā paṇṇattā taṁ jahā — ūṇāiriyāmicchādaṁsaṇavattiyā cēva tavvaïrittamicchādaṁsaṇavattiyā cēva.

2.1.4.7

dō kiriyāō paṇṇattāō taṁ jahā — diṭṭhiyā cēva puṭṭhiyā cēva, diṭṭhiyā kiriyā duvihā paṇṇattā taṁ jahā — jīvadiṭṭhiyā cēva ajīvadiṭṭhiyā cēva, puṭṭhiyā kiriyā duvihā paṇṇatā taṁ jahā — jīvapuṭṭhiyā cēva ajīvapuṭṭhiyā cēva.

2.1.4.8

dō kiriyāō paṇṇattāō taṁ jahā — pāḍucciyā cēva sāmantōvaṇiyāiyā cēva, pāḍucciyā kiriyā duvihā pannattā, taṁ jahā — jīva pāḍucciyā cēva ajīva pāḍucciyā cēva, ēvaṁ sāmantōvaṇiyāiyā vi.

2.1.4.9

dō kiriyāō paṇṇattāō taṁ jahā — sāhatthiyā cēva nēsatthiyā cēva, sāhatthiyā kiriyā duvihā paṇṇattā taṁ jahā — jīvasāhatthiyā cēva ajīvasāhatthiyā cēva, ēvaṁ nēsatthiyā vi, dō kiriyāō paṇṇattāō taṁ jahā — āṇavaṇiyā cēva vēyāraṇiyā cēva, āṇavaṇiyā kiriyā duvihā paṇṇattā taṁ jahā — jīvaāṇavaṇiyā cēva ajīvaāṇavaṇiyā cēva, ēvaṁ vēyāraṇiyā vi.

2.1.4.10

dō kiriyāō paṇṇattāō taṁ jahā — anābhōgavattiyā cēva aṇavakaṅkhavattiyā cēva, anābhōga- vattiyā kiriyā duvihā paṇṇattā taṁ jahā — anāuttaāiyaṇatā cēva anāuttapamajjaṇatā cēva, aṇavakaṅkhavattiyā kiriyā duvihā paṇṇattā taṁ jahā — āyasarīraaṇavakaṅkhavattiyā cēva parasarīraaṇavakaṅkhavattiyā cēva.

2.1.4.11

dō kiriyāō paṇṇattāō taṁ jahā — pejjavattiyā cēva dōsavattiyā cēva, pejjavattiyā kiriyā duvihā paṇṇattā taṁ jahā — māyāvattiyā cēva lōbhavattiyā cēva, dōsavattiyā kiriyā duvihā paṇṇattā taṁ jahā — kōhē cēva māṇē cēva.

Translations (2)

Commentaries (2)