Pramāṇa · Search · About · API

Thanamga 2.3.18

Ṭhāṇaṃga 2.3.18

Language
Ardhamāgadhī Prakrit

2.3.18.1

dō asurakumārindā paṇṇattā taṁ jahā — camarē cēva balī cēva, dō nāgakumārindā paṇṇattā taṁ jahā — dharaṇē cēva bhūyāṇandē cēva, dō suvaṇṇakumārindā paṇṇattā taṁ jahā — vēṇudēvē cēva vēṇudālī cēva, dō vijjukumārindā paṇṇattā taṁ jahā — hariccēva harissahē cēva, dō aggikumārindā paṇṇattā taṁ jahā — aggisihē cēva aggimāṇavē cēva, dō dīvakumārindā paṇṇattā taṁ jahā — puṇṇē cēva visiṭṭhē cēva, dō udahikumārindā paṇṇattā taṁ jahā — jalakantē cēva jalappabhē cēva, dō disākumārindā paṇṇattā taṁ jahā — amiyagatī cēva amitavāhaṇē cēva, dō vāyukumārindā paṇṇattā taṁ jahā — vēlambē cēva pabhañjaṇē cēva, dō thaṇiyakumārindā pannattā taṁ jahā — ghōsē cēva mahāghōsē cēva, dō pisāindā paṇṇattā taṁ jahā — kālē cēva mahākālē cēva, dō bhūindā paṇṇattā taṁ jahā — surūvē cēva paḍirūvē cēva, dō jakkhindā paṇṇattā taṁ jahā — puṇṇabhaddē cēva māṇibhaddē, cēva dō rakkhasindā paṇṇattā taṁ jahā — bhīma cēva mahābhīmē cēva, dō kinnarindā paṇṇattā taṁ jahā — kinnarē cēva kimpurisē cēva, dō kimpurisindā paṇṇattā taṁ jahā — sappurisē cēva mahāpurisē cēva, dō mahōragindā paṇṇattā taṁ jahā — atikāē cēva mahākāē cēva, dō gandhavvindā paṇṇattā taṁ jahā — gītaratī cēva gīyajasē cēva, dō aṇapaṇṇindā paṇṇattā taṁ jahā — saṇṇi-hiē cēva sāmaṇṇē cēva, dō paṇapaṇṇindā paṇṇattā taṁ jahā — dhāē cēva vihāē cēva, dō isivāindā paṇṇattā taṁ jahā — isiccēva isivālaē cēva, dō bhūtavāindā paṇṇattā taṁ jahā — issarē cēva mahissarē cēva, dō kandidā paṇṇattā taṁ jahā — suvacchē cēva visālē cēva, dō mahākandidā paṇṇattā taṁ jahā hassē cēva hassaratī cēva, dō kumbhaṇḍindā paṇṇattā taṁ jahā — sēē cēva mahāsēē cēva, dō pataïndā paṇṇattā taṁ jahā — pattaē tēva patayavaī cēva, jōisiyāṇaṁ dēvāṇaṁ dō indā paṇṇattā taṁ jahā — candē cēva sūrē cēva.

2.3.18.2

sōhammīsāṇēsu ṇaṁ kappēsu dō indā paṇṇattā taṁ jahā — sakkē cēva īsāṇē cēva, saṇaṅkumāra-māhindēsu kappēsu dō indā paṇṇattā taṁ jahā — saṇaṅkumārē cēva māhindē cēva, bambhalōga-lantaēsu ṇaṁ kappēsu dō indā paṇṇattā taṁ jahā — bambhē cēva lantaē cēva, mahāsukka-sahassārēsu ṇaṁ kappēsu dō indā paṇṇattā taṁ jahā — mahāsukkē cēva sahassārē cēva, āṇata-pāṇata-āraṇa-accutēsu ṇaṁ kappēsu dō indā paṇṇattā taṁ jahā — pāṇatē cēva accutē cēva, mahāsukkasahassārēsu ṇaṁ kappēsu vimāṇā duvaṇṇā paṇṇattā taṁ jahā — hāliddā cēva sukillā cēva gēvijjagā ṇaṁ dēvā dō rayaṇīō uḍḍhamuccattēṇaṁ paṇṇattā.

Translations (2)

Commentaries (2)