Thanamga 2.3.5
Ṭhāṇaṃga 2.3.5
- Language
- Ardhamāgadhī Prakrit
2.3.5.1
dōṇhaṁ uvavāē paṇṇattē taṁ jahā — dēvāṇaṁ cēva nēraïyāṇaṁ cēva. dōṇhaṁ uvvaṭṭaṇā paṇṇattā taṁ jahā — nēraïyāṇaṁ cēva bhavaṇavāsīṇaṁ cēva. dōṇhaṁ cayaṇē paṇṇattē taṁ jahā — jōisiyāṇaṁ cēva vēmāṇiyāṇaṁ cēva. dōṇhaṁ gabbhavakkantī paṇṇattā taṁ jahā — maṇussāṇaṁ cēva pañcendiyatirikkha jōṇiyāṇaṁ cēva.
2.3.5.2
dōṇhaṁ gabbhatthāṇaṁ āhārē paṇṇattē taṁ jahā — maṇussāṇaṁ cēva pañcēdiyatirikkhajōṇiyāṇaṁ cēva.
2.3.5.3
dōṇhaṁ gabbhatthāṇaṁ vuḍḍhī paṇṇattā taṁ jahā — maṇussāṇaṁ cēva pañcēdiyatirikkhajōṇiyāṇaṁ cēva, ēvaṁ nivuḍḍhī, viguvvaṇā, gatipariyāē samugghātē, kālasañjōgē, āyātī, maraṇē.
2.3.5.4
dōṇhaṁ chavi pavvā paṇṇattā taṁ jahā — maṇussāṇaṁ cēva pañcidiyatirikkhajōṇiyāṇaṁ cēva. dō sukkasōṇitasambhavā paṇṇattā taṁ jahā — maṇussāṇaṁ cēva pañcidiyatirikkhajōṇiyā cēva. duvihā ṭhitī paṇṇattā taṁ jahā — kāyaṭṭhitī cēva bhavaṭṭhitī cēva. dōṇhaṁ kāyaṭṭhitī paṇṇattā taṁ jahā — maṇussāṇaṁ cēva pañcidiyatirikkhajōṇiyāṇaṁ cēva. dōṇhaṁ bhavaṭṭhitī paṇṇattā taṁ jahā — dēvāṇaṁ cēva nēraïyāṇaṁ cēva.
2.3.5.5
duvihē āuē paṇṇattē taṁ jahā — addhāuē cēva bhavāuē cēva. dōṇhaṁ addhāuē paṇṇattē taṁ jahā — maṇussāṇaṁ cēva pañcidiyatirikkhajōṇiyāṇaṁ cēva dōṇhaṁ bhavāuē paṇṇattē taṁ jahā — dēvāṇaṁ cēva nēraïyāṇaṁ cēva. duvihē kammē paṇṇattē taṁ jahā — padēsakammē cēva aṇubhāvakammē cēva. dō ahāuyaṁ pālentiṁ taṁ jahā — dēvaccēva nēraïyaccēva. dōṇhaṁ āuya-saṁvaṭṭaē paṇṇattē taṁ jahā — maṇussāṇaṁ cēva pañcēdiyatirikkhajōṇiyāṇaṁ cēva.
Translations (2)
- Ṭhāṇaṃga: Hindi translation (Dīparatnasāgara, 2019) — Hindi
- Ṭhāṇaṃga: Gujarati translation (Dīparatnasāgara, 2020) — Gujarati
Commentaries (2)
- Sthānāṅgavṛtti — Abhayadeva Sūri, Sanskrit
- Ṭhāṇaṃga: ṭīkānusārī vivecana — Muni Dīparatnasāgara, Gujarati