Thanamga 2.3.8
Ṭhāṇaṃga 2.3.8
- Language
- Ardhamāgadhī Prakrit
2.3.8.1
jambuddīvē dīvē mandarassa pavvayassa uttara-dāhiṇē ṇaṁ cullahimavanta-siharīsu vāsahara pavvaēsu dō mahaddahā paṇṇattā- bahusamatulalā avisēsamaṇāṇattā aṇṇamaṇṇaṁ ṇātivaṭṭanti āyāma-vikkhambha-uvvēha-saṇṭhāṇa-pariṇāhēṇaṁ taṁ jahā — paümaddahē cēva poṇḍarīyaddahē cēva, tattha ṇaṁ dō dēvayāō mahiḍḍhiyāō jāva paliōvamaṭṭhitīyāō parivasanti taṁ jahā — sirī cēva lacchī cēva, ēvaṁ-mahāhimavanta-ruppīsu vāsaharapavvaēsu dō mahaddahā paṇṇattā-bahusamatullā jāva taṁ jahā — mahāpaümaddahē cēva mahāpoṇḍarīyaddahē cēva, tattha ṇaṁ dō dēvayāō hiriccēva buddhiccēva, ēvaṁ-nisaḍha-nīlavantēsu tigiñchaddahē cēva kēsariddahē cēva, tattha ṇaṁ dō dēvatāō dhitī cēva kittī cēva.
2.3.8.2
jambuddīvē dīvē mandarassa pavvayassa dāhiṇē ṇaṁ mahāhimavantāō vāsaharapavvayāō mahāpaü-maddahāō dahāō dō mahānaīō pavahanti taṁ jahā — rōhiyaccēva harikantaccēva ēvaṁ-nisaḍhāō vāsaharapavvayāō tigiñchiddahāō dahāō dō mahānaīō pavahanti taṁ jahā — hariccēva sītōdaccēva, jambuddīvē dīvē mandarassa pavvayassa uttarēṇaṁ nīlavantāō vāsaharapavvatāō kēsariddahāō dahāō dō mahānaīō pavahanti taṁ jahā — sītā cēva nārikantā cēva, ēvaṁ- ruppīō vāsaharappatāō mahāpoṇḍarīyaddahāō dahāō dō mahānaīō pavahanti taṁ jahā — narakantā cēva ruppakūlā cēva, jambuddīvē dīvē mandarassa pavvayassa dāhiṇē ṇaṁ bharahē vāsē dō pavāyaddahā paṇṇattā-bahusamatullā taṁ jahā — gaṅgappavāyaddahē cēva sindhuppavāyaddahē cēva ēvaṁ-hēmavaē vāsē dō pavāyaddahā paṇṇattā-bahusamatullā taṁ jahā — rōhiyappavāyaddahē cēva rōhiyaṁsappavāyaddahē cēva, jambuddīvē dīvē mandarassa pavvayassa dāhiṇēṇaṁ harivāsē vāsē dō pavāyaddahā paṇṇattā bahusamatullā taṁ jahā — haripavāyaddahē cēva harikantappavāyaddahē cēva, jambuddīvē dīvē mandarassa pavvayassa uttara-dāhiṇēṇaṁ mahāvidēhē vāsē dō pavāyaddahā paṇṇattā-bahusamatullā jāva taṁ jahā — sītappavāyaddahē cēva sītōdappavāyaddahē cēva, jambuddīvē dīvē mandarassa pavvayassa uttarē ṇaṁ rammaē vāsē dō pavāyaddahā paṇṇattā-bahusamatullā jāva taṁ jahā — narakantappavāyaddahē cēva nārikantappavāyaddahē cēva, ēvaṁ-hēraṇṇavatē vāsē dō pavāyaddahā paṇṇattā-bahusamatullā jāva taṁ jahā — suvaṇṇakūlappavāyaddahē cēva ruppakūlappavāyaddahē cēva, jambuddīvē dīvē mandarassa pavvayassa uttarē ṇaṁ ēravaē vāsē dō pavāyaddahā paṇṇattā bahusamatullā jāva taṁ jahā — rattappavāyaddahē cēva rattāvaīpavāyaddahē cēva, jambuddīvē dīvē mandarassa pavvayassa dāhiṇē ṇaṁ bharahē vāsē dō mahānaīō paṇṇattāō-bahusamatullāō jāva taṁ jahā — gaṅgā cēva sindhū cēva, ēvaṁ-jahā pavātaddahā ēvaṁ naīō bhāṇiyavvāō, jāva ēravaē vāsē dō mahānaīō paṇṇattāō-bahusamatullāō jāva taṁ jahā — rattā cēva rattavatī cēva.
Translations (2)
- Ṭhāṇaṃga: Hindi translation (Dīparatnasāgara, 2019) — Hindi
- Ṭhāṇaṃga: Gujarati translation (Dīparatnasāgara, 2020) — Gujarati
Commentaries (2)
- Sthānāṅgavṛtti — Abhayadeva Sūri, Sanskrit
- Ṭhāṇaṃga: ṭīkānusārī vivecana — Muni Dīparatnasāgara, Gujarati