Thanamga 2.3.9
Ṭhāṇaṃga 2.3.9
- Language
- Ardhamāgadhī Prakrit
2.3.9.1
jambuddīvē dīvē bharahēravaēsu vāsēsu tītāē ussappiṇīē susamadūsamāē samāē dō sāgarōvamakōḍīō kālē hotthā. ēvaṁ imīsē ōsappiṇīē jāva pannattē, ēvaṁ āgamissāē ussappiṇīē jāva bhavissati.
2.3.9.2
jambuddīvē dīvē bharahēravaēsu vāsēsu tītāē ussappiṇīē susamāē samāē maṇuyā dō gāuyāiṁ uḍḍhaṁ uccattēṇaṁ hotthā, doṇṇi ya paliōvamāiṁ paramāuṁ pālaïtthā, ēvamimīsē ōsappiṇīē jāva pālaïtthā, ēvamāgamēssāē ussappiṇīē jāva pālayissanti.
2.3.9.3
jambuddīvē dīvē bharahēravaēsu vāsēsu ēgasamayē ēgajugē dō arahantavaṁsā uppajjiṁsu vā uppajjanti vā uppajjissanti vā ēvaṁ dō cakkavaṭṭivaṁsā, ēvaṁ dō dasāravaṁsā uppajjiṁsu vā uppajjanti vā uppajjissanti vā.
2.3.9.4
jambuddīvē dīvē bharahēravaēsu vāsēsu ēgasamayē ēgajugē dō arahantā uppajjiṁsu vā uppajjanti vā uppajjissanti vā ēvaṁ cakkavaṭṭiṇō ēvaṁ baladēvā ēvaṁ vāsudēvā [dasāravaṁsā] jāva uppajjiṁsu vā uppajjanti vā uppajjissanti vā.
2.3.9.5
jambuddīvē dīvē dōsu kurāsu maṇuyā sayā susamasusamamuttamaṁ iḍḍhiṁ pattā paccaṇubhavamāṇā viharanti taṁ jahā dēvakurāē cēva uttarakurāē cēva.
2.3.9.6
jambuddīvē dīvē dōsu vāsēsu maṇuyā sayā susamuttamaṁ iḍḍhiṁ pattā paccaṇubhavamāṇā viharanti taṁ jahā — harivāsē cēva rammagavāsē cēva.
2.3.9.7
jambuddīvē dīvē dōsu vāsēsu maṇuyā sayā susamadūsamamuttamamiḍḍhiṁ pattā paccaṇubhavamāṇā viharanti taṁ jahā — hēmavaē cēva hēraṇṇavaē cēva.
2.3.9.8
jambuddīvē dīvē dōsu khettēsu maṇuyā sayā dūsamasusamamuttamamiḍḍhiṁ pattā paccaṇubhavamāṇā viharanti taṁ jahā — puvvavidēhē cēva avaravidēhē cēva.
2.3.9.9
jambuddīvē dīvē dōsu vāsēsu maṇuyā chavvihampi kālaṁ paccaṇubhavamāṇā viharanti taṁ jahā — bharahē cēva ēravatē cēva.
Translations (2)
- Ṭhāṇaṃga: Hindi translation (Dīparatnasāgara, 2019) — Hindi
- Ṭhāṇaṃga: Gujarati translation (Dīparatnasāgara, 2020) — Gujarati
Commentaries (2)
- Sthānāṅgavṛtti — Abhayadeva Sūri, Sanskrit
- Ṭhāṇaṃga: ṭīkānusārī vivecana — Muni Dīparatnasāgara, Gujarati