Pramāṇa · Search · About · API

Thanamga 2.4.1

Ṭhāṇaṃga 2.4.1

Language
Ardhamāgadhī Prakrit

2.4.1.1

samayāti vā āvaliyāti vā jīvāti yā ajīvāti yā pavuccati, āṇāpāṇūti vā thōvēti vā jīvāti yā ajīvāti yā pavuccati, khaṇāti vā lavāti vā jīvāti yā ājīvāti yā pavuccati, ēvaṁ-muhuttāti vā ahōrattāti vā, pakkhāti vā māsāti vā, uḍūti vā ayaṇāti vā, saṁvaccharāti vā jugāti vā, vāsasayāti vā vāsasahassāi vā, vāsasatasahassāi vā vāsakōḍīi vā, puvvaṅgāti vā puvvāti vā, tuḍiyaṅgāti vā tuḍiyāti vā, aḍaḍaṅgāti vā aḍaḍāti vā, avavaṅgāti vā avavāti vā, hūhūaṅgāti vā hūhūyāti vā, uppalaṅgāti vā uppalāti vā, paümaṅgāti vā paümāti vā, naliṇaṅgāti vā naliṇāti vā, atthaṇikuraṅgāti vā atthaṇikurāti vā, aüaṅgāti vā, aüāti vā ṇaüaṅgāti vā ṇaüāti vā, paütaṅgāti vā paütāti vā, cūliyaṅgāti vā cūliyāti vā, sīsapahēliyaṅgāti vā sīsapahēliyāti vā, paliōvamāti vā sāgarōvamāti vā, ōsappiṇīti vā ussappiṇīti vā jīvāti yā ajīvāti yā pavuccati.

2.4.1.2

gāmāti vā nagarāti vā nigamāti vā rāyahāṇīti vā khēḍāti vā kabbaḍāti vā maḍambāti vā dōṇamuhāti vā paṭṭaṇāti vā āgarāti vā āsamāti vā sambāhāti vā saṇṇivēsāi vā ghōsāi vā ārāmāi vā ujjāṇāti vā vaṇāti vā vaṇasaṇḍāti vā vāvīti vā pukkharaṇīti vā sarāti vā sarapantīti vā agaḍāti vā talāgāti vā dahāti vā nadīti vā puḍhavīti vā udahīti vā vātakhandhāti vā uvāsantarāti vā valayāti vā viggahāti vā dīvāti vā samuddāti vā vēlāti vā vēiyāti vā dārāti vā tōraṇāti vā nēraïyāti vā nēraïyāvāsāti vā jāva vēmāṇiyāti vā vēmāṇiyāvāsāti vā kappāti vā kappavimāṇāvāsāti vā vāsāti vā vāsadharapavvatāti vā kūḍāti vā kūḍagārāti vā vijayāti vā rāyahāṇīti vā jīvāti yā ajīvāti yā pavuccati.

2.4.1.3

chāyāti vā ātavāti vā dōsiṇāti vā andhakārāti vā ōmāṇāti vā ummāṇāti vā atiyā-ṇagihāti vā ujjāṇagihāti vā avalimbāti vā saṇippavātāti vā jīvāti yā ajīvāti yā pavuccati.

2.4.1.4

dō rāsī paṇṇattā taṁ jahā — jīvarāsī cēva ajīvarāsī cēva.

Translations (2)

Commentaries (2)