Thanamga 3.3.1
Ṭhāṇaṃga 3.3.1
- Language
- Ardhamāgadhī Prakrit
3.3.1.1
tihiṁ ṭhāṇēhiṁ māyī māyaṁ kaṭṭu nō ālōejjā nō paḍikkamejjā nō nindejjā nō garihejjā nō viuṭṭejjā nō visōhejjā nō akaraṇayāē abbhuṭṭhejjā nō ahārihaṁ pāyacchittaṁ tavōkammaṁ paḍivajjējā, taṁ jahā — akarisuṁ vā'haṁ karēmi vā'haṁ karissāmi vā'haṁ.
3.3.1.2
tihiṁ ṭhāṇēhiṁ māyī māyaṁ kaṭṭu nō ālōejjā nō paḍikkamejjā jāva nō paḍivajjejjā taṁ jahā — akittī vā mē siyā avaṇṇē vā mē siyā avinaē vā mē siyā.
3.3.1.3
tihiṁ ṭhāṇēhiṁ māyī māyaṁ kaṭṭu nō ālōejjā jāva nō paḍivajjejjā, taṁ jahā — kittī vā mē parihāissāti jasē vā mē parihāissāti pūyāsakkārē vā mē parihāissati.
3.3.1.4
tihiṁ ṭhāṇēhiṁ māyī māyaṁ kaṭṭu ālōejjā paḍikkamejjā jāva paḍivajjejjā, taṁ jahā — māyi ṇaṁ assiṁ lōgē garahiē bhavati uvavāē garahiē bhavati āyātī garahiyā bhavati.
3.3.1.5
tihiṁ ṭhāṇēhiṁ māyī māyaṁ kaṭṭu ālōejjā jāva paḍivajjejjā taṁ jahā — amāissa ṇaṁ assiṁ lōgē pasatthē bhavati uvavātē pasatthē bhavati āyātī pasatthā bhavati.
3.3.1.6
tihiṁ ṭhāṇēhiṁ māyī māyaṁ kaṭṭu ālōejjā jāva paḍivajjejjā taṁ jahā — nāṇaṭṭhayāē daṁsaṇaṭṭhayāē carittaṭṭhayāē.
Translations (2)
- Ṭhāṇaṃga: Hindi translation (Dīparatnasāgara, 2019) — Hindi
- Ṭhāṇaṃga: Gujarati translation (Dīparatnasāgara, 2020) — Gujarati
Commentaries (2)
- Sthānāṅgavṛtti — Abhayadeva Sūri, Sanskrit
- Ṭhāṇaṃga: ṭīkānusārī vivecana — Muni Dīparatnasāgara, Gujarati