Pramāṇa · Search · About · API

Thanamga 3.3.15

Ṭhāṇaṃga 3.3.15

Language
Ardhamāgadhī Prakrit

3.3.15.1

caütthabhattiyassa ṇaṁ bhikkhussaṁ kappanti taō pāṇagāiṁ paḍigāhittaē taṁ jahā — ussēimē saṁsēimē cāuladhōvaṇē, chaṭṭhabhattiyassa ṇaṁ bhikkhussa kappanti taō pāṇagāiṁ paḍigāhittaē taṁ jahā — tilōdaē tusōdaē jōvadaē, aṭṭhamabhattiyassa ṇaṁ bhikkhussa kappanti taō pāṇagāiṁ paḍigāhittaē taṁ jahā — āyāmaē sōvīraē suddhaviyaḍē.

3.3.15.2

tivihē uvahaḍē paṇṇattē taṁ jahā — phaliōvahaḍē suddhōvahaḍē saṁsaṭṭhōvahaḍē, tivihē oggahitē paṇṇattē taṁ jahā — jaṁ ca ōgaṇhati jaṁ ca sāharati jaṁ ca āsagaṁsi pakkhivati, tividhā ōmōyariyā pannattā taṁ jahā — uvagaraṇōmōyariyā bhattapāṇōmōdariyā bhāvōmōdariyā. uvagaraṇōmōdariyā tivihā pannattā taṁ jahā — ēgē vatthē ēgē pātē ciyattōvahi-sāijjaṇayā, taō ṭhāṇā nigganthāṇa vā ṇigganthīṇa vā ahiyāē asubhāē akhamāē aṇissēsāē aṇāṇugāmiyattāē bhavanti taṁ jahā — kūaṇatā kakkaraṇatā avajjhāṇatā, taō ṭhāṇā nigganthāṇa vā nigganthīṇa vā hitāē suhāē khamāē ṇissēsāē āṇugāmiattāē bhavanti taṁ jahā — akūaṇatā akkaraṇatā aṇavajjhāṇatā.

3.3.15.3

taō sallā pannattā taṁ jahā — māyāsallē niyāṇasallē micchādaṁsaṇasallē, tihiṁ ṭhāṇēhiṁ samaṇē nigganthē saṅkhitta-viulatēulēssē bhavati taṁ jahā — āyāvaṇatāē khantikhamāē apāṇagēṇaṁ tavōkammēṇaṁ, timāsiyaṁ ṇaṁ bhikkhupaḍimaṁ paḍivaṇṇassa aṇagārassa kappanti taō dattīōē bhōaṇassa paḍigāhettaē taō pāṇagassa, ēgarātiyaṁ bhikkhupaḍimaṁ sammaṁ aṇaṇupālēmāṇassa aṇagārassa imē taō ṭhāṇā ahitāē asubhāē akhamāē aṇissēyasāē aṇāṇugamiyattāē bhavanti taṁ jahā — ummāyaṁ vā labhijjā dīhakāliyaṁ vā rōgātaṅkaṁ pāuṇejjā kēvalipannattāō vā dhammāō bhaṁsejjā, ēgarātiyaṁ bhikkhupaḍimaṁ sammaṁ aṇupālēmāṇassa aṇagārassa taō ṭhāṇā hitāē subhāē khamāē ṇissēsāē āṇugāmiyattāē bhavanti taṁ jahā — ōhināṇē vā sē samuppajjejjā maṇapajjavanāṇē vā sē samuppajjejjā kēvalanāṇē vā sē samuppajjejjā.

Translations (2)

Commentaries (2)