Thanamga 5.1.6
Ṭhāṇaṃga 5.1.6
- Language
- Ardhamāgadhī Prakrit
5.1.6.1
pañcahiṁ ṭhāṇēhiṁ ōhidaṁsaṇē samuppajjiukāmēvi tappaḍhamayāē khambhāejjā taṁ jahā — appabhūtaṁ vā puḍhaviṁ pāsittā tappaḍhamayāē khambhāejjā kunthurāsibhūtaṁ vā puḍhaviṁ pāsittā tappaḍhamayāē khambhāejjā, mahatimahālayaṁ vā mahōragasarīraṁ pāsittā tappaḍhamayāē khambhāejjā dēvaṁ vā mahiḍḍhiyaṁ jāva mahāsokkhaṁ pāsittā tappaḍhamayāē khambhāejjā purēsu vā pōrāṇāiṁ urālāiṁ mahatimahālayāiṁ mahānihāṇāiṁ pahīṇasāmiyāṇaïṁ pahīṇasēuyāiṁ pahīṇaguttāgārāiṁ ucchiṇṇasāmiyāiṁ ucchiṇṇasēuyāiṁ ucchiṇṇaguttāgārāiṁ jāiṁ imāiṁ gāmāgara-nagara-khēḍa-kabbaḍa-maḍamba-dōṇamuha-paṭṭaṇāsama-sambāha-saṇṇivēsēsu siṅghāḍaga-tiga-caükka-caccara-caümmuha-mahāpaha-pahēsu nagara-niddhamaṇēsu susāṇa-suṇṇāgārā-girikandara-santi-sēlōvaṭṭhāvaṇa-bhavaṇa-gihēsu saṁṇikkhittāi ciṭṭhanti tāiṁ vā pāsittā tappaḍhamatāē khambhāejjā, iccētēhiṁ pañcahiṁ ṭhāṇēhiṁ ōhi- daṁsaṇē samuppajiukāmē tappaḍhamayayāē khambhāejjā.
5.1.6.2
pañcahiṁ ṭhāṇēhiṁ kēvalavaranāṇandasaṇē samuppajiukāmē tappaḍhamayāē nō khambhāejjā taṁ jahā — appabhūtaṁ vā puḍhaviṁ pāsittā tappaḍhamayāē nō khambhāejjā, sēsaṁ tahēva jāva- bhavaṇagihēsu saṇṇikkhittāiṁ ciṭṭhanti tāiṁ vā pāsittā tappaḍhamayāē nō khambhāejjā; iccētēhiṁ pañcahiṁ ṭhāṇēhiṁ kēvalanāṇadaṁsaṇē samuppajjiukāmē tappaḍhamayāē nō khambhāejjā.
Translations (2)
- Ṭhāṇaṃga: Hindi translation (Dīparatnasāgara, 2019) — Hindi
- Ṭhāṇaṃga: Gujarati translation (Dīparatnasāgara, 2020) — Gujarati
Commentaries (2)
- Sthānāṅgavṛtti — Abhayadeva Sūri, Sanskrit
- Ṭhāṇaṃga: ṭīkānusārī vivecana — Muni Dīparatnasāgara, Gujarati