Thanamga 5.1.8
Ṭhāṇaṃga 5.1.8
- Language
- Ardhamāgadhī Prakrit
5.1.8.1
pañcahiṁ ṭhāṇēhiṁ purima-pacchimagāṇaṁ jiṇāṇaṁ duggamaṁ bhavati taṁ jahā — duāikkhaṁ duvvibhajjaṁ dupassaṁ dutitikkhaṁ duraṇucaraṁ. pañcahiṁ ṭhāṇēhiṁ majjhimagāṇaṁ jiṇāṇaṁ suggamaṁ bhavati taṁ jahā — suāikkhaṁ suvibhajjaṁ supassaṁ sutitikkhaṁ suraṇucaraṁ.
5.1.8.2
pañca ṭhāṇāiṁ samaṇēṇaṁ bhagavatā mahāvīrēṇaṁ samaṇāṇaṁ nigganthāṇaṁ niccaṁ vaṇṇitāiṁ niccaṁ kittitāiṁ niccaṁ buiyāiṁ niccaṁ pasatthāiṁ niccamabbhaṇunnātāiṁ bhavanti taṁ jahā — khantī muttī ajjavē maddavē lāghavē, pañca ṭhāṇāiṁ samaṇēṇaṁ bhagavatā mahāvīrēṇaṁ jāva abbhaṇuṇṇātāiṁ bhavanti, taṁ jahā — saccē sañjamē tavē ciyāē bambhacēravāsē, pañca ṭhāṇāiṁ samaṇēṇaṁ bhagavatā mahāvīrēṇaṁ samaṇāṇaṁ jāva abbhaṇuṇṇātāiṁ bhavanti, taṁ jahā — ukkhittacaraē nikkhittacaraē antacaraē pantacaraē lūhacaraē, pañca ṭhāṇāiṁ samaṇēṇaṁ bhagavatā jāva abbhaṇuṇṇātāiṁ bhavanti taṁ jahā — aṇṇātacaraē aṇṇaïlāyacaraē mōṇacaraē saṁsaṭṭhakappiē tajjātasaṁsaṭṭhakappiē, pañca ṭhāṇāiṁ samaṇēṇaṁ bhagavatā jāva abbhaṇuṇṇātāiṁ bhavanti taṁ jahā — uvaṇihiē suddhēsaṇiē saṅkhādattiē diṭṭhālābhiē puṭṭhalābhiē.
5.1.8.3
pañca ṭhāṇāiṁ samaṇēṇaṁ bhagavatā jāva abbhaṇuṇṇātāiṁ bhavanti taṁ jahā — āyambiliē nivviiē purimaḍḍhiē parimitapiṇḍavātiē bhiṇṇapiṇḍavātiē, pañca ṭhāṇāiṁ samaṇēṇaṁ bhagavatā jāva abbhaṇuṇṇātāiṁ bhavanti taṁ jahā — arasāhārē virasāhārē antāhārē pantāhārē lūhāhārē, pañca ṭhāṇāiṁ samaṇēṇaṁ bhagavatā jāva abbhaṇuṇṇātāiṁ bhavanti taṁ jahā — arasajīvī visarajīvī antajīvī pantajīvī lūhajīvī, pañca ṭhāṇāiṁ samaṇēṇaṁ bhagavatā jāva abbhaṇuṇṇātāiṁ bhavanti taṁ jahā — ṭhāṇātiē ukkuḍuāsaṇiē paḍimaṭṭhāī vīrāsaṇiē nēsajjiē, pañca ṭhāṇāiṁ samaṇēṇaṁ bhagavatā jāva abbhaṇuṇṇātāiṁ bhavanti taṁ jahā — daṇḍāyatiē lagaṇḍasāī ātāvaē avāuḍaē akūṇḍayaē.
Translations (2)
- Ṭhāṇaṃga: Hindi translation (Dīparatnasāgara, 2019) — Hindi
- Ṭhāṇaṃga: Gujarati translation (Dīparatnasāgara, 2020) — Gujarati
Commentaries (2)
- Sthānāṅgavṛtti — Abhayadeva Sūri, Sanskrit
- Ṭhāṇaṃga: ṭīkānusārī vivecana — Muni Dīparatnasāgara, Gujarati