Pramāṇa · Search · About · API

Nayadhammakahao 1.2.10

Nāyādhammakahāo 1.2.10

Language
Ardhamāgadhī Prakrit

1.2.10.1

taē ṇaṁ sē dhaṇē satthavāhē aṇṇayā kayāiṁ lahusayaṁsi rāyāvarāhaṁsi sampalittē jāē yāvi hōtthā, taē ṇaṁ sē nagaraguttiyā dhaṇaṁ satthavāhaṁ gēṇhanti gēṇhittā jēṇēva cāraē tēṇēva uvāgacchanti uvāgacchittā cāragaṁ anuppavēsanti anuppavēsittā vijaēṇaṁ takkarēṇaṁ saddhiṁ ēyagaō haḍibandhaṇaṁ karēnti.

1.2.10.2

taē ṇaṁ sā bhaddā bhāriyā kallaṁ jāva jalantē vipulaṁ asaṇaṁ pāṇaṁ khāimaṁ sāimaṁ uvakkhaḍēi (2) bhōyaṇapiḍayaṁ karēi karēttā bhōyaṇāiṁ pakkhivaï lañchiya-muddiyaṁ karēi karēttā ēgaṁ ca surabhiṁ vāripaḍipunnaṁ dagavārayaṁ karēi karētā panthayaṁ dāsacēḍayaṁ saddāvēi saddāvēttā ēvaṁ vayāsī — gacchaha ṇaṁ tumaṁ dēvāṇuppiyā imaṁ vipulaṁ asaṇaṁ pāṇaṁ khāimaṁ sāimaṁ hāya cāragasālāē dhaṇassa satthavāhassa uvaṇēhi.

1.2.10.3

taē ṇaṁ sē panthaē bhaddāē satthavāhīē ēvaṁ vuttē samāṇē haṭṭhatuṭṭē taṁ bhōyaṇapiḍayaṁ taṁ ca surabhivaravāripaḍipunnaṁ dagavārayaṁ gēṇhaï gēṇhittā sayāō gihāō paḍiṇikkhamaï paḍiṇikkhamittā rāyagihaṁ nagara majjhaṁmajjhēṇaṁ jēṇēva cāragasālā jēṇēva dhaṇē satthavāhē tēṇēva uvāgacchaï uvāgacchittā bhōyaṇapiḍayaṁ ṭhavēi ṭhavēttā ullañchēi ullañchēttā bhāyaṇāiṁ gēṇhaï gēṇhittā bhāyaṇāiṁ ṭhāvaï ṭhāvittā hatthasōyaṁ dalayaï dalaïttā ghaṇaṁ satthavāhaṁ tēṇaṁ vipulēṇaṁ asaṇa-pāṇa-khāima-sāimēṇaṁ parivēsēi.

1.2.10.4

taē ṇaṁ sē vijaē takkarē dhaṇaṁ satthavāhaṁ ēvaṁ vayāsī — tubbhē ṇaṁ dēvāṇuppiyā mamaṁ ēyāō vipulāō asaṇa-pāṇa-pāṇa-khāima-sāimāō saṁvibhāgaṁ karēhi, taē ṇaṁ sē dhaṇē satthavāhē vijayaṁ takkaraṁ ēvaṁ vayāsī — aviyāiṁ ahaṁ vijayā ēyaṁ vipulaṁ asaṇaṁ pāṇaṁ khāimaṁ sāimaṁ kāyāṇaṁ vā suṇagāṇaṁ vā dalaējjā ukkuruḍiyāē vā ṇaṁ chaḍḍējjā nō cēva ṇaṁ tava puttaghāyagassa puttamāragassa arissa vēriyassa paḍiṇīyassa paccāmittassa ēttō vipulāō asaṇa-pāṇa-khāima-sāimāō saṁvibhāgaṁ karējjāmi, taē ṇaṁ sē dhaṇē satthavāhē taṁ vipulaṁ asaṇaṁ pāṇaṁ khāimaṁ sāimaṁ āhārēi taṁ panthayaṁ paḍivisajjēi, taē ṇaṁ sē panthaē dāsacēḍaē taṁ bhōyaṇapiḍagaṁ giṇhaï giṇhittā jāmēva disiṁ pāubbhūē tāmēva disiṁ paḍigaē.

1.2.10.5

taē ṇaṁ tassa dhaṇassa satthavāhassa taṁ vipulaṁ asaṇaṁ pāṇaṁ khāimaṁ sāimaṁ āhāriyassa samāṇassa uccāra-pāsavaṇē ṇaṁ uvvāhitthā, taē ṇaṁ sē dhaṇē satthavāhē vijayaṁ takkaraṁ ēvaṁ vayāsī — ēhi tāva vijayā ēgantamavakkāmō jēṇaṁ ahaṁ uccāra-pāsavaṇaṁ pariṭṭhavēmi, taē ṇaṁ sē vijaē takkarē dhaṇaṁ satthāhaṁ ēvaṁ vayāsī — tujjhaṁ dēvāṇuppiyā! vipulaṁ asaṇaṁ pāṇaṁ khāimaṁ sāimaṁ āhāriyassa atthi uccārē vā pāsavaṇē vā mamaṁ ṇaṁ dēvāṇuppiyā! imēhiṁ bahūhiṁ kasappahārēhi ya chivāpahārēhi ya layāpahārēhi ya taṇhāē ya chuhāē ya parabbhavamāṇassa natthi kēi uccārē vā pāsavaṇē vā taṁ chandēṇaṁ tumaṁ dēvāṇuppiyā! ēgantē avakkamittā uccāra-pāsavaṇaṁ pariṭṭhavēhi.

1.2.10.6

taē ṇaṁ sē dhaṇē satthavāhē vijaēṇaṁ takkarēṇaṁ ēvaṁ vuttē samāṇē tusiṇīē sañciṭṭhaï, taē ṇaṁ sē dhaṇē satthavāhē muhuttantarasasa baliyatarāgaṁ uccāra-pāsavaṇēṇaṁ uvvāhijjamāṇē vijayaṁ takkaraṁ ēvaṁ vayāsī — ēhiṁ tāva vijayā! ēgantamakkamāṇō jēṇaṁ ahaṁ uccāra-pāsavaṇaṁ pariṭṭhavēmi, taē ṇaṁ sē vijaē takkarē dhaṇaṁ satthavāhaṁ ēvaṁ vayāsī — jaï ṇaṁ puṇaṁ dēvāṇuppiyā! tāō vipulāō asaṇa-pāṇa-khāima-sāimāō saṁvibhāgaṁ karēhi tatō'haṁ tumēhiṁ saddhiṁ ēgantaṁ avakkamāmi.

1.2.10.7

taē ṇaṁ sē dhaṇē satthavāhē vijayaṁ takkaraṁ ēvaṁ vayāsī — ahaṁ ṇaṁ tubbhaṁ tāō vipulāō asaṇa-pāṇa-khāima-sāimāō saṁvibhāgaṁ karissāmi, taē ṇaṁ sē vijaē takkarē dhaṇassa satthavāhassa ēyamaṭṭhaṁ paḍisuṇēi.

1.2.10.8

taē ṇaṁ sē dhaṇē satthavāhē vijaēṇaṁ takkarēṇaṁ saddhiṁ ēgantē avakkamaï uccārapāsavaṇaṁ pariṭṭhavēi āyantē cōkkhē paramasuibhūē tamēva ṭhāṇaṁ uvasaṅkamittā ṇaṁ viharaï, taē ṇaṁ sā bhaddā kallaṁ jāva jalantē vipulaṁ asaṇaṁ0 jāva parivēsēi.

1.2.10.9

taē ṇaṁ sē dhaṇē satthavāhē vijayassa takkarassa tāō vipulāō asaṇa-pāṇa-khāima-sāimāō saṁvibhāgaṁ karēi, taē ṇaṁ sē dhaṇē satthavāhē panthagaṁ dāsacēḍayaṁ visajjēi.

1.2.10.10

taē ṇaṁ sē panthaē bhōyaṇapiḍayaṁ gahāya cāragāō paḍiṇikkhamaï paḍinaṇikkhamittā rāyagihaṁ nayaraṁ majjhaṁmajjhēṇaṁ jēṇēva saē gihē jēṇēva bhaddā satthavāhī tēṇēva uvāgacchaï uvāgacchittā bhaddaṁ satthavāhiṁ ēvaṁ vayāsī — ēvaṁ khalu dēvāṇuppiē dhaṇē satthavāhē tava puttaghāyagassa paccāmittassa tāō vipulāō asaṇa-pāṇa-khāima-sāimāō saṁvibhāgaṁ karēi.

Translations (2)

Commentaries (2)