Pramāṇa · Search · About · API

Nayadhammakahao 1.2.4

Nāyādhammakahāo 1.2.4

Language
Ardhamāgadhī Prakrit

1.2.4.1

tattha ṇaṁ rāyagihē nayarē vijaē nāma takkarē hōtthā- pāvē caṇḍāla rūvē bhīmatararudda kammē ārusiya-ditta-rattanayaṇē kharapharusa-mahalla-vigaya-bhacchadāḍhiē asumpuḍiyaüṭṭhē uddhaya-païṇṇa-lambatamuddhaē bhamara-rāhuvaṇṇaṁ niraṇukkōsē niraṇutāvē dāruṇē païbhaē saṁsaïē niraṇuṅkapē ahīva ēgantadiṭṭhīē khurēva ēgantadhārāē giddhēva āmisatallicchē aggimiva savvabhakkhī jalamiva savvaggāhī ukkañcaṇa-vañcaṇa-māyā-niyaḍi-kūḍa-kavaḍa-sāi-sampaōga-bahulē ciranagaraviṇaṭṭha-duṭṭha-sīlāyāra-carittē jūyappasaṅgī majjappasaṅgī bhōjjappasaṅgī maṁsappasaṅgī dāruṇē hiyavadāraē sāhasiē sandhicchēyaē uvavahiē vissambhaghāī ālīvaga-titthabhēya-lahuhatthara paüttē parassa davvaharaṇammi niccaṁ anubaddhē tivvavērē rāyagihassa nagarassa bahūṇi ahagamaṇāṇi ya niggamaṇāṇi ya bārāṇi ya avabārāṇi ya chiṇḍīō ya khaṇḍīō ya nagaranaddhamaṇāṇi ya saṁvaṭṭaṇāṇi ya nivvaṭṭaṇāṇi ya jūyakhalayāṇi ya pāṇāgārāṇi ya vēsāgārāṇi ya takkaraṭṭhāṇāṇi ya takkaradharāṇi ya sindhāḍagāṇi ya tigāṇi ya caükkāṇi ya paccarāṇi ya nāgagharāṇi ya bhūyagharāṇi ya jakkhadēulāṇi ya sabhāṇi ya pavāṇi ya paṇiyasālāṇi ya sunnagharāṇi ya.

1.2.4.2

ābhōēmāṇē ābhōēmāṇē maggamāṇē gavēsamāṇē bahujaṇassa chiddēsu ya visamēsu ya vihurēsu ya vasaṇēsu ya abbhudaēsu ya ussavēsu ya pasavēsu ya dihīsu ya chaṇēsu ya jaṇṇēsu ya pavvaṇīsu ya mattapamattassa ya vakkhittassa ya vāulassa ya suhiyassa ya duhiyassa ya vidēsatthassa ya vippavasiyassa ya maggaṁ ca chiddaṁ ca virahaṁ ca antaraṁ ca maggamāṇē gavēsamāṇē ēvaṁ ca ṇaṁ viharaï bahiyā vi ya ṇaṁ rāyagihassa nagarassa ārāmēsu ya ujjāṇēsu ya vāvi-pōkkharaṇi-dīhiya-guñjāliya-sara-sarapantiya sarasarapantiyāsu ya jiṇṇujjāṇēsu ya bhaggakūvēsu ya māluyākacchaēsu ya susāṇēsu ya girikandarēsu ya lēṇēsu ya uvaṭṭhāṇēsu ya bahujaṇassa chiddēsu ya jāva antaraṁ ca maggamāmē gavēsamāṇē ēvaṁ ca ṇaṁ viharaï.

Translations (2)

Commentaries (2)