Pramāṇa · Search · About · API

Nayadhammakahao 1.2.8

Nāyādhammakahāo 1.2.8

Language
Ardhamāgadhī Prakrit

1.2.8.1

taē ṇaṁ sē panthaē dāsacēḍaē taō muhuttantarassa jēṇēva dēvadinnē dāraē ṭhaviē tēṇēva uvāgacchaï uvāgacchittā dēvadinnaṁ dāragaṁ taṁsi ṭhāṇaṁsi apāsamāṇē rōyamāṇē kandamāṇē vilavamāṇē dēvadinnassa dāragassa savvaō samantā maggaṇa-gavēsaṇaṁ karēi dēvadinnassa dāragassa katthaï suiṁ vā khuiṁ vā paüttiṁvā alabhamāṇē jēṇēva saē gihē jēṇēva dhaṇē satthavāhē tēṇēva uvāgacchaï uvāgacchittā dhaṇaṁ satthavāhaṁ ēvaṁ vayāsī — ēvaṁ khalu sāmī bhaddā satthavāhī dēvadinnaṁ dārayaṁ ṇhāyaṁ jāva savvālaṅkāravibhūsiyaṁ mama hatthaṁsi dalayaï taē ṇaṁ ahaṁ dēvadinnaṁ dārayaṁ kaḍīē giṇhāmi giṇhittā jāva maggaṇa-gavēsaṇaṁ karēmi taṁ na najjaï ṇaṁ sāmī! dēvadinnē dāraē kēṇaï nītē vā avahitē vā akkhittē vā- pāyavaḍiē dhaṇassa satthavāhassa ēyamaṭṭhaṁ nivēdēi.

1.2.8.2

taē ṇaṁ sē dhaṇē satthavāhē panthassa dāsacēḍagassa ēyamaṭṭhaṁ sōccā nisammaṁ tēṇaṁ ya mahayā puttasōēṇābhibhūē samāṇē parasu-niyattē va campagapāyavē dhasatti dharaṇīyalaṁsi savvaṅgēhiṁ saṇṇivaïē taē ṇaṁ sē dhaṇē satthavāhē taō muhuttantarassa āsatthē paccāgayapāṇē dēvadinnassa dāragassa savvaō samantā maggaṇa-gavēsaṇaṁ karēi dēvadinnassa dāragassa katthaï suiṁ vā khuiṁ vā paüttiṁ vā alabhāmāṇē jēṇēva saē gihē tēṇēva uvāgacchaï uvā-gacchittā mahatthaṁ pāhuḍaṁ gēṇhaï gēṇhittā jēṇēva nagaraguttiyā tēṇēva uvāgacchaï uvāgacchittā taṁ mahatthaṁ pāhuḍaṁ uvaṇēi uvaṇēttā ēvaṁ vayāsī—

1.2.8.3

ēvaṁ khalu dēvāṇuppiyā mama puttē bhaddāē bhāriyāē attaē dēvadinnē nāmaṁ dāraē iṭṭhē jāva umbarapupphaṁ piva dullahē savaṇayāē kimaṅga puṇa pāsaṇayāē? taē ṇaṁ sā bhaddā dēvadinnaṁ ṇhāyaṁ savvālaṅkāravibhūsiyaṁ panthagassa hatthē dalāi jāva pāyavaḍiē taṁ mama nivēdēi taṁ icchāmi ṇaṁ dēvāṇuppiyā! dēvadinnassa dāragassa savvaō samantā maggaṇa-gavēsaṇaṁ kayaṁ, taē ṇaṁ tē nagaragōttiyā dhaṇēṇaṁ satthavāhēṇaṁ ēvaṁ vuttā samāṇā saṇṇaddha-baddha-vammiya-kavayā uppīliya-sarāsaṇa-vaṭṭiyā jāva gahiyā-uha-paharaṇā dhaṇēṇaṁ satthavāhēṇaṁ saddhiṁ rāyagihassa nagarassa bahusu aïgamaṇēsu ya jāva pavāsu ya maggaṇa-gavēsaṇaṁ karēmāṇā rāyagihāō nagarāō paḍinikkhamanti paḍinikkhamittā jēṇēva jiṇṇujjāṇē jēṇēva bhaggakūvaē tēṇēva uvāgacchanti uvāgacchittā dēvadinnassa dāragassa sarīragaṁ nippāṇaṁ niccēṭṭhaṁ jīvavippajaḍhaṁ pāsanti pāsittā hā hā ahō akajjamitti kaṭṭu dēvadinnaṁ dāragaṁ bhaggakūvāō uttārēnti dhaṇassa satthavāhassa hatthē dalayanti.

Translations (2)

Commentaries (2)