Pramāṇa · Search · About · API

Nayadhammakahao 2.1.2.1

Nāyādhammakahāo 2.1.2.1

Language
Ardhamāgadhī Prakrit

2.1.2.1.1

jaï ṇaṁ bhantē! samaṇēṇaṁ jāva sampattēṇaṁ dhammakahāṇaṁ paḍhamassa vaggassa paḍhamajjhayaṇassa ayamaṭṭhaṁ pannattē biiyassa ṇaṁ bhantē ajjhayaṇassa samaṇēṇaṁ bhagavayā mahāvīrēṇaṁ jāva sampattēṇaṁ kē aṭṭhē pannattē?

2.1.2.1.2

ēvaṁ khalu jambū! tēṇaṁ kālēṇaṁ tēṇaṁ samaēṇaṁ rāyagihē nayarē, guṇasilaē cēiē, sāmī samōsaḍhē, parisā niggayā jāva pajjuvāsaï.

2.1.2.1.3

tēṇaṁ kālēṇaṁ tēṇaṁ samaēṇaṁ rāī dēvī camaracañcāē rāyahāṇīē ēvaṁ jahā kālī tahēva āgayā, naṭṭavihi uvadaṁsittā paḍigayā, bhantēti bhagavaṁ gōyamē! puvvabhava pucchā, ēvaṁ khalu gōyamā! tēṇaṁ kālēṇaṁ tēṇaṁ samaēṇaṁ āmalakappā nayarī, ambasālavaṇē cēiē, jiyasattū rāyā, rāī gāhāvaī, rāyasirī bhāriyā, rāī dāriyā, pāsassa samōsaraṇaṁ, rāī dāriyā jahēva kālī tahēva nikkhantā, tahēva sarīrabāusiyā jāyā taṁ cēva savvaṁ jāva antaṁ kāhii.

2.1.2.1.4

ēvaṁ khalu jambū! biiyajjhayaṇassa nikkhēvaō.

Translations (2)

Commentaries (2)