[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The Śvetāmbara canon (Siddhānta)](https://indike.org/pramana/in.jaina.sveta) › [The Chedasūtras (disciplinary texts)](https://indike.org/pramana/in.jaina.sveta.cheda) › [Nisīha](https://indike.org/pramana/in.jaina.sveta.cheda.4) › [Nishithavisheshacurni](https://indike.org/pramana/in.jaina.sveta.cheda.4!curni) › v16.p186 # Nisiha v16.p186 Niśīthaviśeṣacūrṇi v16.p186 - **Language:** Māhārāṣṭrī Prakrit ### [v16.p186](https://indike.org/pramana/in.jaina.sveta.cheda.4!curni.v16.p186) - je aṭṭhamaṃ na karei to cauguruṃ, cāummāsie chaṭuṃ na kareti to caulahuṃ, pakkhie cautthaṃ na kareti to māsaguruṃ | jahā ete dosā tamhā jahā bhaṇito tavo kāyavvo | bitiyaṃ avavādeṇa na karejjā pi | uvavāsassa asahū na kareja, gilāṇo vā na karejā, gilāṇapaḍiyarago vā, so uvavāsaṃ veyāvaccaṃ ca dovi kāuṃ asamattho, evamādiehiṃ kāraṇehiṃ pajjosavaṇāe āhāreṃto suddho || mū. (652 ) je bhikkhū annautthiyaṃ vā gāratthiyaṃ vā pajjosaveti, pajjosaveṃtaṃ vā sāti0 || \[ bhā. 3218\] pajjosavaṇā kappaṃ, pajjosavaṇāe jo tu kahejā | gahi annatitthi osannaṃ, saṃjatīṇaṃ ca āṇādī || cū-posavaṇā puvvavaṇṇitā | gihatthāṇaṃ annatitthiyāṇaṃ - gihatthīṇaṃ annatitthīṇīṇaṃ, osannāṇa ya saṃjatīṇaya - jo ete pajjosaveti, eteṣāmagato paryuṣaṇākalpaṃ paṭhatītyarthaḥ | tassa cauguruṃ | āṇādiyā ya dosā || \[ bhā. 3219\] gihi annatitthi osanna dugaṃ te guṇehanuvaveyā | sammīsavāsa - saṃkādiṇo ya dosā samaṇivagge || cū- gihatthā gihatthīṇīo evaṃ dugaṃ | ahavā - annatitthigā, annatitthiṇīto | ahavā - osannā osaṇṇīo ete dugā, saṃjamaguṇehiṃ anuvaveyā, tena tesiṃ purato na kaḍhijjati | ahavā - etesiṃ sammīsavāse dosā bhavaṃti | itthīsu ya saṃkamādiyā dosā bhavaṃti | sajatīo jai vi saṃjamaguṇehiṃ uvaveyāo tathāpi sammīsavāsadoso saṃkādoso ya || \[bhā.3220\]divasato na caiva kappati, khettaṃ ca paḍucca suṇejjamannesiṃ | asatī ya va itaresiṃ, daṃḍigamādatthito kaḍḍe || cū- pajjosavaṇākappo divasato kaḍḍiḍaṃ na caiva kappati | jattha vi khettaṃ paḍucca kaḍḍijati jahā divasato ānaṃdapure mūle cetiyaghare savvajanasamakkhaṃ kaḍhijjati, tattha vi sāhūna kaḍheti, pāsattho kaḍḍhati, taṃ sāhū suṇejjā, na doso | pāsatthāṇa vā kaḍakassa asati iṃḍigeṇa vā abbhaṭṭhio saḍḍehiṃ vā tāhe divasato kaḍḍati | pajjosavaṇākappakaḍḍaṇe imā sāmāyārī - appaṇo uvassae pādosie āvassae kate kālaṃ ghettuṃ kāle suddhe vā paṭṭhavettā kahijati, evaṃ causu vi rātīsu | pajjosavaṇārātīe puṇa kaḍḍī savve sādhū mappāvaṇīyaṃ kāusaggaṃ kareṃti, “pajjosavaṇakappassa samappāvaṇīyaṃ karemi kāussaggaṃ jaṃ khaṃḍiyaṃ jaṃ virāhiyaṃ jaṃ na pūriyaṃ savvo daṃḍao kaḍhiyavvo jāva vosirāmi tti |” logassujoyakaraṃ cittena ussārettā puṇo loyassujjoyagaraṃ kaḍḍhittā savve sāhavo nisīyaṃti | jeṇa kaḍḍhito so tāhe kālassa paḍikkamati, tāhe varisākālaṭhavaṇe ṭhavijjati || esa vidhī bhaṇitā | kāraṇe gihattha-annatitthiya-pāsatthe ya pajjosaveti | kahaṃ ? bhaṇṇati \[bhā. 3221\] bitiyaṃ gihi osannā, kaḍḍiyaṃ tammi ratti ejjāhi | asatī ya saṃjatīṇaṃ, jayaṇāe divasato kaḍḍe | cū- jati kaḍijjaṃti gihatthā annatitthiyā osaṇṇā vā āgacchejjā to vi na ṭhavejjā | evaṃ sejiya mādiitthīsu vi | saṃjatīto vi appaṇo paḍissae ceva rāto kahuṃti | jai puṇa saṃjatīe saṃbhotiyāṇa kaḍuṃtiyā na hoja to āhāpahāṇāṇaṃ kulāṇaṃ āsaṇṇe sapaḍiduvāre saṃloe sāhu sāhuṇīṇa ya aṃtare cilimilaṃ dāuṃ divasato kaḍhijjati pūrvavat || - [Previous: v16.p185](https://indike.org/pramana/in.jaina.sveta.cheda.4!curni.v16.p185) - [Next: v16.p187](https://indike.org/pramana/in.jaina.sveta.cheda.4!curni.v16.p187) - [Up: v16](https://indike.org/pramana/in.jaina.sveta.cheda.4!curni.v16) ## Linked texts (1) - [Nisīha](https://indike.org/pramana/in.jaina.sveta.cheda.4.10.46.1) — Viśākhagaṇi, Ardhamāgadhī Prakrit --- Source: [https://indike.org/pramana/in.jaina.sveta.cheda.4!curni.v16.p186](https://indike.org/pramana/in.jaina.sveta.cheda.4!curni.v16.p186) · Pramāṇa