Pramāṇa · Search · About · API

Mahanisiha 2.2: Uddeśaka 2

Mahānisīha 2.2

Language
Ardhamāgadhī Prakrit

Uddeśaka 2

2.2.254

sārīreyara-bhedamiyaṃ jaṃ bhaṇiyaṃ taṃ pavakkhaī|
sārīraṃ goyamā dukkhaṃ supariphuḍaṃ tamavadhāraya||

2.2.255

vālagga-koḍi-lakkha-mayaṃ bhāgamettaṃ chive dhuve|
athira-annannapadesasaraṃ kuṃthuṃ manaha vittiṃ khaṇaṃ||

2.2.256

teṇa vi karakatti salleuṃ hiyayamuddhasae tanū|
sīyaṃtī aṃgamaṃgāiṃ guru uveī
savvasarīrassa'bbhaṃtaraṃ kaṃpe tharatharassaya||

2.2.257

kuṃthu-pharīsiyamettassa jaṃ salasale-tanuṃ|
tamavasaṃ bhinna-savvaṃge kalayala-ḍajjhaṃta-mānase||

2.2.258

ciṃtiṃto hā kiṃ kimeyaṃ bāhe guru-pīḍākaraṃ |
dīhuṇha-mukkanīsāse dukkhaṃ dukkheṇa nitthare||

2.2.259

kimeyaṃ kiyaciraṃ bāhe kiyacireṇeva niṭṭhihī |
kahaṃ vā haṃ vimuccīsaṃ imāo dukkhasaṃkaḍā||

2.2.260

gacchaṃ ciṭṭhaṃ suvaṃ uṭṭhaṃ dhāvaṃ nāsaṃ palāmi u|
kaṃḍugayaṃ kiṃ va pakkhoḍaṃ kiṃ vā etthaṃ karemi haṃ||

2.2.261

evaṃ tivaggavāvāraṃ ciccoru-dukkha-saṃkaḍe|
paviṭṭho bāḍha-saṃkhejjā āvaliyāo kilissiuṃ||

2.2.262

muṇe huṃ kaṃḍuyamesa kaṃḍūye annahā no uvassame|
tā eyajjhavasāeṇaṃ goyama nisuṇesuṃ jaṃ kare||

2.2.263

aha taṃ kuṃthuṃ vāvāe jai no annattha-gayaṃ bhave|
kaṃḍuemāṇo'ha bhittādī anughasamāṇo kilammae||

2.2.264

jai vāvāejja taṃ kuṃthuṃ kaṃḍuyamāṇo va iyarahā|
to taṃ airoddajjhāṇammi paviṭṭhaṃ nicchayao muṇe||

2.2.265

aha kilāme tao bhayaṇā roddajjhāṇeyarassa u|
kaṃḍuyamāssa uṇa dehaṃ suddhamaṭṭajjhāṇaṃ muṇe||

2.2.266

samajje roddajjhāṇaṭṭho ukkosaṃ nāragāuyaṃ|
dubha-gitthī-paṃḍa-tericchaṃ aṭṭajjhāṇā samajjiṇe||

2.2.267

kuṃthu-pada-pharisa-janiyāo dukkhāo uvasamicchayā|
paccha-hallapphalībhūte jamavatthaṃtaraṃ vae||

2.2.268

vivanna-muhalāvanne aidīṇe vimana-dummane|
sunne vunne ya mūḍha-dise maṃda-dara-dīha-nissase||

2.2.269

avissāma-dukkhaheūyaṃ asuhaṃ tericcha-nārayaṃ|
kammaṃ nibaṃdhaittāṇaṃ bhamihī bhava-paraṃparaṃ||

2.2.270

evaṃ khaovasamāo taṃ kuṃthuvaiyarajaṃ duhaṃ|
kaha kaha vi bahu kileseṇaṃ jai khaṇamekkaṃ tu uvasame||

2.2.271

tā maha kilesamuttiṇaṃ suhiyaṃ se attāṇayaṃ|
mannaṃto pamuio hiṭṭho satthacitto vi ciṭṭhaī||

2.2.272

ciṃtai kila nivvuomi ahaṃ niddaliyaṃ dukkhaṃ pi me|
kaṃḍuyaṇādīhiṃ sayameva na mune evaṃ jahā mae||

2.2.273

roddajjhāṇagaeṇa ihaṃ aṭṭajjhāṇe taheva ya|
saṃvaggaittā u taṃ dukkhaṃ anaṃtānaṃtaguṇaṃ kaḍaṃ||

2.2.274

jaṃ cānusamayamanavarayaṃ jahā rāī tahā dinaṃ|
duhamevānubhavamāṇassa vīsāmo no bhavejjamo||

2.2.275

khaṇaṃ pi naraya-tiriesu sāgarovama-saṃkhayā|
rasa-rasa-vilijjae hiyayaṃ jaṃ vā icchaṃ tāṇa vi||

2.2.276

ahavā kiṃ kuṃthu-janiyāo mukko so dukkha-saṃkaḍā|
khīṇaṭṭha-kamma-parīṇāmo bhavejje janumetteṇeva u||

2.2.277

kuṃthumuvalakkhaṇaṃ ihaiṃ savva paccakkha-dukkhadaṃ|
anubhavamāno vi jaṃ pāṇī na yāṇaṃtī teṇa vakkhaī||

2.2.278

anne vi u guruyare dukkhe savvesiṃ saṃsāriṇaṃ|
sāmanne goyamā tā kiṃ tassa tenodae gae||

2.2.279

haṇa mara jaṃ annajammesuṃ vāyā vi u kei bhāṇire|
tamavīha jaṃ phalaṃ dejjā pāvaṃ kammaṃ pavujjhayaṃ||

2.2.280

tassudayā bahubhavaggahaṇe jattha jatthovavajjatī|
tattha tattha sa hammaṃto mārijjaṃto bhame sayā||

2.2.281

jeṇa puna aṃguvaṃga vā akkhiṃ kannaṃ ca nāsiyaṃ|
kaḍi-aṭṭhi-paṭṭhibhaṃgaṃ vā kīḍa-payaṃgāi-pāṇiṇaṃ||

2.2.282

kayaṃ vā kāriyaṃ vā vi kajjaṃtaṃ vā'ha anumayaṃ|
tassudayā cakkanālivahe pīlīhī so tile jahā||

2.2.283

na ekkaṃ no duve tinniṃ vīsaṃ tīsaṃ na yāvi ya|
saṃkhejje vā bhavaggahaṇe labhate dukkha-paraṃparaṃ||

2.2.284

asuya-musā-aniṭṭha-vayaṇaṃ jaṃ pamāya-annāṇa-dosao|
kaṃdappa-nāhavāeṇaṃ abhiniveseṇa vā puno||

2.2.285

bhaṇiyaṃ bhaṇāviyaṃ vā vi bhannamāṇaṃ ca anumayaṃ|
koho lohā bhayā hāsā tassudayā eyaṃ bhave||

2.2.286

mūgo pūti-muho mukkho kallavilallo bhave-bhave|
vihala-vāṇī suyaḍḍho vi savvattha'bbhakkhaṇe labhe||

2.2.287

avitaha-bhaṇiyaṃ nu taṃ saccaṃ aliya-vayaṇaṃ pi nāliyaṃ|
jaṃ chajjīva-nikāya-hiyaṃ niddosaṃ saccaṃ tayaṃ||

2.2.288

corīkkā nipphalaṃ savvaṃ kammāraṃbhaṃ kisādiyaṃ|
laddhatthassā vi bhave hāṇī anna-jamma-kayā ihaṃ||

Translations (2)

Commentaries (1)