<!-- Pramāṇa, a library of Indian primary sources · https://indike.org/pramana/in.jaina.sveta.cheda.6.2.3 -->

[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The Śvetāmbara canon (Siddhānta)](https://indike.org/pramana/in.jaina.sveta) › [The Chedasūtras (disciplinary texts)](https://indike.org/pramana/in.jaina.sveta.cheda) › [Mahanisiha](https://indike.org/pramana/in.jaina.sveta.cheda.6) › 2.3

# Mahanisiha 2.3: Uddeśaka 3

Mahānisīha 2.3

- **Language:** Ardhamāgadhī Prakrit

### Uddeśaka 3

### [2.3.289](https://indike.org/pramana/in.jaina.sveta.cheda.6.2.3.289)

evaṃ mehuṇa-doseṇaṃ, vedittā thāvarattaṇaṃ|  
keseṇamaṇaṃta-kālāo mānusa-joṇī samāgayā||

### [2.3.290](https://indike.org/pramana/in.jaina.sveta.cheda.6.2.3.290)

dukkhaṃ jareṃti āhāraṃ, ahiyaṃ sitthaṃ pi bhuṃjiyaṃ|  
pīḍaṃ karei tesiṃ tu, taṇhābāhe khaṇe khaṇe||

### [2.3.291](https://indike.org/pramana/in.jaina.sveta.cheda.6.2.3.291)

addhāṇa-maraṇaṃ tesiṃ, bahujappaṃ kaṭṭhāsaṇaṃ|  
thāṇuvvālaṃ niviṇṇāṇaṃ niddāe jaṃti no vaṇiṃ||

### [2.3.292](https://indike.org/pramana/in.jaina.sveta.cheda.6.2.3.292)

evaṃ pariggahāraṃbhadoseṇaṃ naragāuyaṃ|  
tettīsa-sāgarukkosaṃ veittā iha samāgayā||

### [2.3.293](https://indike.org/pramana/in.jaina.sveta.cheda.6.2.3.293)

chuhāe pīḍijjaṃti bhutta-bhuttuttare vi ya|  
caraṃtā ahannisaṃ tittiṃ no gacchaṃtī pasave jahā||

### [2.3.294](https://indike.org/pramana/in.jaina.sveta.cheda.6.2.3.294)

kohādīnaṃ tu doseṇaṃ ghoramāsīvisattaṇaṃ|  
veittā nārayaṃ bhūo roddā mecchā bhavaṃti te||

### [2.3.295](https://indike.org/pramana/in.jaina.sveta.cheda.6.2.3.295)

saḍha-kūḍa-kavaḍa-niyaḍīe ḍaṃbhāo suiraṃ guruṃ|  
veittā citta-tericchaṃ mānusa-joṇiṃ samāgayā||

### [2.3.296](https://indike.org/pramana/in.jaina.sveta.cheda.6.2.3.296)

kei bahuvāhi-rogāṇaṃ dukkha-sogāṇa bhāyaṇaṃ|  
dāridda-kalahamabhibhūyā khiṃsaṇijjā bhavaṃtihaṃ||

### [2.3.297](https://indike.org/pramana/in.jaina.sveta.cheda.6.2.3.297)

takkammodaya-doseṇaṃ niccaṃ pajjaliya-boṃdiṇaṃ|  
īsā-visāya-jālāhiṃ dhaga-dhaga-dhaga-dhagassa u||

### [2.3.298](https://indike.org/pramana/in.jaina.sveta.cheda.6.2.3.298)

jammaṃ pi goyamā vole-bahu-duhasaṃdhukkiyāṇa ya|  
tesiṃ, saduccariya-doso kassa rūsaṃtu te ihaṃ||

### [2.3.299](https://indike.org/pramana/in.jaina.sveta.cheda.6.2.3.299)

evaṃ vaya-niyama-bhaṃgeṇaṃ, sīlassa u khaṃḍaṇeṇa vā|  
asaṃjama-pavattaṇayā, ussuttumaggāyaraṇeṇa hi||

### [2.3.300](https://indike.org/pramana/in.jaina.sveta.cheda.6.2.3.300)

negehiṃ vitahāyaraṇehiṃ pamāyā sevaṇehiṃ ya  
maṇeṇaṃ ahava vāyāe ahavā kāeṇa katthai|  
kaya-kārigā'numaehiṃ, pamāyasevaṇeṇa vā||

### [2.3.301](https://indike.org/pramana/in.jaina.sveta.cheda.6.2.3.301)

tiviheṇamaniṃdiyamagarahiyamanāloiyamapaḍikkaṃtamakaya-pāyacchittamavisuddhāsaya-dosao||  
sasalle āmagabbhesuṃ pacciya pacciya-anaṃtaso|  
viyalaṃte-duti-cau-paṃca-chaṇhaṃ māsāṇaṃ asaṃbaddhaṭṭhīkara-sira-caraṇacchavī||

### [2.3.302](https://indike.org/pramana/in.jaina.sveta.cheda.6.2.3.302)

laddhe vi mānuse jamme kuṭṭhādī-bāhi-saṃjue|  
jīvaṃte ceva kimiehiṃ khajjaṃtī macchiyāhi ya|  
anudiyahaṃ khaṃḍaṃ-khaṃḍehiṃ saḍahaḍassa saḍe tanuṃ||

### [2.3.303](https://indike.org/pramana/in.jaina.sveta.cheda.6.2.3.303)

evamādī-dukkhamabhibhūe| lajjaṇijje khiṃsaṇijje niṃdaṇijje garahaṇijje|  
uvvevaṇijje aparibhoge niya-suhi-sayaṇa-baṃdhavāṇaṃ pi bhavaṃtī te durappane||

### [2.3.304](https://indike.org/pramana/in.jaina.sveta.cheda.6.2.3.304)

ajjhavasāya-visesaṃ taṃ paḍuccā kei tārisaṃ|  
akāma-nijjarāe u bhūya-pisāyattaṃ labhate|

### [2.3.305](https://indike.org/pramana/in.jaina.sveta.cheda.6.2.3.305)

tappuvva-salla-doseṇaṃ bahu-bhavaṃtara-tthāiṇā|  
ajjhavasāya-visesaṃ taṃ paḍuccā keī tārisaṃ||

### [2.3.306](https://indike.org/pramana/in.jaina.sveta.cheda.6.2.3.306)

dasasu vi disāsu uddhaddho nicca dūrappie daḍhaṃ|  
nirucchalla-nirussāse nirāhāre na pāṇie||

### [2.3.307](https://indike.org/pramana/in.jaina.sveta.cheda.6.2.3.307)

saṃpiṃḍiyaṃgamaṃge ya, moha-madirāe ghammarie|  
adiṭṭhaggamana-atthamaṇe bhave puḍhavīe golayā kimī||

### [2.3.308](https://indike.org/pramana/in.jaina.sveta.cheda.6.2.3.308)

bhava-kāya-ṭṭhitīe veettā taṃ tehiṃ kimiyattaṇaṃ|  
jai kaha vi lahaṃti manuyattaṃ tao te hoṃti napuṃsage||

### [2.3.309](https://indike.org/pramana/in.jaina.sveta.cheda.6.2.3.309)

ajjhavasāya-visesaṃ taṃ pavahaṃte aikūra-ghora-roddaṃ tu tārisaṃ|  
vammaha-saṃdhukkiyā marituṃ jammaṃ jaṃti vanassaī||

### [2.3.310](https://indike.org/pramana/in.jaina.sveta.cheda.6.2.3.310)

vanassaī gae jīve uḍḍhapāe ahomuhe|  
ciṭṭhaṃti'naṃtayaṃ kālaṃ no labhe beiṃdiyattaṇaṃ||

### [2.3.311](https://indike.org/pramana/in.jaina.sveta.cheda.6.2.3.311)

bhava-kāya-ṭṭhitīe veittā tamega-bi-ti-cauriṃdiyattaṇaṃ|  
tappuvva-salla-doseṇaṃ tericchesūvavajjiuṃ||

### [2.3.312](https://indike.org/pramana/in.jaina.sveta.cheda.6.2.3.312)

jai ṇaṃ bhave mahāmacche pakkhīvasaha-sīhādayo|  
ajjhavasāya-visesaṃ taṃ paḍucca accaṃta-kūrayaraṃ||

### [2.3.313](https://indike.org/pramana/in.jaina.sveta.cheda.6.2.3.313)

kuṇimamāhārattāe paṃceṃdiyavaheṇaṃ ya|  
aho aho pavissaṃti jāva puḍhavīu sattamā||

### [2.3.314](https://indike.org/pramana/in.jaina.sveta.cheda.6.2.3.314)

taṃ tārisaṃ mahāghoraṃ dukkhamanubhaviuṃ ciraṃ|  
puṇo vi kūratiriesu uvavajjiya narayaṃ vae||

### [2.3.315](https://indike.org/pramana/in.jaina.sveta.cheda.6.2.3.315)

evaṃ naraya-tiricchesuṃ pariyaṭṭaṃte viciṭṭhati|  
vāsakoḍie vi no sakkā kahiuṃ jaṃ taṃ dukkhaṃ anubhavamānage||

### [2.3.316](https://indike.org/pramana/in.jaina.sveta.cheda.6.2.3.316)

aha kharuṭṭa-baillesuṃ bhavejjā tabbhavaṃtare,  
sagaḍāyaḍḍhaṇa-bharuvvahaṇa-khu-taṇha-sīyāyavaṃ||

### [2.3.317](https://indike.org/pramana/in.jaina.sveta.cheda.6.2.3.317)

vaha-baṃdhanaṃkaṃṇa ḍahaṇaṃ nāsa-bheda-nilaṃchaṇaṃ,  
jamalārāīhiṃ kuccādihiṃ kuccijjaṃtāṇa ya,  
jahā rāī tahā diyahaṃ savvaddhā u sudāruṇaṃ||

### [2.3.318](https://indike.org/pramana/in.jaina.sveta.cheda.6.2.3.318)

emādī-dukkha-saṃghaṭṭaṃ anuhavaṃti cireṇa u,  
pāṇe payahiṃti kaha kaha vi aṭṭajjhāṇa-duhaṭṭie||

### [2.3.319](https://indike.org/pramana/in.jaina.sveta.cheda.6.2.3.319)

ajjhavasāya-visesaṃ taṃ paḍuccā kei kaha kaha vi labbhaṃtī mānusattaṇaṃ|  
tappuvva-salla-doseṇaṃ mānusatte vi āgayā|

### [2.3.320](https://indike.org/pramana/in.jaina.sveta.cheda.6.2.3.320)

bhavaṃti jamma-dāriddā-vāhī-khasa-pāma-parigayā|  
evaṃ adiṭṭha-kallāṇe savva-janassa siri-hāiuṃ||

### [2.3.321](https://indike.org/pramana/in.jaina.sveta.cheda.6.2.3.321)

saṃtappaṃte daḍhaṃ manasā akayatave nihanaṃ vae|  
ajjhavasāya-visesaṃ taṃ paḍuccā kei tārisaṃ||

### [2.3.322](https://indike.org/pramana/in.jaina.sveta.cheda.6.2.3.322)

puṇo vi puḍhavimāīsuṃ bhamaṃtī te du-ti-cauro paṃciṃdiesu vā|  
taṃ tārisaṃ mahā-dukkhaṃ suroddaṃ ghora-dāruṇaṃ||

### [2.3.323](https://indike.org/pramana/in.jaina.sveta.cheda.6.2.3.323)

caugai-saṃsāra-kaṃtāre anuhavamāṇe sudūsahaṃ|  
bhavakāya-ṭṭhitīe hiṃḍaṃte savvajoṇīsu goyamā||

### [2.3.324](https://indike.org/pramana/in.jaina.sveta.cheda.6.2.3.324)

ciṭṭhaṃti saṃsaremāṇe jamma-jara-maraṇa-bahu-vāhi veyaṇā-roga-soga-dāridda-kalaha-bbhakkhāṇaṃ-saṃtāva-gabbhavāsādi-dukkhasaṃdhu-kie|  
tappuvvasalla-doseṇaṃ niccānaṃda-mahūsava-thāma-joga-aṭṭhārasa-sīlaṃga-sahassāhiṭṭhiyassasavvā suha-pāvakammaṭṭha-rāsi-nidda-haṇa-ahiṃsā-lakkhaṇa-samaṇa-dhammassa bohiṃ no pāviṃti te||

### [2.3.325](https://indike.org/pramana/in.jaina.sveta.cheda.6.2.3.325)

ajjhavasāya-visesaṃ taṃ paḍuccā keī tārisaṃ|  
poggala-pariyaṭṭalakkhesuṃ bohiṃ kaha kaha vi pāvae||

### [2.3.326](https://indike.org/pramana/in.jaina.sveta.cheda.6.2.3.326)

evaṃ sudullahaṃ bohiṃ savva-dukkha-khayaṃ karaṃ|  
laddhūṇaṃ je pamāejjā tayahuttaṃ so puṇo vae||

### [2.3.327](https://indike.org/pramana/in.jaina.sveta.cheda.6.2.3.327)

tāsuṃ tāsuṃ ca joṇīsuṃ puvvutteṇa kameṇa u|  
paṃtheṇaṃ teṇaī ceva dukkhe te ceva anubhave||

### [2.3.328](https://indike.org/pramana/in.jaina.sveta.cheda.6.2.3.328)

evaṃ bhava-kāya-ṭṭhitīe savva-bhāvehiṃ poggale|  
savve sapajjave loe savva vannaṃtarehi ya|

### [2.3.329](https://indike.org/pramana/in.jaina.sveta.cheda.6.2.3.329)

gaṃdhattāe rasattāe phāsattāe saṃṭhāṇattāe|  
pariṇāmittā sarīreṇaṃ bohiṃ pāvejja vā na vā||

### [2.3.330](https://indike.org/pramana/in.jaina.sveta.cheda.6.2.3.330)

evaṃ vaya-niyama-bhaṃgaṃ je kajjamāṇamuvekkhae|  
aha sīlaṃ khaṃḍijjaṃtaṃ, ahavā saṃjama-virāhaṇaṃ||

### [2.3.331](https://indike.org/pramana/in.jaina.sveta.cheda.6.2.3.331)

ummagga-pavattaṇaṃ vā vi, usuttāyaraṇaṃ pi vā|  
so vi ya anaṃtarutteṇaṃ kameṇaṃ caugaī bhame||

### [2.3.332](https://indike.org/pramana/in.jaina.sveta.cheda.6.2.3.332)

rusau tusau paro mā vā visaṃ vā pariyattau|  
bhāsiyavvā hiyā bhāsā sapakkha-guṇakāriyā||

### [2.3.333](https://indike.org/pramana/in.jaina.sveta.cheda.6.2.3.333)

evaṃ laddhāmavi bohiṃ jai ṇaṃ no bhavai nimmalā|  
tā saṃvuḍāsava-ddāre pagati-ṭṭhii-paesānubhāviyabaṃdho, no hāso no ya nijjare||

### [2.3.334](https://indike.org/pramana/in.jaina.sveta.cheda.6.2.3.334)

emādī-ghora-kammaṭṭhajāleṇaṃ kasiyāṇa bho |  
savvesimavi sattāṇaṃ kuo dukkha-vimoyaṇaṃ||

### [2.3.335](https://indike.org/pramana/in.jaina.sveta.cheda.6.2.3.335)

puvviṃ dukkaya-duciṇṇāṇaṃ duppaḍikaṃtāṇaṃ nicaya-kammāṇaṃ|  
na aveiyāṇa mokkho ghorataveṇa ajjhosiyāṇa vā||

### [2.3.336](https://indike.org/pramana/in.jaina.sveta.cheda.6.2.3.336)

anusamayaṃ bajjhae kammaṃ, natthi abaṃdho u pāṇiṇo|  
mottuṃ siddhe ajogī ya selesī saṃṭhie tahā||

### [2.3.337](https://indike.org/pramana/in.jaina.sveta.cheda.6.2.3.337)

suhaṃ suhajjhavasāeṇaṃ, asuhaṃ duṭṭhajjhavasāyao|  
tivvayareṇaṃ tu tivvayaraṃ, maṃdaṃ maṃdeṇa saṃciṇe||

### [2.3.338](https://indike.org/pramana/in.jaina.sveta.cheda.6.2.3.338)

savvesiṃ pāvakammāṇaṃ egībhūyāṇaṃ jettiyaṃ|  
rāsiṃ bhave, tamasaṃkhaguṇaṃ vaya-tava-saṃjama-cārittakhaṃḍaṇa-virāhaṇeṇaṃ|  
ussuttummagga-pannavaṇa-pavattaṇa-āyaraṇovekkhaṇeṇa ya samajjiṇe||

### [2.3.339](https://indike.org/pramana/in.jaina.sveta.cheda.6.2.3.339)

aparimāṇagurutuṃgā mahaṃtā ghana-niraṃtarā|  
pāva-rāsī khayaṃ gacche, jahā taṃ savvovāehimāyare||

### [2.3.340](https://indike.org/pramana/in.jaina.sveta.cheda.6.2.3.340)

āsavadāre niruṃbhittā appamādī bhave jayā|  
baṃdhe sappaṃ bahu vede, jai sammattaṃ sunimmalaṃ||

### [2.3.341](https://indike.org/pramana/in.jaina.sveta.cheda.6.2.3.341)

āsavadāre niruṃbhittā āṇaṃ no khaṃḍae jayā|  
daṃsaṇa-nāṇa-carittesuṃ ujjutto jo daḍhaṃ bhave||

### [2.3.342](https://indike.org/pramana/in.jaina.sveta.cheda.6.2.3.342)

tayā vee khaṇaṃ baṃdhe, porāṇaṃ savvaṃ khave|  
aṇuinnamavi uīrittā nijjiya-ghora-parīsaho||

### [2.3.343](https://indike.org/pramana/in.jaina.sveta.cheda.6.2.3.343)

āsavadāre niruṃbhittā savvāsāyaṇa-virahio|  
sajjhāya-jjhāṇa-jogesuṃ ghora-vīra-tave rao||

### [2.3.344](https://indike.org/pramana/in.jaina.sveta.cheda.6.2.3.344)

pālejjā saṃjamaṃ kasiṇaṃ vāyā manasā u kammuṇā|  
jayā tayā na baṃdhejjā ukkosamaṇaṃtaṃ ca nijjare||

### [2.3.345](https://indike.org/pramana/in.jaina.sveta.cheda.6.2.3.345)

savvāvassagamujjutto savvālaṃbaṇavirahio|  
vimukko savvasaṃgehiṃ sabajjhabbhaṃtarehi ya||

### [2.3.346](https://indike.org/pramana/in.jaina.sveta.cheda.6.2.3.346)

gaya-rāga-dosamohe ya ninniyāṇe bhave jayā|  
niyatte visayatattīe bhīe gabbhaparaṃparā||

### [2.3.347](https://indike.org/pramana/in.jaina.sveta.cheda.6.2.3.347)

āsavadāre niruṃbhittā khaṃtādī dhamme ṭhite|  
sukkajjhāṇaṃ samāruhiya selesiṃ paḍivajjae||

### [2.3.348](https://indike.org/pramana/in.jaina.sveta.cheda.6.2.3.348)

tayā na baṃdhae kiṃci cirabaddhaṃ asesaṃ pi|  
niḍḍahiyajjhāṇa-joga-aggīe bhasamī kare daḍhaṃ||  
lahu-paṃcakkharuggiraṇa-metteṇaṃ kāleṇa bhavovagāhiyaṃ|

### [2.3.349](https://indike.org/pramana/in.jaina.sveta.cheda.6.2.3.349)

evaṃ sajīva-viriya-sāmattha-pāraṃparaeṇa goyamā|  
pavimukka-kamma-mala-kavayā samaeṇaṃ jaṃti pāṇiṇo||

### [2.3.350](https://indike.org/pramana/in.jaina.sveta.cheda.6.2.3.350)

sāsaya-sokkha-anābāhaṃ roga-jara-maraṇa-virahiyaṃ|  
adiṭṭha-dukkha-dāriddaṃ niccāṇaṃdaṃ sivālayaṃ||

### [2.3.351](https://indike.org/pramana/in.jaina.sveta.cheda.6.2.3.351)

atthege goyamā pāṇī je eyaṃ mannae visaṃ|  
āsava-dāra-nirohādī-iyara-heya-sokkhaṃ care||

### [2.3.352](https://indike.org/pramana/in.jaina.sveta.cheda.6.2.3.352)

tā jāva kasiṇa-ṭṭha kammāṇi ghora-tava-saṃjameṇa u|  
no niddaḍḍhe suhaṃ tāva natthi siviṇe vi pāṇiṇaṃ||

### [2.3.353](https://indike.org/pramana/in.jaina.sveta.cheda.6.2.3.353)

dukkhamevamavīsāmaṃ savvesiṃ jagajaṃtuṇaṃ|  
ekkaṃ samayaṃ na sama-bhāve jaṃ sammaṃ ahiyāsiuṃ tare||

### [2.3.354](https://indike.org/pramana/in.jaina.sveta.cheda.6.2.3.354)

thevamavi thevataraṃ thevayarassāvi thevayaṃ|  
jeṇaṃ goyama tā peccha kuṃthū tasseva ya tanū||

### [2.3.355](https://indike.org/pramana/in.jaina.sveta.cheda.6.2.3.355)

pāya-talesu na tassāvi tesimegadesaṃ muṇa|  
pharisaṃto, kuṃthū jeṇaṃ caraī kassai sarīrage||

### [2.3.356](https://indike.org/pramana/in.jaina.sveta.cheda.6.2.3.356)

kuṃthūṇaṃ saya-sahasseṇaṃ toliyaṃ no palaṃ bhave|  
egassa kettiyaṃ gattaṃ, kiṃ vā tollaṃ bhavejja se||

### [2.3.357](https://indike.org/pramana/in.jaina.sveta.cheda.6.2.3.357)

tassa vi pāyatala deseṇaṃ pharisio tamavatthaṃtaraṃ|  
puvvuttaṃ goyamā gacche pāṇī, to ṇaṃ imaṃ suṇe||

### [2.3.358](https://indike.org/pramana/in.jaina.sveta.cheda.6.2.3.358)

bhamaṃta-saṃcaraṃto ya hiṃḍi no maile tanuṃ|  
na kare kuṃthū khayaṃ tāṇaṃ, na yāvāsī ya ciraṃ vase||

### [2.3.359](https://indike.org/pramana/in.jaina.sveta.cheda.6.2.3.359)

aha ciṭṭhe khaṇamegaṃ tu, bīyaṃ no parivase khaṇaṃ|  
aha bīyaṃ pi virattejjā, tā bujjeyaṃ tu goyamā||

### [2.3.360](https://indike.org/pramana/in.jaina.sveta.cheda.6.2.3.360)

rāgeṇaṃ no paoseṇaṃ, macchareṇaṃ na keṇaī|  
na yāvi puvvavereṇaṃ kheḍḍāto kāmakārao||

### [2.3.361](https://indike.org/pramana/in.jaina.sveta.cheda.6.2.3.361)

kuṃthū kassai dehissa āruhei khaṇaṃ tanuṃ|  
viyaliṃdī bhūṇa-pāṇe jalaṃtaggī vāvī vise||

### [2.3.362](https://indike.org/pramana/in.jaina.sveta.cheda.6.2.3.362)

na ciṃtevaṃ jahā me sa puvvaverī'havā suhī  
tā kiṃcī khema-pāvaṃ vā saṃjaṇemi eyassa'haṃ||

### [2.3.363](https://indike.org/pramana/in.jaina.sveta.cheda.6.2.3.363)

puvva-kaḍa-pāva-kammassa virase bhuṃjaṃto phale|  
tiri-uḍḍāha-disānudisaṃ kuṃthū hiṃḍe varāya se||

### [2.3.364](https://indike.org/pramana/in.jaina.sveta.cheda.6.2.3.364)

caraṃtevamabāhāe sārīraṃ dukkhamānasaṃ|  
kuṃthū vi dūsahaṃ janne rodda-ṭṭa-jjhāṇa-vaḍḍhaṇaṃ||

### [2.3.365](https://indike.org/pramana/in.jaina.sveta.cheda.6.2.3.365)

tā u sallamārabhettāṇaṃ mana-jogaṃ annayareṇa vā|  
samayāvaliya-muhuttaṃ vā sahasā tassa vivāgayaṃ||

### [2.3.366](https://indike.org/pramana/in.jaina.sveta.cheda.6.2.3.366)

kaha sahihaṃ bahu-bhava-ggahaṇe duhamanusamayamahaṇṇisaṃ|  
ghora-payaṃḍaṃ-mahāroddaṃ hā-hā-kaṃda-parāyaṇā||

### [2.3.367](https://indike.org/pramana/in.jaina.sveta.cheda.6.2.3.367)

nāraya-tiriccha-joṇīsu attāṇāsaraṇā vi ya|  
egāgī sasarīreṇaṃ asahāyā kaḍu-virasaṃ ghanaṃ||

### [2.3.368](https://indike.org/pramana/in.jaina.sveta.cheda.6.2.3.368)

asivaṇa-veyaraṇī jaṃte karavatte kūḍasāmaliṃ|  
kuṃbhī-vāyāsā-sīhe emādī nārae duhe||

### [2.3.369](https://indike.org/pramana/in.jaina.sveta.cheda.6.2.3.369)

natthaṃkaṇa-vaha-baṃdhe ya paulukkaṃta-vikattaṇaṃ|  
sagaḍā-kaḍḍhaṇa bharuvvahaṇaṃ jamalā ya taṇhā chuhā||

### [2.3.370](https://indike.org/pramana/in.jaina.sveta.cheda.6.2.3.370)

khara-khura-camaḍhaṇa-satthaggī-khobhaṇa-bhaṃjaṇamāie|  
parayattāvasa-nittiṃse dukkhe tericche tahā||

### [2.3.371](https://indike.org/pramana/in.jaina.sveta.cheda.6.2.3.371)

kuṃthū-paya-pharisa-janiyaṃ pi dukkhaṃ na ahiyāsiuṃ tare|  
tā taṃ maha-dukkha-saṃghaṭṭaṃ kaha nitthariha sudāruṇaṃ||

### [2.3.372](https://indike.org/pramana/in.jaina.sveta.cheda.6.2.3.372)

nāraya-tericcha-dukkhāo kuṃthu-jāniyāu aṃtaraṃ|  
maṃdaragiri-anaṃta-guṇiyassa paramāṇussā vi no ghaḍe||

### [2.3.373](https://indike.org/pramana/in.jaina.sveta.cheda.6.2.3.373)

cirayāle saṃsuhaṃ pāṇī kaṃkhaṃto āsāe nivvuo|  
bhave dukkhamaīyaṃ pi saraṃto accaṃta-dukkhio||

### [2.3.374](https://indike.org/pramana/in.jaina.sveta.cheda.6.2.3.374)

bahu-dukkha-saṃkaḍaṭṭhetthaṃ āvayā-lakkha-parigae|  
saṃsāre parivase pāṇī, ayaḍe mahu-biṃdū jahā||

### [2.3.375](https://indike.org/pramana/in.jaina.sveta.cheda.6.2.3.375)

patthāpatthaṃ ayāṇaṃte kajjākajjaṃ hiyāhiyaṃ|  
sevvo sevvamasevvaṃ ca caraṇijjā caraṇijjaṃ tahā||

### [2.3.376](https://indike.org/pramana/in.jaina.sveta.cheda.6.2.3.376)

evaiyaṃ vaiyaraṃ soccā dukkhassaṃta-gavesiṇo|  
itthī-pariggahāraṃbhe ceccā ghoraṃ tavaṃ care||

### [2.3.377](https://indike.org/pramana/in.jaina.sveta.cheda.6.2.3.377)

ṭhiyāsaṇatthā saiyā paraṃmuhī, suyalaṃkariyā vā analaṃkariyā vā|  
nikkhamāṇā pamayā hi dubbalaṃ, manussamāleha-gayā vi karissaī||

### [2.3.378](https://indike.org/pramana/in.jaina.sveta.cheda.6.2.3.378)

citta-bhittiṃ na nijjhāe nāriṃ vā suyalaṃkiyaṃ|  
bhakkharaṃ pi va daṭṭhūṇaṃ diṭṭhiṃ paḍisamāhare||

### [2.3.379](https://indike.org/pramana/in.jaina.sveta.cheda.6.2.3.379)

hattha-pāya-paḍicchinnaṃ, kanna-nāsoṭṭhi-viyappiyaṃ|  
saḍamāṇī-kuṭṭhavāhīe, tamavitthīyaṃ dūrayareṇaṃ baṃbhayārī vivajjae||

### [2.3.380](https://indike.org/pramana/in.jaina.sveta.cheda.6.2.3.380)

thera-bhajjā ya jā itthī, paccaṃgubbhaḍa-jovvaṇā|  
junna-kumāriṃ, pautthavaiṃ, bāla-vihavaṃ taheva ya||

### [2.3.381](https://indike.org/pramana/in.jaina.sveta.cheda.6.2.3.381)

aṃteuravāsinī ceva, sa-para-pāsaṃḍa-saṃsriyaṃ|  
dikkhiyaṃ sāhuṇī vā vi, vesaṃ taha ya napuṃsagaṃ||

### [2.3.382](https://indike.org/pramana/in.jaina.sveta.cheda.6.2.3.382)

kaṇhiṃ goṇiṃ khariṃ ceva, vaḍavaṃ avilaṃ aviṃ tahā|  
sippitthiṃ paṃsuliṃ vā vi, jammarogi-mahilaṃ tahā||

### [2.3.383](https://indike.org/pramana/in.jaina.sveta.cheda.6.2.3.383)

cire saṃsaṭṭhamacellikkaṃ-emādīpāvitthio|  
pagamaṃtī jattha rayaṇīe aha pairikke dinassa vā||

### [2.3.384](https://indike.org/pramana/in.jaina.sveta.cheda.6.2.3.384)

taṃ vasahiṃ sannivesaṃ vā savvovāehiṃ savvahā|  
dūrayara-sudūra-dūreṇaṃ baṃbhayārī vivajjae||

### [2.3.385](https://indike.org/pramana/in.jaina.sveta.cheda.6.2.3.385)

eesiṃ saddhiṃ saṃlāvaṃ addhāṇaṃ vā vi goyamā |  
annāsuṃ vā vi itthīsuṃ khaṇaddhaṃ pi vivajjae||

### [2.3.386](https://indike.org/pramana/in.jaina.sveta.cheda.6.2.3.386)

(1) se bhayavaṃ kimitthīyaṃ no ṇaṃ nijjhāejjā goyamā no ṇaṃ nijjhāejjā|  
(2) se bhayavaṃ kiṃ suniyatthaṃ vatthālaṃkariya-vihūsiyaṃ itthīyaṃ no ṇaṃ nijjhāejjā, uyāhu ṇaṃ  
viniyaṃsaṇiṃ goyamā ubhayahā vi ṇaṃ no nijjhāejjā|  
(3) se bhayavaṃ kimitthīyaṃ no ālavejjā goyamā no ṇaṃ ālavejjā|  
(4) se bhayavaṃ kimitthīsuṃ saddhiṃ khaṇaddhamavi no saṃvasejjā goyamā no ṇaṃ saṃkhasejjā|  
(5) se bhayavaṃ kimitthīsuṃ saddhiṃ no addhāṇaṃ paḍivajjejjā goyamā ege baṃbhayārī egitthīe saddhiṃ no paḍivajjejjā|

### [2.3.387](https://indike.org/pramana/in.jaina.sveta.cheda.6.2.3.387)

(1) se bhayavaṃ keṇaṃ aṭṭheṇaṃ evaṃ vuccai jahā ṇaṃ no itthīṇaṃ nijjhāejjā| no namālavejjā| no ṇaṃ tīe saddhiṃ parivasejjā| no ṇaṃ addhāṇaṃ paḍivajjejjā  
(2) goyamā savva-ppayārehi ṇaṃ savvitthīyaṃ accatthaṃ maukkaḍattāe rāgeṇaṃ saṃdhukkijjamāṇī  
kāmaggie saṃpalittā sahāvao ceva visaehiṃ bāhijjai|  
(3) tao savva-payārehiṃ ṇaṃ savvatthiyaṃ accatthaṃ maukkaḍattāe rāgeṇaṃ saṃdhu-kkijjamāṇī kāmaggīe saṃpalittā sahāvao ceva visaehiṃ bāhijjamāṇī, anusamayaṃ savva-disi-vidisāsuṃ ṇaṃ savvattha visae patthejjā  
(4) jāvaṃ ṇaṃ savvattha-visae patthejjā, tāva ṇaṃ savva-payārehiṃ ṇaṃ savvattha savvahā purisaṃ saṃkappijjā,  
(5) jāva ṇaṃ purisaṃ saṃkappejjā, tāva ṇaṃ soiṃdiyovaogattāe, cakkhuriṃdiovaogattāe rasaniṃdio-vaogattāe, ghāṇiṃdiovaogattāe, phāsiṃdiovao-gattāe| jattha ṇaṃ kei purīse  
(6) kaṃta-rūve i vā, akaṃta-ruve i vā, paḍuppannajovvaṇe i vā, apaḍuppanna-jovvaṇe i vā, gaya-jovvaṇe i vā, diṭṭha-puvve i vā, adiṭṭha-puvve i vā, iḍḍhimaṃte i vā, aniḍḍhimaṃte i vā, iḍḍhipatte i vā, aniḍḍhī patte i vā, visayāure i vā, nivvinna-kāmabhoge i vā, uddhaya-boṃdīe i vā, anuddhayaboṃdīe i vā, mahāsatte i vā, hīna-satte i vā, mahā-purise i vā, kāpurise i vā, samaṇe i vā, māhaṇe i vā,  
annayare i vā, niṃdiyāhama-hīna-jāīe vā,  
(7) tattha ṇaṃ ihā poha-vīmaṃsaṃ pauṃji-ttāṇaṃ, jāva ṇaṃ saṃjoga-saṃpattiṃ jhāejjā  
(8) jāva ṇaṃ saṃjoga-saṃpattiṃ parikappe, tāva ṇaṃ se citte saṃkhudde bhavejjā  
(9) jāva ṇaṃ se citte saṃkhudde bhavejjā, tāva ṇaṃ se citte visaṃvaejjā  
(10) jāva ṇaṃ se citte visaṃvaejjā, tāva ṇaṃ se dehe maeṇaṃ addhāsejjā  
(11) jāva ṇaṃ se dehe maeṇaṃ addhāsejjā, tāva ṇaṃ se daravidare iha-paralogāvāe pamhusejjā,  
(12) jāva ṇaṃ se dara-vidare iha-paralogāvāe pamhusejjā tāva ṇaṃ ciccā lajjaṃ bhayaṃ ayasaṃ akittiṃ meraṃ, ucca-ṭhāṇāo nīya-ṭṭhāṇaṃ ṭhāejjā,  
(13) jāva ṇaṃ ucca-ṭhāṇāo nīya-ṭṭhāṇaṃ ṭhāejjā tāva ṇaṃ vaccejjā asaṃkheyāo samayāvaliyāo  
(14) jāva ṇaṃ ṇīiṃti asaṃkhejjāo samayāvaliyāo, tāva ṇaṃ jaṃ paḍhamaṃ samayāo kammaṭṭhiiṃ taṃ bīyasamayaṃ paḍuccā, taiyā diyāṇaṃ samayāṇaṃ saṃkhejjaṃ anaṃtaṃ vā aṇukkamaso kammaṭhiiṃ saṃciṇijjā  
(15) jāva ṇaṃ anukamaso anaṃtaṃ kammaṭhiiṃ saṃciṇai tāva ṇaṃ asaṃkhejjāiṃ avasappiṇī-osappiṇī-koḍilakkhāiṃ jāvaeṇaṃ kāleṇaṃ parivattaṃti, tāvaiyaṃ kālaṃ dosuṃ ceva nirayatiricchāsuṃ gatīsuṃ ukkosa-ṭṭhitīyaṃ kammaṃ āsaṃkalejjā|  
(16) jāva ṇaṃ ukkosaṭṭhitīyaṃ kammamāsaṃkalejjā tāva ṇaṃ se vivanna-juiṃ vivanna-kaṃtiṃ viyaliya- lāvanna-sirīyaṃ ninnaṭṭhaditti-teyaṃ boṃdī bhavejjā  
(17) jāva ṇaṃ cuya-kaṃti-lāvanna-siriyaṃ nitteya-boṃdī bhavejjā, tāva ṇaṃ se sīejjā pharisiṃdie| jāva ṇaṃ sīejjā pharisiṃdie tāva ṇaṃ savvaṭṭhā vivaḍḍhejjā savvattha cakkhurāge|  
(18) jāva ṇaṃ savvattha vivaḍḍhejjā cakkhurāge, tāva ṇaṃ rāgāruṇe nayana-juyale bhavejjā  
(19) jāva ṇaṃ rāgāruṇe ya nayanajuyale bhavejjā tāva ṇaṃ rāgaṃdhattāe, na gaṇejjā sumahaṃta-guru-dose vayabhaṃge, na gaṇejjā sumahaṃta-guru dose niyama-bhaṃge, na gaṇejjā sumahaṃta-ghora-pāva-kamma- samāyaraṇaṃ sīla-khaṃḍaṇaṃ, na gaṇejjā sumahaṃta-savva-guru-pāva-kamma-samāyaraṇaṃ saṃjama-virāhaṇaṃ  
(20) na gaṇejjā ghoraṃdhayāraṃ para-loga-dukkhabhayaṃ, na gaṇejjā āyaī, na gaṇejjā sakamma-guṇaṭṭhāṇagaṃ, na gaṇejjā sasurāsurassā vi ṇaṃ jagassa alaṃghaṇijjaṃ āṇaṃ, na gaṇejjā anaṃtahutto culasīi- joṇilakkha-parivatta-gabbha-paraṃparaṃ, aladdhaṇimi-saddha-sokkhaṃ, caugai-saṃsāra-dukkhaṃ|  
(21) na pāsijjā jaṃ pāsaṇijjaṃ, na pāsijjā, jaṃ apāsaṇijjaṃ, savva-jaṇa-samūha-majjha-  
sanniviṭṭhaṭṭhiyāṇivanna-cakkamiya-nirikkhijjamāṇī vā dippaṃta-kiraṇa-jāla-dasa-dīsī-payāsiya -tavaṃta-teyarāsī-sūrie vi tahā vi ṇaṃ pāsejjā sunnaṃdhayāre savve disā bhāe  
(22) jāva ṇaṃ rāgaṃdha-ttāe na gaṇejjā sumahallaguru-dose vaya-bhaṃge niyama-bhaṃge sīla-khaḍaṇe saṃjama- virāhaṇe paraloga-bhae-āṇā-bhaṃgāikkame anaṃta-saṃsāra-bhae, pāsejjā apāsaṇijje, savva-  
jana-payaḍa-dinayare vi ṇaṃ mannijjā ṇaṃ sunnaṃdhayāre savve disābhāe, \[jāva ṇaṃ bhave na gaṇejjā sumahalla- gurudose vaya-bhaṃge sīla-khaṃḍaṇijjā\] tāva ṇaṃ bhavejjā accaṃta-nibbhaṭṭha-sohaggāisae vicchāe rāgā-ruṇa-paṃḍure duddaṃsaṇijje anirikkhaṇijje vayaṇa-kamale bhavejjā  
(23) jāva ṇaṃ accaṃta nibbhaṭṭha-sohaggāisae vicchāe rāgāruṇa-paṃḍure duddaṃsaṇijje anirikkhaṇijje vayaṇa-kamale bhavejjā tāva ṇaṃ phuruphurejjā saṇiyaṃ saṇiyaṃ boṃda-puḍa-niyaṃba-vacchoruha- bāhu-lai-uru-kaṃṭha-paese|  
(24) jāva ṇaṃ phuruphureṃti boṃda-puṃḍa-niyaṃba-vacchoruha-bāhulai-uru-kaṃṭhappaese| tāva ṇaṃ moṭṭāyamāṇī aṃgapāliyāhiṃ niruvalakkhe vā sovalakkhe vā bhaṃjejjā savvaṃgovaṃge|  
(25) jāva ṇaṃ moṭṭāyamāṇī aṃgapāliyāhiṃ bhaṃjejjā savvagovaṃge, tāva ṇaṃ mayaṇasarasannivāeṇaṃ  
jajjariyasaṃbhinne savvaroma-kūve taṇū bhavejjā|  
(26) jāva ṇaṃ mayaṇa-sara-sannivāeṇaṃ viddhaṃsie boṃdī bhavejjā, tāva ṇaṃ tahā pariṇamejjā taṇū jahā ṇaṃ managaṃ payalaṃti dhātūo  
(27) jāva ṇaṃ managaṃ payalaṃti dhātūo, tāva ṇaṃ accatthaṃ vāhijjaṃti poggala-niyaṃboru-bāhulaiyāo|  
(28) jāva ṇaṃ accatthaṃ vāhijjai niyaṃbo tāva ṇaṃ dukkheṇaṃ dharejjā gatta-jaṭṭhiṃ,  
(29) jāva ṇaṃ dukkheṇaṃ dharejjā gatta-yaṭṭhiṃ tāva ṇaṃ se novalakkhejjā attīyaṃ sarīrāvatthaṃ  
(30) jāva ṇaṃ novalakkhejjā attīyaṃ sarīrāvatthaṃ, tāva ṇaṃ duvālasehiṃ samaehiṃ dara-nicceṭṭhaṃ bhave boṃdī  
(31) jāva ṇaṃ duvālasehiṃ dara-nicceṭṭhaṃ bhave boṃdī, tāva ṇaṃ paḍikhalejjā se ūsāsa-nīsāse|  
(32) jāva ṇaṃ paḍikhalejjā ūsāsa-nīsāse, tāva ṇaṃ maṃdaṃ maṃdaṃ ūsasejjā maṃdaṃ maṃdaṃ nīsasejjā,  
(33) jāva ṇaṃ eyāiṃ ettiyāiṃ bhāvaṃtaraṃ avatthaṃtarāiṃ vihārejjā, tāva ṇaṃ jahā mahagghatthe kei purise i vā, itthi i vā, visuṃṭhulāe pisāyāe bhāratīe asaṃbaddhaṃ saṃlaviyaṃ visaṃkhulaṃtaṃ avvattaṃ ullavejjā,  
(34) evaṃ siyā ṇaṃ itthīyaṃ visamāvatta-mohaṇa-mammaṇullāveṇaṃ purise,  
(35) diṭṭha-puvve i vā, adiṭṭha puvve i vā, kaṃtarūve i vā, akaṃtarūve i vā, gaya jovvaṇe i vā,  
paḍuppanna-jovvaṇe i vā, mahāsatte i vā, hīnasatte i vā, sappurise i vā, kāpurise i vā, iḍḍhimaṃte i vā, aniḍḍhimaṃte i vā, visayāure i vā, nivvinnakāmabhoge i vā, samaṇe i vā, māhaṇe i vā| jāva ṇaṃ annayare vā keī niṃdiyāhama-najāīe i vā,  
(36) ajjhattheṇaṃ sasajjhaseṇaṃ āmaṃtemāṇī ullāvejjā,  
(37) jāva ṇaṃ saṃkhejja-bhedabhinneṇaṃ sarāgeṇaṃ sareṇaṃ diṭṭhie i vā purise ullāvejjā nijjhāejja vā, tāva ṇaṃ jaṃ taṃ asaṃkhejjāiṃ avasappiṇī-osappiṇī-koḍi-lakkhāiṃ dosuṃ naraya-tiricchāsuṃ gatīsuṃ ukkosa-ṭṭhitīyaṃ kammaṃ āsaṃkaliyaṃ āsio taṃ nibaṃdhejjā| no ṇaṃ baddha-puṭṭhaṃ karejjā,  
(38) se vi ṇaṃ jaṃ samayaṃ purisassa na sarirāvayava-pharisaṇābhimuhaṃ bhavejjā no ṇaṃ pharisejjā, taṃ samayaṃ ceva taṃ kamma-ṭhiiṃ baddha-puṭṭhaṃ karejjā| no ṇaṃ baddha -puṭṭha-nikāyaṃ ti|

### [2.3.388](https://indike.org/pramana/in.jaina.sveta.cheda.6.2.3.388)

(39) eyāvasarammi u goyamā saṃjogeṇaṃ saṃjujjejjā|  
(40) se vi ṇaṃ saṃjoe purisāyatte  
(41) purise vi ṇaṃ je ṇaṃ na saṃjujje, se dhanne; je ṇaṃ saṃjujje se adhanne||

### [2.3.389](https://indike.org/pramana/in.jaina.sveta.cheda.6.2.3.389)

(1) se bhayavaṃ keṇaṃ aṭṭheṇa evaṃ vuccai jahā purise vi ṇaṃ je ṇaṃ na saṃjujje se ṇaṃ dhanne je ṇaṃ saṃjujje se adhanne  
(2) goyamā je ya ṇaṃ se tīe itthīe pāvāe baddha-puṭṭha-kamma-ṭṭhiiṃ ciṭṭhai|  
se ṇaṃ purisasaṃgeṇaṃ nikāijjai  
(3) teṇaṃ tu baddha-puṭṭha-nikāieṇaṃ kammeṇaṃ sā varāī  
(4) taṃ tārisaṃ ajjhavasāyaṃ paḍuccā egiṃdiyattāe puḍhavādīsuṃ gayā samāṇī anaṃta-kāla-pariyaṭṭeṇa vi ṇaṃ no pāvejjā beiṃdiyattaṇaṃ  
(5) evaṃ kaha kaha vi bahukeseṇa anaṃta-kālāo egiṃdiyattaṇaṃ khaviya beiṃdiyattaṃ, evaṃ teiṃdiyattaṃ cauriṃ-diyattamavi keseṇaṃ veyaittā paṃciṃdiyatteṇaṃ āgayā samāṇī  
(6) dubbhagitthiya-paṃḍa-tericcha-veyamāṇī| hā-hā-bhūya-kaṭṭha-saraṇā, siviṇe vi adiṭṭha-sokkhā, niccaṃ saṃtāvuvveviyā, suhisayaṇa-baṃdhava-vivajjiyā,  
(7) ājammaṃ kucchaṇijjaṃ garahaṇijjaṃ niṃdaṇijjaṃ khiṃsaṇijjaṃ bahu-kammaṃtehiṃ anega-cāḍu-saehiṃ laddhodarabharaṇā, savva-loga-paribhūyā,  
(8) cau-gatīe saṃsarejjā  
(9) annaṃ ca ṇaṃ goyamā jāvaiyaṃ tīe pāva-itthīe baddha-puṭṭhanikāiyaṃ kamma-ṭṭhiiṃ samajjiyaṃ, tāvaiyaṃ itthiyaṃ abhilasiukāme purise ukkiṭṭha-kiṭṭhayaraṃ anaṃtaṃ kammaṭṭhiiṃ baddha-puṭṭha-nikāiyaṃ samajjiṇejjā  
(10) eteṇaṃ aṭṭheṇaṃ goyamā evaṃ vuccai| jahā ṇaṃ purise vi ṇaṃ je ṇaṃ no saṃjujje se ṇaṃ dhanne| je ṇaṃ saṃjujje se ṇaṃ adhanne||

### [2.3.390](https://indike.org/pramana/in.jaina.sveta.cheda.6.2.3.390)

(1) bhayavaṃ kesa ṇaṃ purise sa ṇaṃ pucchā jāva ṇaṃ dhannaṃ vayāsi  
(2) goyamā chavvihe purise nee| taṃ jahā–aha-māhame, ahame, vimajjhime, uttame, uttamuttame,  
savvuttamuttame|

### [2.3.391](https://indike.org/pramana/in.jaina.sveta.cheda.6.2.3.391)

(3) tattha ṇaṃ je savvuttamuttame purise, se ṇaṃ paṃcaṃgubbhaḍajovvaṇa-savvuttama -rūva-lāvanna-kaṃti-kaliyāe vi itthīe niyaṃbārūḍho vāsasayaṃ pi ciṭṭhijjā, no ṇaṃ manasā vi taṃ itthiyaṃ abhilasejjā|

### [2.3.392](https://indike.org/pramana/in.jaina.sveta.cheda.6.2.3.392)

(4) je ṇaṃ tu se uttamuttame, se ṇaṃ jai kahavi tuḍī-tihāeṇaṃ manasā samayamekkaṃ abhilase, tahā vi bīya samaye maṇaṃ sanniruṃbhiya attāṇaṃ niṃdejjā garahejjā, na puṇo bīeṇaṃ tajjamme itthīyaṃ manasā vi u abhilasejjā,  
(5) je ṇaṃ se uttame, se ṇaṃ jai kaha vi khaṇaṃ muhuttaṃ vā itthiyaṃ kāmijjamāṇiṃ pekkhejjā, tao manasā abhilasejjā| jāva ṇaṃ jāmaddhajāmaṃ vā, no ṇaṃ itthīe samaṃ vikammaṃ samāyarejjā|

### [2.3.393](https://indike.org/pramana/in.jaina.sveta.cheda.6.2.3.393)

jai ṇaṃ baṃbhayārī kayapaccakkhāṇābhiggahe  
(6) ahā ṇaṃ no baṃbhayārī no kayapaccakkhāṇābhiggahe, to  
ṇaṃ niya-kalattebhayaṇā na tu ṇaṃ tivvesu kāmesu abhilāsī bhavejjā  
(7) tassa eyassa ṇaṃ goyamā atthi baṃdho, kiṃtu anaṃta-saṃsāriyattaṇaṃ no nibaṃdhejjā|

### [2.3.394](https://indike.org/pramana/in.jaina.sveta.cheda.6.2.3.394)

(8) je ṇaṃ se vimajjhime, se ṇaṃ niya-kalatteṇa saddhiṃ vikammaṃ samāyarejjā, no ṇaṃ para-kalatteṇaṃ,  
(9) ese ya ṇaṃ jai pacchā ugga-baṃbhayārī no bhavejjā, to ṇaṃ ajjhavasāya-visesaṃ taṃ tārisamaṃgīkāūṇaṃ anaṃta-saṃsāriyattaṇe bhayaṇā,  
(10) jao ṇaṃ je kei abhigaya-jīvāi-payatthe savva-satte āgamāṇusāreṇaṃ susāhūṇaṃ dhammovaṭṭhaṃbha-dānāi-dāna-sīla-tava-bhāvanāmaie cauvvihe dhamma-khaṃdhe samanuṭṭhejjā| se ṇaṃ jai kahavi niyama-vayabhaṃgaṃ na karejjā  
(11) tao ṇaṃ sāya-paraṃparaeṇaṃ sumānusatta-sudevattāe| jāva ṇaṃ aparivaḍiya-sammatte, nisaggeṇa vā abhigameṇa vā jāva aṭṭhārasasīlaṃga-sahassadhārī bhavittāṇaṃ niruddhāsavadāre, vihūya-rayamale, pāvayaṃ kammaṃ khavittāṇaṃ sijjhejjā|

### [2.3.395](https://indike.org/pramana/in.jaina.sveta.cheda.6.2.3.395)

(12) je ya ṇaṃ se ahame, se ṇaṃ sa-para-dārāsatta-mānase nusamayaṃ kūrajjhavasāyajjhavasiya-citte  
hiṃsāraṃbha-pariggahāisu abhirae bhavejjā,  
(13) tahā ṇaṃ je ya se ahamāhame, se ṇaṃ mahā-pāva-kamme savvāo itthīo vāyā manasā ya kammuṇā tivihaṃ tiviheṇaṃ nusamayaṃ abhilasejjā,  
(14) tahā accaṃtakūrajjhavasāya-ajjhavasiehiṃ citte hiṃsāraṃbha-pariggahāsatte kālaṃ gamejjā  
(15) eesiṃ doṇhaṃ pi ṇaṃ goyamā anaṃta-saṃsāriyattaṇaṃ neyaṃ||

### [2.3.396](https://indike.org/pramana/in.jaina.sveta.cheda.6.2.3.396)

(1) bhayavaṃ je ṇaṃ se ahame je vi ṇaṃ se ahamāhame purise tesiṃ ca doṇhaṃ pi anaṃta-saṃsāriyattaṇaṃ  
samakkhāyaṃ, to ṇaṃ ege ahame ege ahamāhame  
(2) etesiṃ doṇhaṃ pi purisāvatthāṇaṃ ke pai-visese  
(3) goyamā je ṇaṃ se ahama-purise, se ṇaṃ jai vi u sa-para-dārāsatta-māṇase kūrajjhavasāya-jjhavasiehiṃ citte hiṃsāraṃbha-pariggahāsatta-citte, tahā vi ṇaṃ dikkhiyāhiṃ sāhuṇīhiṃ annayarāsuṃ ca| sīla-saṃrakkhaṇa-posahovavāsa-nirayāhiṃ dikkhiyāhiṃ gāratthīhiṃ vā saddhiṃ āvaḍiya-pelliyāmaṃtie vi samāṇe no viyammaṃ samāyarejjā,  
(4) je ya ṇaṃ se ahamāhame purise, se ṇaṃ niya-jaṇaṇi-pabhiīe jāva ṇaṃ dikkhiyāīhiṃ sāhuṇīhiṃ pi samaṃ viyammaṃ samāyarejjā  
(5) te ṇaṃ ceva se mahā-pāva-kamme savvahamāhame samakkhāe,  
(6) se ṇaṃ goyamā pai-visese,  
(7) tahā ya je ṇaṃ se ahamma-purise, se ṇaṃ anaṃteṇaṃ kāleṇaṃ bohiṃ pāvejjā| je ya u na se ahamāhame mahā-pāvakārī dikkhiyāhiṃ pi sāhuṇīhiṃ pi samaṃ viyammaṃ samāyarijjā| se ṇaṃ anaṃta-hutto  
vi anaṃta-saṃsāramāhiṃḍiūṇaṃ pi bohiṃ no pāvejjā,  
(8) ese ya goyamā bitie paivisese||

### [2.3.397](https://indike.org/pramana/in.jaina.sveta.cheda.6.2.3.397)

(1) tattha ṇaṃ je se savvuttame, se ṇaṃ chaumattha-vīyarāge nee  
(2) jeṇaṃ tu se uttamuttame, se ṇaṃ aniḍḍhi-patta-pabhitīe jāva ṇaṃ uvasāmaga-khavae tāva ṇaṃ nioyaṇīe,  
(3) jeṇaṃ ca se uttame, se ṇaṃ appamattasaṃjae nee,  
(4) evameesiṃ nirūvaṇā kujjā

### [2.3.398](https://indike.org/pramana/in.jaina.sveta.cheda.6.2.3.398)

(5) jeu na micchadiṭṭhī bhavittāṇaṃ uggabaṃbhayārī bhavejjā hiṃsāraṃbha-pariggahāīṇaṃ virae, se ṇaṃ miccha-diṭṭhī ceva nee, no ṇaṃ samma-diṭṭhī,  
(6) tesiṃ ca ṇaṃ aviiya jīvāi-payattha-sabbhāvāṇaṃ goyamā no ṇaṃ uttamatte abhinaṃdaṇijje pasaṃsaṇijje vā bhavai| jao teṇaṃ te anaṃtara-bhavie divvorālie visae patthejjā,  
(7) annaṃ ca kayādī te divvitthiyādao saṃcikkhiya, tao ṇaṃ baṃbhavvayāo paribhaṃsejjā niyāṇakaḍe vā havejjā,

### [2.3.399](https://indike.org/pramana/in.jaina.sveta.cheda.6.2.3.399)

(8) je ya ṇaṃ se vimajjhime, se ṇaṃ taṃ tārisamajjhavasāyamaṃgīkiccāṇaṃ virayāvirae daṭṭhavve,

### [2.3.400](https://indike.org/pramana/in.jaina.sveta.cheda.6.2.3.400)

(9) tahā ṇaṃ je se ahame| je ya ṇaṃ se ahamāhame, tesiṃ tu ṇaṃ egaṃteṇaṃ jahā itthīsuṃ tahā ṇaṃ nee| jāva ṇaṃ kamma-ṭṭhiiṃ samajjejjā,  
(10) navaraṃ purisassa ṇaṃ saṃcikkhaṇagesuṃ vaccharuhovaratala-pakkhaesuṃ liṃge ya ahiyayaraṃ rāgamuppajje  
(11) evaṃ ete ceva chappurisavibhāge||

### [2.3.401](https://indike.org/pramana/in.jaina.sveta.cheda.6.2.3.401)

(1) kāsiṃ ci itthīṇaṃ goyamā bhavvattaṃ sammatta-daḍhattaṃ ca aṃgī-kāūṇaṃ jāva ṇaṃ savvuttame purisavibhāge tāva ṇaṃ ciṃtaṇijje| no ṇaṃ savvesimitthīṇaṃ

### [2.3.402](https://indike.org/pramana/in.jaina.sveta.cheda.6.2.3.402)

(2) evaṃ tu goyamā jīe itthīe-ti kālaṃ purisasaṃjoga-saṃpattī na saṃjāyā| ahā ṇaṃ purisa-saṃjoga-saṃpattīe vi sāhīṇāe jāva ṇaṃ terasame coddasame pannarasame ṇaṃ ca samaeṇaṃ puriseṇaṃ saddhiṃ na saṃjuttā no viyammaṃ samāyariyaṃ,  
(3) se ṇaṃ, jahā ghana-kaṭṭha-taṇa-dāru-samiddhe keī gāme i vā nagare i vā, ranne i vā, saṃpalitte caṃḍānila-saṃdhukkie payalittāṇaṃ paya-littāṇaṃ ṇiḍajjhiya niḍajjhiya cireṇaṃ uvasamejjā  
(4) evaṃ tu ṇaṃ goyamā se itthī kāmaggī saṃpalittā samāṇī ṇiḍajjhiya-niḍajjhiya samaya-caukkeṇaṃ uvasamejjā  
(5) evaṃ igavīsame vāvīsame jāva ṇaṃ sattatīsaime samae jahā ṇaṃ padīva-sihā vāvaṇṇā puna-ravi sayaṃ vā tahāviheṇaṃ cunna-jogeṇaṃ vā payalijjā vā| evaṃ sā itthī-purisa-daṃsaṇeṇa vā purisā-lāvaga-savaṇeṇa vā madeṇaṃ kaṃdappeṇaṃ kāmaggie punaravi u payalejjā||

### [2.3.403](https://indike.org/pramana/in.jaina.sveta.cheda.6.2.3.403)

(1) etthaṃ ca goyamā jaṃ itthīyaṃ bhaeṇa vā, lajjāe vā, kulaṃkuseṇa vā, jāva ṇaṃ dhamma-saddhāe vā taṃ veyaṇaṃ ahi-yāsejjā no viyammaṃ samāyarejjā  
(2) se ṇaṃ dhannā, se ṇaṃ puṇṇā, se ya ṇaṃ vaṃdā, se ṇaṃ pujjā, se ṇaṃ daṭṭhavvā, se ṇaṃ savva-lakkhaṇā, se ṇaṃ savva-kallāṇa-kārayā, se ṇaṃ savvuttama-maṃgala-nihi  
(3) se ṇaṃ suyadevatā, se ṇaṃ sarassatī, se ṇaṃ aṃbahuṃḍī, se ṇaṃ accuyā, se ṇaṃ iṃdāṇī, se ṇaṃ paramapavittuttamā siddhī muttī sāsayā sivagai tti

### [2.3.404](https://indike.org/pramana/in.jaina.sveta.cheda.6.2.3.404)

(4) jāmatthiyaṃ taṃ veyaṇaṃ no ahiyāsejjā viyammaṃ vā samāyarejjā se ṇaṃ adhannā, se ṇaṃ apunnā, se ṇaṃ avaṃdā, se ṇaṃ apujjā, se ṇaṃ adaṭṭhavvā, se ṇaṃ alakkhaṇā, se ṇaṃ bhagga-lakkhaṇā, se ṇaṃ savva amaṃgala-akallāṇa-bhāyaṇā|  
(5) se ṇaṃ bhaṭṭha-sīlā, se ṇaṃ bhaṭṭhāyārā se ṇaṃ paribhaṭṭha-cārittā, se ṇaṃ niṃdaṇīyā, se ṇaṃ garahaṇīyā, se khiṃsaṇijjā, se ṇaṃ kucchaṇijjā, se ṇaṃ pāvā, se ṇaṃ pāva-pāvā, se ṇaṃ mahāpāva-pāvā, se ṇaṃ apavitti tti||  
(1) evaṃ tu goyamā caḍulattāe bhīruttāe kāyarattāe lolattāe, ummāyao vā dappao vā  
kaṃdappao vā aṇappa-vasao vā āuṭṭiyāe vā,  
(2) jamitthiyaṃ saṃjamāo paribhassiya, dūraddhāṇe vā gāme vā nagare vā rāyahāṇīe vā, vesa-ggahaṇaṃ acchaḍḍiya-puriseṇa saddhiṃ viyammaṃ samāyarejjā, bhūo bhūo purisaṃ kāmejja vā ramejja vā ahā ṇaṃ tameva doyatthiyaṃ kajjaṃ, iha parika-ppettā ṇaṃ tamāīvejjā,  
(3) taṃ ceva āīvamāṇī passiyāṇaṃ ummāyao vā, dappao vā, kaṃdappao vā, aṇappavasao vā, āuṭṭiyāe vā,  
(4) kei āyarie i vā, sāmanna-saṃjae i vā rāya-saṃsie i vā, vāya-laddhijutte i vā, tavo-laddhi jutte i vā, jogacunnaladdhi-jutte i vā, viṇṇāṇaladdhijutte i vā, jugappahāṇe i vā, pavayaṇappabhāvage i vā,  
(5) tamatthiyaṃ annaṃ vā rāmejja vā, kāmejja vā, abhilasejja vā, bhuṃjejja vā, paribhuṃjejjā  
vā jāva ṇaṃ viyammaṃ vā samāyarejjā  
(6) se ṇaṃ duraṃta-paṃta-lakkhaṇe ahanne avaṃde adaṭṭhavve apavitte apasatthe akallāṇe amaṃgale niṃdaṇijje garahaṇijje khiṃsaṇijje kucchaṇijje,  
(7) se ṇaṃ pāve, se ṇaṃ pāva-pāve, se ṇaṃ mahāpāve-se ṇaṃ mahāpāva-pāve se ṇaṃ bhaṭṭha-sīle, se ṇaṃ bhaṭṭhāyāre, se ṇaṃ nibbhaṭṭhacāritte mahā-pāva-kammakārī  
(8) jai ṇaṃ pāyacchittama-bbhuṭṭhejjā, tao ṇaṃ maṃdaratuṃgeṇaṃ vaireṇaṃ sarīreṇaṃ uttameṇaṃ, saṃghayaṇeṇaṃ, uttameṇaṃ poruseṇaṃ, uttameṇaṃ satteṇaṃ, uttameṇaṃ tatta-pariṇṇāṇeṇaṃ uttameṇaṃ vīriyasāmattheṇaṃ, uttameṇaṃ saṃvegeṇaṃ uttamāe dhamma-saddhāe, uttameṇaṃ āukkhaeṇaṃ taṃ pāyacchittamanucarejjā|  
(9) te ṇaṃ tu goyamā sāhūṇaṃ mahānubhāgāṇaṃ aṭṭhārasa-parihāra-ṭṭhāṇāiṃ ṇava-baṃbhacera-guttīo vāgarijjaṃti||

### [2.3.405](https://indike.org/pramana/in.jaina.sveta.cheda.6.2.3.405)

(1) se bhayavaṃ kiṃ pacchitteṇaṃ sujjhejjā  
(2) goyamā atthege je ṇaṃ sujjhejjā| atthege je ṇaṃ no sujjhejjā  
(3) se bhayavaṃ keṇaṃ aṭṭheṇaṃ evaṃ vuccai | jahā ṇaṃ goyamā atthege je ṇaṃ sujjhejjā, atthege je ṇaṃ no sujjhejjā|  
(4) goyamā atthege je ṇaṃ niyaḍī-pahāṇe saḍha-sīle vaṃka-samāyāre| se ṇaṃ sasalle āloittāṇaṃ sasalle ceva pāyacchittamanucarejjā| se ṇaṃ avi-suddha-sakalusāsae no sujjhejjā  
(5) atthege je ṇaṃ ujjū paddhara-sarala-sahāve, jahā-vattaṃ nīsallaṃ nīsaṃkaṃ supariphuḍaṃ āloi-ttāṇaṃ jahovaiṭṭhaṃ ceva pāyacchittamanuciṭṭhejjā| se ṇaṃ nimmala-nikkalusa-visuddhāsae vi sujjhejjā|  
(6) eteṇaṃ aṭṭheṇaṃ evaṃ vuccai jahā ṇaṃ goyamā atthege je ṇaṃ sujjhejjā| atthege je ṇaṃ no sujjhejjā|

### [2.3.406](https://indike.org/pramana/in.jaina.sveta.cheda.6.2.3.406)

(1) tahā ṇaṃ goyamā itthīyaṃ nāma purisāṇaṃ ahamāṇaṃ savva-pāva-kammāṇaṃ vasuhārā, tama-raya-paṃka-khāṇī soggai-maggassa ṇaṃ aggalā, narayāvayārassa ṇaṃ samoyaraṇa-vattaṇī  
(2) abhūmayaṃ visakaṃdaliṃ, aṇaggiyaṃ caḍuliṃ abhoyaṇaṃ visūiyaṃ aṇāmiyaṃ vāhiṃ, aveyaṇaṃ mucchaṃ, aṇovasaggaṃ māriṃ aniyaliṃ guttiṃ, arajjue pāse, aheue maccū,  
(3) tahā ya ṇaṃ goyamā itthi-saṃbhoge purisāṇaṃ manasā vi ṇaṃ aciṃtaṇijje, aṇajjhava-saṇijje, apatthaṇijje, aṇīhaṇijje, aviyappaṇijje, asaṃkappaṇijje, aṇabhilasaṇijje, asaṃbharaṇijje tivihaṃ tiviheṇaṃ ti|  
(4) jao ṇaṃ itthiyaṃ nāma purisassa ṇaṃ, goyamā savvappagāresuṃ pi dussāhiya-vijjaṃ pi va dosuppapāyaṇiṃ, sāraṃbha saṃjaṇagaṃ pi va puṇo asaṃjamāyaraṇaṃ apuṭṭhadhammaṃ,  
(5) khaliyacārittaṃ piva anāloiyaṃ aniṃdiyaṃ agarahiyaṃ akaya-pāyacchittajjhavasāyaṃ paḍucca anaṃta-saṃsāra-pariyaṭṭaṇa-dukkhasaṃdohaṃ  
(6) kaya-pāyacchitta-visohiṃ pi va puṇo asaṃjamāyaraṇaṃ mahaṃta-pāva-kamma-saṃcayaṃ hiṃsaṃ va sayala-telokka-niṃdiyaṃ  
(7) adiṭṭha-paraloga-paccavāya-ghoraṃdhayāra-naraya-vāso iva-niraṃtarāṇega-dukkha-nihiṃ ti||

### [2.3.407](https://indike.org/pramana/in.jaina.sveta.cheda.6.2.3.407)

aṃga-paccaṃga-saṃṭhāṇaṃ cārulla viya-pehiyaṃ|  
itthīṇaṃ taṃ na nijjhāe kāma-rāga-vivaḍḍhaṇaṃ||

### [2.3.408](https://indike.org/pramana/in.jaina.sveta.cheda.6.2.3.408)

(1) tahā ya itthīo nāma goyamā palaya-kāla-rayaṇī-miva savva-kālaṃ tamovalittāo bhavaṃti|  
(2) vijju iva khaṇadiṭṭha-naṭṭha-pemmāo bhavaṃti|  
(3) saraṇāgaya-ghāyago iva ekka-jammiyāo takkhaṇa-pasūya-jīvaṃta-muddha-niya-sisu-bhakkhīo iva mahā-pāva-kammāo bhavaṃti|  
(4) khara-pavaṇuccāliya-lavaṇovahi-velāiva bahu-viha-vikappa-kallolamālāhiṃ ṇaṃ| khaṇaṃ pi egattha hi asaṃṭhiya-māṇasāo bhavaṃti|  
(5) sayaṃbhuramaṇovahimamiva duravagāha-kaitavāo bhavaṃti|  
(6) pavaṇo iva caḍula-sahāvāo bhavaṃti  
(7) aggī iva savva-bhakkhāo, vāū iva savva-pharisāo, takkaro iva paratthalolāo, sāṇo iva dānamettamettīo, maccho iva havva-paricatta-nehāo,  
(1) evamāi-anega-dosa-lakkha-paḍipunna-savvaṃgovaṃga-sabbhiṃtara-bāhirāṇaṃ mahāpāvakammāṇaṃ avinaya-visa-maṃjarīṇaṃ tatthuppanna-anattha-gaṃtha pasūīṇaṃ itthīṇaṃ|  
(2) anavaraya-nijjharaṃtaduggaṃdhā'sui-cilīṇa-kuccha-ṇijja-niṃdaṇijja-khiṃsaṇijja-savvaṃgo -vaṃgāṇaṃ sabbhaṃtara-bāhirāṇaṃ|  
(3) paramatthao mahāsattāṇaṃ nivvinna-kāma-bhogāṇaṃ goyamā savvuttamuttamapurisāṇaṃ ke nāma sayanne suviṇṇāya-dhammāhamme khaṇamavi abhilāsaṃ gacchijjā|

### [2.3.409](https://indike.org/pramana/in.jaina.sveta.cheda.6.2.3.409)

(4) jāsiṃ ca ṇaṃ abhilasiukāme purise tajjoṇiṃ samucchima-paṃciṃdiyāṇaṃ ekka-pasaṃgeṇaṃ ceva navaṇhaṃ saya-sahassāṇaṃ niyamāo uddavage bhavejjā|  
(5) te ya accaṃta-suhumattāo maṃsacakkhuṇo na pāsiyā

### [2.3.410](https://indike.org/pramana/in.jaina.sveta.cheda.6.2.3.410)

ee ṇaṃ aṭṭheṇaṃ evaṃ vuccai jahā ṇaṃ goyamā no itthīyaṃ ālavejjā, no saṃlavejjā, no ullavejjā, no itthīgaṃ aṃgovaṃgāiṃ saṃṇi-rikkhejjā, jāva ṇaṃ no itthīe saddhiṃ ege baṃbhayārī addhāṇaṃ paḍivajjejjā||

### [2.3.411](https://indike.org/pramana/in.jaina.sveta.cheda.6.2.3.411)

(1) se bhayavaṃ kimitthie saṃlāvullāvaṃgovaṃga-nirikkhaṇaṃ vajjejjā, se ṇaṃ uyāhu mehuṇaṃ goyamā ubhayamavi  
(2) se bhayavaṃ kimitthi-saṃjoga-samāyaraṇe mehuṇe parivajjiyā, uyāhu ṇaṃ bahuvihesuṃ sacittā-citta-vatthu-visaesuṃ|  
(3) mehuṇa-pariṇāme tivihaṃ tiviheṇaṃ maṇo-vai-kāya-jogeṇaṃ savvahā savva-kālaṃ jāvajjīvāe tti | goyamā savvahā vivajjejjā||

### [2.3.412](https://indike.org/pramana/in.jaina.sveta.cheda.6.2.3.412)

(1) se bhayavaṃ je ṇaṃ keī sāhū vā sāhūṇī vā mehuṇamāsevejjā se ṇaṃ vaṃdejjā goyamā je ṇaṃ keī sāhū vā sāhūṇī vā mehuṇaṃ sayameva appaṇā sevejja vā parehi uvaisettuṃ sevāvejjā vā sevijja-māṇaṃ samanujāṇejjā vā divvaṃ vā mānusaṃ vā tirikkha-joṇiyaṃ vā jāva ṇaṃ kara-kammāiṃ sacittācitta-vatthuvisayaṃ vā vivihajjhavasāeṇa kāramākārimovagaraṇeṇaṃ manasā vā vayasā vā kāeṇa vā  
(2) se ṇaṃ samaṇe vā samaṇī vā dūraṃta-pata-lakkhaṇa adaṭṭhavve amagga-samāyāre mahāpāva-kamme no ṇaṃ vaṃdejjā, no ṇaṃ vaṃdāvejjā no ṇaṃ vaṃdijjamāṇa vā samanujāṇejjā tivihaṃ tiviheṇaṃ jāva ṇaṃ visohikālaṃ ti|  
(3) se bhayavaṃ jaṃ vaṃdejjā se kiṃ labhejjā  
(4) goyamā je taṃ vaṃdejjā, se aṭṭhārasaṇhaṃ sīlaṃga-sahassadhārīṇaṃ mahānubhāgāṇaṃ titthayarādīṇaṃ mahatī āsāyaṇaṃ kujjā|  
(5) je ṇaṃ titthayarādīṇaṃ āsāyaṇaṃ kujjā, se ṇaṃ ajjhavasāyaṃ paḍuccā| jāva ṇaṃ anaṃta-saṃsāriyattaṇaṃ labhejjā||

### [2.3.413](https://indike.org/pramana/in.jaina.sveta.cheda.6.2.3.413)

vippahiccitthiyaṃ sammaṃ savvahā mehuṇaṃ pi ya|  
atthege goyamā pāṇī je no cayai pariggahaṃ||

### [2.3.414](https://indike.org/pramana/in.jaina.sveta.cheda.6.2.3.414)

jāvaiyaṃ goyamā tassa saccittācittobhayattagaṃ|  
pabhūyaṃ cānujīvassa bhavejjā u pariggahaṃ||

### [2.3.415](https://indike.org/pramana/in.jaina.sveta.cheda.6.2.3.415)

tāvaieṇaṃ tu so pāṇī sasaṃgo mokkha-sāhaṇaṃ|  
nāṇādi-tigaṃ na ārāhe; tamhā vajje pariggahaṃ||

### [2.3.416](https://indike.org/pramana/in.jaina.sveta.cheda.6.2.3.416)

atthege goyamā pāṇī je payahittā pariggahaṃ|  
āraṃbhaṃ no vivajjejjā jaṃ cīyaṃ bhavaparaṃparā||

### [2.3.417](https://indike.org/pramana/in.jaina.sveta.cheda.6.2.3.417)

āraṃbhe patthiyassega-viyala-jīvassa vaiyare|  
saṃghaṭṭaṇāiyaṃ kammaṃ jaṃ baddhaṃ goyamā suṇa||

### [2.3.418](https://indike.org/pramana/in.jaina.sveta.cheda.6.2.3.418)

(1) ege beiṃdie jīve egaṃ samayaṃ anicchamāṇe balābhiogeṇaṃ hattheṇa vā pāeṇa vā annayareṇa vā salāgāi-uva-garaṇa-jāeṇaṃ je kei pāṇī agāḍhaṃ saṃghaṭṭejjā vā saṃghaṭṭāvejja vā saṃghaṭijjamāṇaṃ vā aṃgāḍhaṃ parehiṃ-samanujāṇejjā,  
(2) se ṇaṃ goyamā jayā taṃ kammaṃ udayaṃ gacchejjā tayā ṇaṃ mahayā keseṇaṃ chammāseṇaṃ vedejjā gāḍhaṃ, duvālasahiṃ saṃvaccharehiṃ|  
(3) tameva agāḍhaṃ pariyāvejjā vāsa-sahasseṇaṃ gāḍhaṃ, dasahiṃ vāsa-sahassehiṃ|  
(4) tameva agāḍhaṃ kilāmejjā, vāsa-lakkheṇaṃ gāḍhaṃ, dasahiṃ vāsalakkhehiṃ|  
(5) ahā ṇaṃ uddavejjā, tao vāsa-koḍie|  
(6) evaṃ ti-cau-paṃciṃdiesu daṭṭhavvaṃ||

### [2.3.419](https://indike.org/pramana/in.jaina.sveta.cheda.6.2.3.419)

suhumassa puḍhavi-jīvassa jattegassa virāhaṇaṃ|  
appāraṃbhaṃ tayaṃ beṃti goyamā savva-kevalī||

### [2.3.420](https://indike.org/pramana/in.jaina.sveta.cheda.6.2.3.420)

suhumassa puḍhavi-jīvassa vāvattī jattha saṃbhave|  
mahāraṃbhaṃ tayaṃ beṃti goyamā savva-kevalī||

### [2.3.421](https://indike.org/pramana/in.jaina.sveta.cheda.6.2.3.421)

evaṃ tu sammilaṃtehiṃ kammukkuruḍehiṃ goyamā|  
se soṭṭhabbheanaṃtehiṃ je āraṃbhe pavattae||

### [2.3.422](https://indike.org/pramana/in.jaina.sveta.cheda.6.2.3.422)

āraṃbhe vaṭṭamāṇassa baddha-puṭṭha-nikāiyaṃ|  
kammaṃ baddhaṃ bhave jamhā, tamhāraṃbhaṃ vivajjae||

### [2.3.423](https://indike.org/pramana/in.jaina.sveta.cheda.6.2.3.423)

puḍhavāi-ajīva-kāyaṃ tā savva-bhāvehiṃ savvahā|  
āraṃbhā je niyaṭṭejjā, se airā jamma-jarā-maraṇa-  
savva-dāridda-dukkhāṇaṃ vimuccai tti||

### [2.3.424](https://indike.org/pramana/in.jaina.sveta.cheda.6.2.3.424)

atthege goyamā pāṇī je eyaṃ paribujjhiuṃ|  
egaṃta-suha-tallicche na labhe sammaggavattaṇiṃ||

### [2.3.425](https://indike.org/pramana/in.jaina.sveta.cheda.6.2.3.425)

jīve saṃmagga-moinne ghora-vīratavaṃ care|  
acayaṃto ime paṃca kujjā savvaṃ niratthayaṃ||

### [2.3.426](https://indike.org/pramana/in.jaina.sveta.cheda.6.2.3.426)

kusīlosanna-pāsatthe sacchaṃde sabale tahā|  
diṭṭhīe vi ime paṃca goyamā na nirikkhae||

### [2.3.427](https://indike.org/pramana/in.jaina.sveta.cheda.6.2.3.427)

savvaṇṇu-desiyaṃ maggaṃ savva-dukkha-paṇāsagaṃ|  
sāyā gārava-garue vi annahā bhaṇiumujjhae||

### [2.3.428](https://indike.org/pramana/in.jaina.sveta.cheda.6.2.3.428)

payamakkharaṃ pi jo egaṃ savvaṇṇūhiṃ pavediyaṃ|  
ṇa roejja annahā bhāse, miccha-diṭṭhī sa nicchiyaṃ||

### [2.3.429](https://indike.org/pramana/in.jaina.sveta.cheda.6.2.3.429)

eyaṃ nāūṇa saṃsaggiṃ darisaṇālāva-saṃthavaṃ|  
savāsaṃ ca hiyākaṃkhī savvovāehiṃ vajjae||

### [2.3.430](https://indike.org/pramana/in.jaina.sveta.cheda.6.2.3.430)

bhayavaṃ nibbhaṭṭha-sīlāṇaṃ darisaṇaṃ taṃ pi necchasi|  
pacchittaṃ vāgaresī ya iti ubhayaṃ na jujjae||

### [2.3.431](https://indike.org/pramana/in.jaina.sveta.cheda.6.2.3.431)

goyamā bhaṭṭha-sīlāṇaṃ duttare saṃsāra-sāgare|  
dhuvaṃ tamanukaṃpittā pāyacchitte padarisie||

### [2.3.432](https://indike.org/pramana/in.jaina.sveta.cheda.6.2.3.432)

bhayavaṃ kiṃ pāyacchitteṇaṃ chiṃdijjā nāragāuyaṃ |  
anucariūṇa pacchittaṃ bahave duggaiṃ gae||

### [2.3.433](https://indike.org/pramana/in.jaina.sveta.cheda.6.2.3.433)

goyamā je samajjejjā anaṃta-saṃsāriyattaṇaṃ|  
pacchitteṇaṃ dhuvaṃ taṃ pi chiṃde, kiṃ puṇo narayāuyaṃ||

### [2.3.434](https://indike.org/pramana/in.jaina.sveta.cheda.6.2.3.434)

pāyacchittassa bhuvaṇettha nāsajjhaṃ kiṃci vijjae|  
bohilābhaṃ pamottūṇaṃ, hāriyaṃ taṃ na labbhae||

### [2.3.435](https://indike.org/pramana/in.jaina.sveta.cheda.6.2.3.435)

taṃ cāukāya-paribhoge teukāyassa nicchiyaṃ|  
abohilābhiyaṃ kammaṃ bajjhae mehuṇeṇa ya||

### [2.3.436](https://indike.org/pramana/in.jaina.sveta.cheda.6.2.3.436)

mehuṇaṃ āu-kāyaṃ ca teu-kāyaṃ taheva ya|  
tamhā tao vi jatteṇaṃ vajjejjā saṃjaiṃdie||

### [2.3.437](https://indike.org/pramana/in.jaina.sveta.cheda.6.2.3.437)

se bhayavaṃ gāratthīṇaṃ savvamevaṃ pavattaī|  
tā jai abohī bhavejja esu tao sikkhā-guṇā'nuvvayadharaṇaṃ tu nipphalaṃ||

### [2.3.438](https://indike.org/pramana/in.jaina.sveta.cheda.6.2.3.438)

goyamā duvihe pahe akkhāe sussamaṇe ya susāvae|  
mahavvaya-dhare paḍhame, bīe'nuvvaya-dhārae||

### [2.3.439](https://indike.org/pramana/in.jaina.sveta.cheda.6.2.3.439)

tivihaṃ tiviheṇaṃ samaṇehiṃ savva-sāvajjamujjhiyaṃ|  
jāvajjīvaṃ vayaṃ ghoraṃ paḍivajjiyaṃ mokkha-sāhaṇaṃ||

### [2.3.440](https://indike.org/pramana/in.jaina.sveta.cheda.6.2.3.440)

duvihega-vihaṃ tivihaṃ vā thūlaṃ sāvajjamujjhiyaṃ|  
uddiṭṭha-kāliyaṃ tu vayaṃ deseṇa na saṃvase gāratthīhiṃ||

### [2.3.441](https://indike.org/pramana/in.jaina.sveta.cheda.6.2.3.441)

taheva tivihaṃ tiviheṇaṃ icchāraṃbhaṃ-pariggahaṃ|  
vosiraṃti anagāre jinaliṃgaṃ tu dhareṃti te||

### [2.3.442](https://indike.org/pramana/in.jaina.sveta.cheda.6.2.3.442)

iyare uṇaṃ anujjhittā icchāraṃbha-pariggahaṃ|  
sadārābhirae sa gihī jina-liṃgaṃ tu pūyae na dhārayaṃ ti||

### [2.3.443](https://indike.org/pramana/in.jaina.sveta.cheda.6.2.3.443)

to goyamega-desassa paḍikkaṃte gāratthe bhave|  
taṃ vayamanupālayaṃtāṇaṃ no siṃ āsāyaṇaṃ bhave||

### [2.3.444](https://indike.org/pramana/in.jaina.sveta.cheda.6.2.3.444)

je puna savvassa paḍikkaṃte dhāre paṃca-mahavvae|  
jinaliṃgaṃ tu samuvvahai taṃ tigaṃ no vivajjae||

### [2.3.445](https://indike.org/pramana/in.jaina.sveta.cheda.6.2.3.445)

to mahayāsāyaṇaṃ tesiṃ itthi-ggī-āu-sevaṇe|  
anaṃtanāṇī jiṇe jamhā eyaṃ manasā vi nā'bhilase||

### [2.3.446](https://indike.org/pramana/in.jaina.sveta.cheda.6.2.3.446)

tā goyamā sahiyaeṇaṃ evaṃ vīmaṃsiuṃ daḍhaṃ|  
vibhāvaya jai baṃdhejjā gihi no u abohilābhiyaṃ||

### [2.3.447](https://indike.org/pramana/in.jaina.sveta.cheda.6.2.3.447)

saṃjae puna nibaṃdhejjā eyāhiṃ heūhiṃ ya|  
āṇāikkama-vaya-bhaṃgā taha ummagga-pavattaṇā||

### [2.3.448](https://indike.org/pramana/in.jaina.sveta.cheda.6.2.3.448)

mehuṇaṃ cāyukāyaṃ ca teukāyaṃ taheva ya|  
havai tamhā titayaṃ ti jatteṇaṃ vajjejjā savvahā munī||

### [2.3.449](https://indike.org/pramana/in.jaina.sveta.cheda.6.2.3.449)

je caraṃte va pacchittaṃ maṇeṇaṃ saṃkilissae|  
jaha bhaṇiyaṃ vāhaṇānuṭṭhe nirayaṃ so teṇa vaccae||

### [2.3.450](https://indike.org/pramana/in.jaina.sveta.cheda.6.2.3.450)

bhayavaṃ maṃdasaddhehiṃ pāyacchittaṃ na kīraī|  
aha kāhiṃti kiliṭṭha-mane to anukaṃpaṃ virujjhae||

### [2.3.451](https://indike.org/pramana/in.jaina.sveta.cheda.6.2.3.451)

nārāyādīhiṃ saṃgāme goyamā sallie nare|  
salluddharaṇe bhave dukkhaṃ nānukaṃpā virujjhae||

### [2.3.452](https://indike.org/pramana/in.jaina.sveta.cheda.6.2.3.452)

evaṃ saṃsāra-saṃgāme aṃgovaṃgaṃta-bāhiraṃ|  
bhāva-salluddhariṃtāṇaṃ anukaṃpā anovamā||

### [2.3.453](https://indike.org/pramana/in.jaina.sveta.cheda.6.2.3.453)

bhayavaṃ sallammi dehatthe dukkhie hoṃti pāṇiṇo|  
jaṃ samayaṃ nipphiḍe sallaṃ takkhaṇā so suhī bhave||

### [2.3.454](https://indike.org/pramana/in.jaina.sveta.cheda.6.2.3.454)

evaṃ titthayare siddhe sāhū-dhammaṃ vivaṃciuṃ|  
jamakajjaṃ kayaṃ teṇaṃ nisirieṇaṃ suhī bhave||

### [2.3.455](https://indike.org/pramana/in.jaina.sveta.cheda.6.2.3.455)

pāyacchitteṇa ko tattha kārieṇaṃ guṇo bhave |  
jeṇaṃ thevassa vī desi dukkaraṃ duranuccaraṃ||

### [2.3.456](https://indike.org/pramana/in.jaina.sveta.cheda.6.2.3.456)

uddhariuṃ goyamā sallaṃ vaṇa-bhaṃge jāva no kaye|  
vaṇa-piṃḍīpaṭṭa-baṃdhaṃ ca tāva no kiṃ parujjhae||

### [2.3.457](https://indike.org/pramana/in.jaina.sveta.cheda.6.2.3.457)

bhāvasallassa vaṇa-piṃḍiṃ paṭṭa-bhūo imo bhave|  
pacchitto dukkharohaṃ pi pāva-vaṇaṃ khippaṃ parohae||

### [2.3.458](https://indike.org/pramana/in.jaina.sveta.cheda.6.2.3.458)

bhayavaṃ kimanuvijjaṃte suvvaṃte jāṇie i vā|  
sohei savva-pāvāiṃ pacchitte savvaṇṇu-desie ||

### [2.3.459](https://indike.org/pramana/in.jaina.sveta.cheda.6.2.3.459)

susāu-sīyale udage goyamā jāva no pibe|  
nare gimhe viyāṇaṃte, tāva taṇhā na uvasame||

### [2.3.460](https://indike.org/pramana/in.jaina.sveta.cheda.6.2.3.460)

evaṃ jāṇittu pacchittaṃ asaḍha-bhāve na jā care|  
tāva tassa tayaṃ pāvaṃ vaḍḍhae u na hāyae||

### [2.3.461](https://indike.org/pramana/in.jaina.sveta.cheda.6.2.3.461)

bhayavaṃ kiṃ taṃ vaḍḍhejjā jaṃ pamādeṇa katthaī|  
āgayaṃ puṇo āuttassa tettiyaṃ kiṃ na ṭṭhāyae ||

### [2.3.462](https://indike.org/pramana/in.jaina.sveta.cheda.6.2.3.462)

goyamā jaha pamāeṇaṃ anicchaṃto'hi-ḍaṃkie |  
āuttassa jahā pacchā visaṃ vaḍḍhe, taha ceva pāvagaṃ||

### [2.3.463](https://indike.org/pramana/in.jaina.sveta.cheda.6.2.3.463)

bhayavaṃ je vidiya-paramatthe savva-pacchitta-jāṇage|  
te kiṃ paresiṃ sāhiṃti niyama-kajjaṃ jahaṭṭhiyaṃ ||

### [2.3.464](https://indike.org/pramana/in.jaina.sveta.cheda.6.2.3.464)

goyamā maṃta-taṃtehiṃ diyahe jo koḍimuṭṭhave|  
se vi daṭṭhe viṇicceṭṭhe ghāriyannehiṃ bhallie||

### [2.3.465](https://indike.org/pramana/in.jaina.sveta.cheda.6.2.3.465)

evaṃ sīlujjale sāhū pacchittaṃ tu daḍhavvae|  
annesiṃ niuṇa-laddhaṭṭhaṃ sohe sasīsaṃ va ṇhāvīo jaha tti||

### [2.3.466](https://indike.org/pramana/in.jaina.sveta.cheda.6.2.3.466)

eesiṃ tu doṇhaṃ pi ajjhayaṇāṇaṃ vihipuvvageṇaṃ savva-sāmannaṃ vāyaṇaṃ ti||

## Translations (2)

- [Mahānisīha: Gujarati translation (Dīparatnasāgara, 2020)](https://indike.org/pramana/in.jaina.sveta.cheda.6~gu-deepratnasagar2020.2.3.289) — Gujarati
- [Mahānisīha: Hindi translation (Dīparatnasāgara, 2019)](https://indike.org/pramana/in.jaina.sveta.cheda.6~hi-deepratnasagar2019.2.3.289) — Hindi

## Commentaries (1)

- [Mahānisīha: ṭīkānusārī vivecana](https://indike.org/pramana/in.jaina.sveta.cheda.6!deepratnasagar.114) — Muni Dīparatnasāgara 2000, Gujarati

---
Source: [https://indike.org/pramana/in.jaina.sveta.cheda.6.2.3](https://indike.org/pramana/in.jaina.sveta.cheda.6.2.3) · Pramāṇa
