[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The Śvetāmbara canon (Siddhānta)](https://indike.org/pramana/in.jaina.sveta) › [The Chedasūtras (disciplinary texts)](https://indike.org/pramana/in.jaina.sveta.cheda) › [Mahanisiha](https://indike.org/pramana/in.jaina.sveta.cheda.6) › 3.592 # Mahanisiha 3.592 Mahānisīha 3.592 - **Language:** Ardhamāgadhī Prakrit ### [3.592](https://indike.org/pramana/in.jaina.sveta.cheda.6.3.592) (1) se bhayavaṃ evaṃ jahuttaviṇaovahāṇeṇaṃ paṃcamaṃgala-mahāsuyakkhaṃdhamahijjittāṇaṃ puvvānu-puvvīe, pacchānupuvvīe, anānupuvvīe, sara-vaṃjana-mattā-biṃdu-payakkhara-visuddhaṃ thira-pariciyaṃ kāūṇaṃ mahayā pabaṃdheṇaṃ suttatthaṃ ca vinnāya, tao ya ṇaṃ kima-hijjejjā (2) goyamā iriyāvahiyaṃ| (3) se bhayavaṃ keṇaṃ aṭṭheṇaṃ evaṃ vuccai, jahā ṇaṃ paṃcamaṃgala-mahāsuyakkhaṃdhamahijjittā ṇaṃ puṇo iriyāvahiyaṃ ahīe (4) goyamā je esa āyā se ṇaṃ jayā gamaṇā'gamaṇāi pariṇae anega-jīva-pāṇa-bhūya-sattāṇaṃ aṇo vautta-pamatte saṃghaṭṭaṇa-avaddāvaṇa-kilāmaṇaṃ-kāūṇaṃ, aṇāloiya-apaḍikkaṃte ceva asesa-kammakkhayaṭṭhayāe kiṃci cii-vaṃdana-sajjhāya -jjhāṇāisu abhiramejjā, tayā se ega-cittā samāhī bhavejjā na vā| (5) jao ṇaṃ gamaṇāgamaṇāi-anega-anna-vāvāra-pariṇāmā-satta-cittattāe keī pāṇī tameva bhāvaṃtaramacchaḍḍiya-aṭṭa-duhaṭṭajjhavasie kaṃ ci kālaṃ khaṇaṃ virattejjā tāhe taṃ tassa phaleṇaṃ visaṃvaejjā (6) jayā u na kahiṃ ci annāṇa-moha pamāya-doseṇa sahasā egiṃdiyādīṇaṃ saṃghaṭṭaṇaṃ pariyāvaṇaṃ vā kayaṃ bhavejjā| (7) tayā ya pacchā hā hā hā duṭṭhu kayamamhehiṃ ti ghanarāga-dosa-moha-micchatta-annāṇaṃdhehiṃ adiṭṭha-paraloga-paccavāehiṃ kūra-kammanigghiṇehiṃ ti paramasaṃvegamāvanne| (8) suparīphuḍaṃ āloettāṇaṃ, niṃdittāṇaṃ, garahettāṇaṃ, pāyacchittamanucarettāṇaṃ nīsalle aṇāulacitte asuha-kammakkhayaṭṭhā kiṃci āya-hiyaṃ cii-vaṃdaṇāi anuṭṭhejjā (9) tayā tayaṭṭhe ceva uvautte se bhavejjā| (10) jayā ṇaṃ se tayatthe uvautte bhavejjā, tayā tassa ṇaṃ paramegagga-cittasamāhī havejjā, tayā ceva savva-jaga-jīva-pāṇa-bhūya-sattāṇaṃ jahiṭṭha-phalasaṃpattī-bhavejjā| (11) tā goyamā ṇaṃ appaḍikkaṃtāe iriyāvahiyāe na kappai ceva kāuṃ kiṃci ciivaṃdana-sajjhāyāiyaṃ phalāsāyamabhikaṃkhugāṇaṃ| (12) eteṇaṃ aṭṭheṇaṃ goyamā evaṃ vuccai, jahā ṇaṃ goyamā sasuttatthobhayaṃ paṃcamaṃgala- thira-pariciyaṃ kāūṇaṃ, tao iriyāvahiyaṃ ajjhīe| - [Previous: 3.591](https://indike.org/pramana/in.jaina.sveta.cheda.6.3.591) - [Next: 3.593](https://indike.org/pramana/in.jaina.sveta.cheda.6.3.593) - [Up: 3](https://indike.org/pramana/in.jaina.sveta.cheda.6.3) ## Translations (2) - [Mahānisīha: Gujarati translation (Dīparatnasāgara, 2020)](https://indike.org/pramana/in.jaina.sveta.cheda.6~gu-deepratnasagar2020.3.592) — Gujarati - [Mahānisīha: Hindi translation (Dīparatnasāgara, 2019)](https://indike.org/pramana/in.jaina.sveta.cheda.6~hi-deepratnasagar2019.3.592) — Hindi ## Commentaries (1) - [Mahānisīha: ṭīkānusārī vivecana](https://indike.org/pramana/in.jaina.sveta.cheda.6!deepratnasagar.258) — Muni Dīparatnasāgara 2000, Gujarati --- Source: [https://indike.org/pramana/in.jaina.sveta.cheda.6.3.592](https://indike.org/pramana/in.jaina.sveta.cheda.6.3.592) · Pramāṇa